Ram insem dan ding
48
1 “Hienghai hi hnam, an hnam hming senga inchika umhai chu an nih: Hmar tieng ramri, Hethlon fe thlenga Hamat lutna kawn chen; Hazar Enan le Hamat khèla Damaska hmar tieng ramri chen, sak le thlang zawngin chan khat chu Dan hnam chan ning a tih. 2 Danhai chan le inri, sak le thlang zawnga chan khat chu Aser hnam chan ning a tih. 3 Aser-hai chan le inri, sak le thlang zawnga chan khat chu Naftali hnam chan ning a tih. 4 Naftali-hai chan le inri, sak le thlang zawnga chan khat chu Manase hnam chan ning a tih. 5 Manase-hai chan le inri, sak le thlang zawnga chan khat chu Efraim hnam chan ning a tih. 6 Efraim-hai chan le inri, sak le thlang zawnga chan khat chu Reuben hnam chan ning a tih. 7 Reuben-hai chan le inri, sak le thlang zawnga chan khat chu Juda hnam chan ning a tih.8 “Judahai chan le inri, LALPA kuoma a bîka ram in pek dinga ruot chu a khang kilometer 13.3 le a dung kilometer 5.3 lien ning a ta, a laia chun hmun thienghlim um a tih. 9 LALPA kuoma in pek ding lienzie chu a dung kilometer 13.3 le a khang kilometer 10.6 a nih. 10 Hi taka inthok hin thiempuhai chengna dingin hmun ser ruot in ta, chu chu sak tieng le thlang tieng kilometer 13.3 ning a ta, sim tieng le hmar tieng zawngin kilometer 5.3 ning a tih. A lailunga chun LALPA Tempul um a tih. 11 Hi hmun thienghlim hi thiempua ser hrang bik, ka thu vongtu Zadok thlahai umna hmun ding a nih; Levi thla danghai chun Israelhai an invăk hmang lai khan an lo zui ve a, anni ruok hin chu an zui ve nawh. 12 Chuleiin, Levi chihai leh inramriin, hmun thienghlim taka chun um an tih.
13 “Thiempuhai chan hrûl peia chun Levi chihaiin chan nei an ta, chu sak tieng le thlang tieng zawngin a dung kilometer 13.3 le sim tieng le hmar tieng zawngin a khang kilometer 5.3 ning a tih. 14 Ram chu an zor ding a ni naw a, mi le khom an inthleng ding a ni bok nawh. Hieng lai hi a ram laia a thratna tak a na, mi dang kuta pek awi a ni nawh, LALPA ta dinga hmun serh thienghlim a ni si a.
15 “Hi ram sûnga ram sem mahla, a dung kilometer 13.3 le a khang kilometer 2.65-a lien chu in bawla vantlang chêngna ding le ran tlatna hmun ding a ni leiin, hmun serh a ni ve nawh. Khawpui chu a laili takah um a tih. 16 A lien dan chu, hmar tieng kilometer 2.65 ning a ta, sim tieng, sak tieng le thlang tieng khom chuong ang vonga lien chu ning a tih. 17 Khawpui huol tuokin ram ruok um a ta, hmar tieng le sim tieng, sak tieng le thlang tienga a khang lienzie chu meter 133 vong ning a tih. 18 Chun, ram ruot sunga hmun serh hrŭla ram ruok la um, sak tieng kilometer 5.3 le thlang tieng kilometer 5.3 sunga ram chu khawpuia sinthawtuhaiin huon le loah nei thei an tih. 19 Chu hmuna chun khawpui sunga um Israel hnam tu khomin huon siem thei an tih. 20 Ram ruota um po chu kil li nei, khawpui huom sung thrang sain sir tin chu kilometer 13.3 a lien vong a nih.
21 “Ram ruot sunga hmun serhai le khawpui huom sung bâk po, sak tieng le thlang tienga ram la um po chu lal chan ding a nih. Sak tienga a dung seizie chu kilometer 13.3 ning a ta, thlang tieng khom kilometer 13.3 bok ning a tih. Hieng ramhai hi Israel chi hnamhai ram chan hrŭlah um a ta, hmun serh bik, hmun thienghlim chu a laili takah um a tih. 22 Chuong ang chun Levi chihai chan le khawpui chan chu lal chan inkârah um a ta, lal chan chu Juda chan le Benjamin chan leh inrìng an tih.
Hnam tin ram chan ding
23 “Hnam dang la umhai chan insem dan ding chu: sak le thlang zawngin chan khat chu Benjamin hnam chan ning a tih. 24 Benjamin-hai chan le inriin sak le thlang zawngin chan khat chu Simeon hnam chan ning a tih. 25 Simeon-hai chan le inriin sak le thlang zawngin chan khat chu Isakar hnamin chang an tih. 26 Isakar-hai chan le inriin sak le thlang zawngin chan khat chu Zebulun hnamin chang an tih. 27 Zebulun-hai chan le inriin sak le thlang zawngin chan khat chu Gad hnamin chang an tih. 28 Sim tienga Gad-hai ramri chu Tamar-a inthokin Meriba Kades tui chen feng a ta, chu taka inthokin Aigupta ruom zui thlain Mediterranean Tuipuiah tawp a tih. 29 Hieng ang hi Israel hnamhai rochan ding ram i sem dan ding le an ram chan seng ding chu a nih” ti hi Lalpa PATHIEN thu suok a nih.
Khawpui kotkhar
30 “Hienghai hi Jerusalem khawpuia inthoka suokna kotkharhai chu an nih: hmar tieng chu kilometer 2.4-a sei a na, 31 chu taka chun kotkhar pathum um a ta, chuonghai chu Israel thlahai hming chawiin Reuben kotkhar, Juda kotkhar le Levi kotkhar tia ko ning a tih.
32 “Sak tieng pang khom kilometer 2.4-a sei a na, kotkhar pathum, Josefa kotkhar, Benjamin kotkhar le Dan kotkhar um a tih.
33 “Sim tieng pang khom kilometer 2.4-a sei a na, kotkhar pathum, Simeon kotkhar, Isakar kotkhar le Zebulun kotkhar um a tih.
34 “Thlang tieng pang khom kilometer 2.4-a sei bok a na, kotkhar pathum, Gad kotkhar, Aser kotkhar le Naftali kotkhar um a tih.
35 “Sir tin huopa a bang seizie chu kilometer 9.6 a nih. Chu nia inthok chun khawpui hming chu LALPA UMNA HMUN ti ni tang a tih” tiin.