3 Lal chun a lal ina mi tilre hotu tak^b Aspenaz chu Israelhai laia lal nauhai le mi thra nauhai laia mi tlangval threnkhat hung thruoi a, Kaldai trong le thu le hla inchuktir dingin thu a pêk a. 4 Anni chu tlangval pieng fel, hmêl thra, thil hrang hrang inchuk thei dinga lungvar nei, hrietna nei thra, thil man zung zung thei mi le lal ina thok tlâk mi an ni ding a nih. 5 Ni tina an fak le dawn ding bu le uoiin khom lal chokaa inthoka mi ngei pe dingin thu a pêk bok a. Kum thum a zirtir hnungin lal hmaah a hung inlangpui ding a nih.

6 Hieng mihai lai hin Judai rama mi Daniel hai, Hanania hai, Misael hai le Azaria hai chu an thrang ve a. 7 Lal ina mi tilre hotu chun hming thar a sakpek seng a, Daniel chu Beltesazzar a’n buk a, Hanania chu Sadrak, Misael chu Mesak, Azaria chu Abednago.

8 Sienkhom Daniel chun lal bu le uoiin-a insukporchè naw a tum tlat leiin lal ina hotu tak kuoma chun chuong anga insukporchè lo dinga phalpek dingin a hni a. 9 Pathienin Daniel chu a hotu lien ditsak le lunginsiet a’n hlawtir a. 10 Mi tilre hotu chun Daniel kuomah, “In fak le dawn ding ruottu ka pu, lal hi ka tri a nih. Nakie hin nangni kum ruolpuihai nêka se lemin hmu sien cheu iem ni tang a ta? Lal chun nangni leiin ka lu la ngei a tih” a ta.

11 Daniel hai, Hanania hai, Misael hai le Azaria hai enkoltu dinga lal ina hotu takin a ruot kuoma chun Danielin, 12 “I siehlawhai hi ni sawm sung mi ensin rawh. Chu sung chun fak ding thlai le dawn ding tui chauh naw chu thil dang mi pe naw rawh. 13 Chu zoah kan hmèl le lal bu fatuhai hmèl enkhi la, i hmu dan angin i siehlawhai chunga hin thaw rawh” a ta. 14 Chuong ang chun a remti a, ni sawm sung a ensin a. 15 Ni sawm hnunga chun lal bu fatu tlangvalhai po po nêkin an taksa a thra lem a, an hmĕl a săr thra lem bok a. 16 Chuongchun, anni enkoltu chun lal bu hnienghnâr le uoiin chu pe loin thlai ringot a pêk ta lem a.

17 Hieng tlangval palihai hi Pathienin thil inchuk thiem theina le thu le hla tinrêng hriet thiem theina le varna a pêk a. Daniel lem chu inlàrna le mang tinrêng hril fie theina a pek a.

18 Lalin anni hung thruoina dinga hun a ruot a tlung chun lal in hotu chun anni chu Nebukadnezzar hmaah a hung thruoi a. 19 Lal chun a lo biek seng a, Daniel le Hanania le Misael le Azaria hai tluka var mi dang tu khom a hmu naw a, lal ina thoktu dingin a lak nghal tawl a. 20 Thuvar le hriet ding awm tinreng lalin an donhai hrim hrim chu a ram sunga mitdawivaihai le dawithiemhai lêt sawmin an hriet lem vong ti a hriet a. 21 Daniel lem chu lal Kura inlal hnung kum khatna chen a thok zom pei hrim a nih.