4 Tlangsamhai chun inring takin, “Aw hnam tina mi, mi tina mi le trong tina mihai, hi hi in thaw dinga thupêk chu a nih: 5 Tawtawrawt hai, theihle hai, perkhuong hrui sawmli neihai, tringtrang hai, perkhuong hai, baja hai le rimawi tum rik thei po pohai ri in hriet pha leh lal Nebukadnezzar rangkachak milim indin hmaah bokkhup unla, chibai bûk ro. 6 Tu khom bokkhupa chibai bûk lo chu rawtuina meipuia pei lût ni nghâl an tih” tiin an insam a. 7 Chutaka mipui po poin tawtawrawt hai, theihle hai, tringtrang hai le tum rik thei po po ri an hriet chun hnam tina mi, mi tina mi le trong tina mihai chu lal Nebukadnezzar rangkachak milim indin hmaa chun an bokkhup a, chibai an bŭk a.

8 Chuong lai chun Kaldai mi threnkhat chu a hma tieng an hung a, Judahai chu an hung hĕk a. 9 Lal Nebukadnezzar kuomah, “Aw laltak, kumkhuoin dam rawh. 10 Nangin aw laltak, mi tu khom tawtawrawt hai, theihle hai, perkhuong hrui sawmli nei hai, tringtrang hai, perkhuong hai, baja hai le rimawi tum rik thei po po inri hre taphot chun bokkhupin rangkachak milim chibai buk ding le 11 tu khom bokkhupa chibai buk naw taphot chu rawtuina meipuia pei lut nghal dingin thupêk i siem a. 12 Sienkhom Juda mi threnkhat, biela hotua i siem Sadrak hai, Mesak hai le Abednago hai chun aw lalpa, i pathien rong an bawl nuom ve naw a, rangkachak milim i’n din chu chibai an buk nuom ve nawh” tiin an hril a.

13 Nebukadnezzar chu nasa takin a lungsen a, Sadrak hai, Mesak hai le Abednago hai chu hung thruoi nghâl dingin thu a pêk a, an rêngin lal hmaa chun an hung thruoi a. 14 Nebukadnezzar chun, “Sadrak, Mesak le Abednago, ka pathienhai rong bawl nuom loa, ka rangkachak milim indin khom chibai in buk nuom naw thu an hril hi thudik a ni? 15 Tawtawrawt hai, theihle hai, perkhuong hrui sawmli neihai, tringtrang hai, perkhuong hai, baja hai le rimawi tum rik thei po po inri hre a, ka milim siem hmaa bokkhupa chibai buk dinga in inpei a ni chun a thra. Chibai in buk nuom naw a ni ruok chun rawtuina meipuia pei lut ni nghâl in tih. Ka kuta inthoka san suok ding chêu chu ieng pathien tak am ni ta’ng a ta?” a ta.

16 Sadrak le Mesak le Abednago chun lal kuomah, “Aw Nebukadnezzar, hi thua hin i hmaah kan inhril hlǐp khom a ngâi dĕr nawh. 17 Kan Pathien, a rong kan bawl hlak chun rawtuina meipuia inthokin a mi san suok thei a, i kuta inthok khomin aw laltak, ama chun mi san suok el a tih. 18 Chuong chu a ni naw a lo ni khomin, aw laltak, i pathienhai rong chu bawl nawng kan ta, i rangkachak milim indin khom chibai bûk bok nawng kan tih ti hi i hriet kan nuom” tiin an hril a.

19 Nebukadnezzar chu a hmêl danglam khopin Sadrak le Mesak le Abednago hai chunga chun a lungsen a. Rawtuina meipui chu a lêt saria sa zuol dinga buk sa dingin thu a pêk a. 20 Sadrak le Mesak le Abednago hai chu khuopa meipuia pei dingin a sipai ruol laia mi hrât threnkhathai chu thu a pêk a. 21 Anni rawi chu an korfuol, an zakuo hnuoi, an lukawm le an silfen danghai puma khuopin meipui inhlap puot puota chun an dĕng lŭt a. 22 Lal thupek chu a’n hmaw êm lei le meipui chu a chok nasat êm leiin Sadrak le Mesak le Abednago peitu sipaihai chu meiin a kăng hlum a, 23 an pathum chun khuop pumin meipuia chun an tlu lŭt a.

24 Chun, lal Nebukadnezzar chu maktiin an chawm tho a, a remruottuhai kuoma chun, “Khuop puma meipuia ei peihai kha mi pathum an ni naw maw?” a ta. Anni chun, “Aw laltak, ni chieng e” tiin an don a. 25 Ama chun, “En ta u! Khuop loa mi pali mei laia nâ hre dêr loa inlon kuol ka hmu tlat el! A palina lem chu pathienhai naupa ang a nih” a ta.

26 Nebukadnezzar chun rawtuina meipui kotkhar chu a hung pan hnai a, “Sadrak, Mesak, Abednago, nangni Chunghnungtak Pathien siehlawhai, hung suok unla, hi taka hin hung ro” tiin a ko khĕk a. Sadrak le Mesak le Abednago chu meipuia inthok chun an hung suok a. 27 Ram bung hrang hranga lal hai, aiawtu hai, optu hai le lal remruotpuitu hai chun an hung ngir huol a, meiin an taksa a kâng thrak naw a, an sam zâi khat khom a hlieu kir naw a, an korfuolhai chu a kăng naw a, mei rim khom an innam dĕr nawh ti an hmu a.

28 Chu phing leh Lal Nebukadnezzar chun, “Sadrak, Mesak le Abednago hai Pathien chu inpâkin um raw se. Ama chun a vantirkohai a hung tir a, a siehlawhai chu a hung san suok ta si a. Ama chu an ring leiin lal thupêk chu an kal a, anni Pathien chauh naw chu pathien dang hrim hrim rong bawl lo ding le chibai bûk lo dingin an hringna chen khom chăn an inhuom a nih. 29 Chuleiin, mi tin, hnam tin le trong tina mi tu khom Sadrak le Mesak le Abednago Pathien kal zawnga thu hril taphot chu sat nawi ning an ta, an inhai khom hmunhnok dĕng bŭm angin inchang a tih ti thu ka pêk a nih; hieng anga san suok theitu pathien dang hrim hrim an um si nawh” a ta. 30 Chuongchun, Sadrak le Mesak le Abednago hai chu lalin Babulon biel hotuhai lai a’n kaisangtir ta a.