Hremna, simna, beiseina
3
1 A lungsenna hmoltum hnuoia,A’n tuortir dan hmutu ka nih.
2 Ama chun vara inthokin,
Thimah a mi hnot lut a.
3 Ka chungah sŭnnithlakin,
A kut a thlâk ngat ngat a.
4 Ka taksa le ka vunhai khom,
A suktrawm zo vong ta a,
Ka ruhai a vuok tliek a.
5 Khâkna le harsatnain,
Sir tinah an mi’n huol a.
6 Fam lo chang daih tah angin,
Thimah a mi’n chengtir a.
7 Ka tlàn suok thei nawna di’n,
Dâi a mi sakkhum vong a,
Khaidiet rikin a mi thlung.
8 Santu ding ka ko khomin,
Ka hnǐna a khârkhip vong.
9 Lung bŭmin ka lam a khâr,
Ka lampui a sukping vong.
10 Savom mi’n chàn ang el le,
Sakeibaknei intom rùk angin,
11 Lam a’nthoka mi hnùk hmangin,
Santu nei loin a mi pot chen.
12 A thalngul chu a kuoi a,
Kâp dingin a mi tin a.
13 A thal bawma thal ngei chun,
Ka lungah a kâp tlang a.
14 Ka mihai nuizat bŭr kâiin,
Sŭnnithlak hlain a mi ti-el.
15 Thil khain a mi hnaw sip a,
A mît ringot a mi’n bâ si.
16 Lungah ka há tauh tlamin,
Pilvut lai a mi sir ziel a;
17 Muongna a mi pĕk naw a,
Hmuingil umzie ka theinghil tah.
18 “Ka ropuina a chuoi ta a,
LALPA-a ka beiseina khom”
Ka ti hlol el a’n tah hi!
19 Ka tuorna le vâkvainahai,
Mît hang khàkziehai dam chu,
Ienglai khomin ka hriet zing a,
20 Ka hriet chieng nasa leiin,
Ka sûng ril a sukngŭi hlak.
21 Chuong sà chun hi hi hrein,
Beiseina ka nei nawk hlak:
22 Bohmang loa ei um el hi,
LALPA zangaina lei a na,
A lungsietna a tlol ngai nawh.
23 A thar pei hlak, tûk tinin,
A ringumna a ropui si.
24 Ka nei sun LALPA a na,
Ama chu nghak zing ka tih,
Tiin ka’n hnèm hlak a nih.
25 Amaa beiseina neitu,
Ama nghâktu ta dingin,
LALPA chu a thra a nih.
26 A sansuokna beisei a,
To zinga nghak hi a thra.
27 Tleirawl laia inthununna
Rîngkol bat hi a thra a nih.
28 LALPAN a’n băttir leiin,
To zingin um el raw se.
29 Pilvutah hmâi phûm sien la,
Beisei ding a la um si.
30 A bieng bentu kuoma chun,
Khing tieng khom dawpek sien la,
Inzaknain sip raw se.
31 Mihriemhai hi kumkhuoin,
LALPAN a pei thlàk ngai nawh.
32 Lungngaina intlun sien khom,
Lainatna a’n entir nawk hlak a,
A hmangaina ropui chu,
Ieng lai khom a rè ngai nawh.
33 Hriem nauhai chunga tuorna,
Lungngaina intlungtir hi,
A nuomzawng a ni si nawh.
34 Saltanghai sirdè amani dam,
35 Chunghnungtak hmaa mihriem,
A chanvo hnawlpêk amani dam,
36 Mi thu sukkhawlopek dam hi,
LALPAN a hmu naw am a ni?
37 LALPA thupek a ni naw chun,
Tu thu am hlawtling a ta?
38 Sietna le thil thra tlunghai hi,
Chunghnungtak baua inthoka
Suok vong a ni naw am a ni?
39 Suol leia hremna tuor hi,
Hringmi tu’m soisel thei ding?
40 Ei lam hrawhai bi chiengin,
LALPA tieng kir nawk ei tiu.
41 Ei lungril le ei kuthai hi,
Chung Pathien tieng phar suokin,
42 “Suol thawin kan lo hel a,
Nangin i mi ngaidam naw a.
43 Lungsennaa inthuomin,
Nangin i mi hnot thlŭr a,
Lungsietna nei dêr loin,
Dittawkin i mi suom tawl a.
44 Kan hnǐna tlung thei lo di’n.
Sûmin i’n tuom khum tlat a.
45 Hnamhai lai mi tirdak kai,
Hmunhnokah i mi siem a.
46 Kan hmĕlmahan dit tawkin,
An bau an mi phong khum a.
47 Thlaphângna le tlâkkhurhai,
Sietna le ramna kan tuor a.
48 Ka mihai siet tuok leiin,
Vadung tui anga tamin,
Ka mitthli a luong zoi zoi a.
49 Ka mitthli hi chât loin,
A la luong pei ding a nih,
50 Vana inthoka LALPAN,
A mi zuk en hmâ khat chun.
51 Jerusalem nuhai chan ding,
Ka hmuin ka lung a zing.
52 San boa mi hmêlmahan,
Vate angin an mi ve a.
53 A hringin khuorkhurûmah,
Thi dingin an mi pei a,
Lungin an mi dĕng mur mur.
54 Tuiin a mi chìm pil a,
Thi ngei dingin ka’n ngai a.
55 Khuorkhurûma inthokin,
LALPA, i hming ka lam a,
56 “Beidongin ka ko che hi,
I nâ mi sitpek hràm rawh”
Tia ka hung hnina chu,
I mi lo ngaithlakpĕk a,
57 Nang chun i mi hung hnai a,
“Tri naw rawh” i hung ti kha.
58 Ka chungthuah aw LALPA,
Nangma i hung inrol a,
Ka hringna i’n tlan suok kha.
59 Ka chunga thra naw taka,
An thaw danhai i hmu a,
Ka’n dikna mi humpek rawh!
60 An phuba lak tum dan le
An mi phier inthŭk dan khom,
Nang chun i hmu vong si a.
61 An mi biek sìsăwnahai,
An mi phierrukna po po,
Aw LALPA i hriet vong a-
62 Sŭnnithlaka hmêlmahan,
An mi hrilsietna zozai chu.
63 En ta, an thrung le ngir hi!
An mi nuisawna hla naw chu,
Khŭkpui dang hrim an nei nawh.
64 Aw LALPA, an phù ang le,
An kut sinthaw ang peiin,
Nangman thungrul tawl lem rawh.
65 An lungril sukmăwkpĕk la,
I trongsie phur raw hai se!
66 Lungsenin hnot thlûr tawl la,
LALPA van hnuoi a’nthok hin,
Anni chu sukbohmang rawh.