Lunginsiet hnina
5
1 Kan chunga thil tlunghai hi,Aw LALPA hung hre zing rawh.
En ta, kan muolphozie hi!
2 Kan rochung kan ram hluohai,
Hnam dangin an nei zo tah,
Kan inhai khom hmêl hriet loin.
3 Pa nei lo, fahra ang kan ni ta a,
Kan nuhai khom hmeithai ang.
4 Kan tuisik tlàn lai ngei khom,
Kan inchawk a ngai ta a,
Thing khom kan inchawk a ngai.
5 Mi hnottu’n an mi’n thlà nawh,
Chauin sawl hle inlang khom,
Kan chawl hadam thei si nawh.
6 Fak ding kan hmu theina din,
Aigupta le Asuria kan bêl a.
7 Kan pahaiin an lo thaw suol a,
Anni an um ta si naw a,
Keinin a maw kan tuor a nih.
8 Kan chungah bawi an inlal a,
An kuta mi san suok ding,
Tu khom hlak an um si nawh.
9 Thlalĕr ram hmun tritumah,
Kawlhnâm inlĕngna hmunah,
Thi huomin bu kan zong a.
10 Tràm khawsik mi not leiin,
Kan pang thuk angin a sa.
11 Zion-ah kan nuhmeihai,
Mihaiin an pawngsuol a,
Judai ram khaw tina hai,
Kan nunghakhai an pawngsuol.
12 Lal nauhai an khaihlum a,
Upahai khom an inzà nawh.
13 Bu rawtnaah tlangvalhai,
Bu herin an sor kăwng a,
Naupanghan kat trăng trângin,
An thing ti ding an phur a.
14 Kul kotkhar bula thrung hlak,
Upahai an zăm zo ta a,
Tlangval hla sak pawl khomin,
An hla sak an chawlsan tah.
15 Kan hlimna a chuoi zo a,
Kan làm lusûnah a’n chang.
16 Kan lallukhum khum a tla a,
Kan suol tlat bok si leiin,
Kan chung a va pik de aw!
17 Hieng lei hin kan lung a se a,
Kan mithai a’n thim zo tah.
18 Zion chu rausana umin,
Sihalhai tuolchaina a’n chang tah.
19 Aw LALPA, chatuon Lal i na,
I lalna chu suon tin dai a nih.
20 Ieng leia mi theinghil zing a,
Hi chen chen hi i mi maksan?
21 LALPA nangin mi siem tharin,
I kuomah mi thruoi kir rawh.
Tiena kan hlim lai ni ang khan,
Nangin mi tuoi thar nawk rawh-
22 Nangin mi hnâwl letdĕr a
Kan chunga i lungsenna kha,
Dam thei lo a ni ngot naw chun.