Jerusalem siet hnunga a um dan
4
1 Rangkachak hlîr ni hlak si kha,A tlĕt dàn a va dul ta de!
Hmun Thienghlima lunghluhai chu,
Kothlĕrah an pei dar rei rui a.
2 Rangkachak hlîr anga hlu hlak,
Zion naupa ditumhai kha,
Belhemtu pil bêl ang chauh,
An hung inchang zo ta ie!
3 Sihal hmanin a tehai chu,
Nene pek nachang a hriet a;
Ka mihai ruok chu thlalĕra
Ostrika hai ang chauh niin,
Lunginsietna an nei nawh.
4 Dangchâr leiin nautehai lei,
An dangah a kop zo a;
Naupanghan bei an ngèn a,
Tu khomin an pek si nawh.
5 Fak thrá thrà tlàn hlakhai kha,
Kotthlêrah an vàkvài a,
Puon senduk sil hlakhai kha,
Hmunhnok lai an intàl tah.
6 Santu ding tu khom um lo,
Thâwk-le-khata bohmang thut,
Sodom tuorna nêk daih khan,
Ka mihai tuor hi a sà lem.
7 Vûr le bawngnénè nêkin,
An mi lienhai an ngo lem a,
An pangtì rubi nêkin a sàr a,
Safir lung angin an mawi.
8 Tu’n chu intring nêk daiin,
An inlang dum ta lem a,
Kotthlêra hmu châng khomin,
Hriet hrang thei an ni ta nawh.
An rù chu vunin a tuom trăwk a,
Hmol bong ang elin an trawl.
9 Kawlhnâma an thathai kha,
Trăm leia thihai nêk daiin,
An lo vangnei lem a nih.
Phingtràmin an hung ongrop a,
Tharsuok fak ding nei loin,
Damten an hung zŭr hlum hlak.
10 Ka mihai siet tuok ni chun,
Nu ngilnei takhai khomin,
An hring ngei an nauhai sà,
Suongin an fâk hiel el si!
11 LALPAN lungsen hrîk thlain,
A lung inlingna a bun suok;
Zion-ah mei a’n suoktir a,
A lungphûm chen a kâng vong.
12 Hmêlmahai le dotuhaiin,
Jerusalem kul an lut thei hrim,
Hnuoia lalhaiin an ring nawh,
Khawvel mi po po khomin.
13 Sienkhom chu chu a hung tlung,
A zawlneihai suolna lei le
A thiempuhai khawlona leiin;
A sûngah mi fel thisen insuoin,
Khawpui an sukporche hlak si.
14 Kotthlêra hai, mitdel angin,
Inmaiin an invàk vèl a;
Thisen an kai nasat leiin,
Mihaiin an tirdak tawl a,
An silfen chen khom an thǐm.
15 “Fe hmang dai ro, tirdak kaihai,
Fe hmang dai ro, mi tawk naw ro”
Tiin mihan an khĕk khum a.
An tlàn hmangnaa hnam tinin,
“Hi hin um thei ta naw ti niu”
Tiin an lo khèk khum pei.
16 LALPA hnot dar tawl an na,
A en zui zing tawl bok nawh;
Thiempuhan inza an hlaw naw a,
Upahan ditsak an hlaw bok nawh.
17 Thrangpuitu kan thlirnaah,
Kan mithai a chau zo tah;
Mi san him thei lo ding nghakin,
Kulbing sang a’nthokin kan thlir.
18 Mihan an mi sui zui zing a,
Khawlaiah kan suok ngam nawh.
Kan tawp a hnai, kan ni a kin,
19 Vàna mupui vuong nêk daiin,
Mi hnottuhai chu an hràt lem;
Tlangahai an mi hnot zui pei a,
Thlalĕrah an mi lo inchàn.
20 LALPA hriek năl, kan bêl tak,
An chàng kamah a awk ta si;
‘A rawi chun hnam dang lai khom,
Um el ei tih’ kan lo ti hlak kha.
21 Edom le Uz rama chênghai,
In lawm thei lai hin hlim ro;
No chun a nang trĕp ta cheu a,
Inrui in ta, saruokin um in tih.
22 Aw nang Zion Naunu,
I hrem tuor chu la tawp a ta,
Salah hrên sawt ta naw ni che;
Nang Edom Naunu ruok chu,
I suol leiin hrem a che a,
I rîtlona phor lang a tih.