Jerusalem hremna
2
1 LALPAN Zion naunu chu,A lungsenna sùmpuiin,
A hung inkhum ta mup el!
Vàna inthokin hnuoiah,
Israel ropuina a pei thlak;
A lungsen sosang ni chun,
A ke nghatsan a hriet fuk nawh.
2 Jakob chĕngna hmun po po,
Lunginsietna nei dêr loin,
LALPAN a lem zo vong a,
Juda naunu kulpuihai,
Lungsenin a sukchim a.
Ramhai le an lalhai chu,
Hnuoi phǐtin a sukmuolpho.
3 Israel ki po po khom,
Lungsenin a tan vong a.
Hmêlmahai an hung hnaiin,
Anni chu a san nuom nawh.
A vêl kăng vong hlak mei angin,
A lungsenna chu Jakob chungah,
A hung chok tah puot puot a.
4 Hmêlma angin thalngul a kuoi,
A kut chang tiengin a tin zing;
An enchimlohai po po chu,
Hmêlma angin a that vong a,
Zion naunu puon in chungah,
A lungsenna mei a bun thlak.
5 LALPA chun hmêlma angin,
Israelhai a lem zo a,
An kul le an lal inhai,
Sukchimin a suksiet a,
Juda Naunu ta dingin,
Lusûn trapna a sukpung.
6 Huona bukthlâm ang elin,
An tempul a sukchim a,
Intuokna puon in suksein,
A kût le chawlnihai khom,
Zion a’n theinghiltir a,
Lal le thiempuhai khom chu,
A lungsenin a hnâwl vong.
7 LALPAN a maicham hnâwlin,
A biekbuk a rausan a.
A kul banghai inthriektirin,
Hmêlma kutah a pêk a;
Hlima an kŭtna hlak hmunah,
Hmêlma ri a so veng vung.
8 Zion Naunu kulpui chu,
LALPAN sukchim a tum a,
Sukchim chin ding a’n khi a,
A kut thlăk a na ngei el!
Kul chung zawl le banghaiin,
An siet tuok chu an sŭn a,
A ruolin an chim thla rem rum.
9 A kotkharhai a tlu zap a,
A kalna tluon a bong rem rum.
Lal le an mi lienhai chu,
Hnam dang salah an intang.
Dànhai an nei ta naw a,
LALPA inhriettirna khom,
A zawlneihan an dong ta nawh.
10 Zion Naunu upa ruol chu,
To troka saiip silin,
Hnuoiah an inthrung biel a,
Lu-ah pilvut an inphul a.
Jerusalem nunghakhai chu,
Bâwka hnuoi sikin an bokkhup.
11 Ka trapna ka mit an vai zo,
Ka sung ril a sa huoi huoi a;
Ka mihai siet tuok lai thlîr a,
Naupanghai le nautesenhai,
Chăua kotthlĕra an thidang lai,
Ka hmuin ka lainat ĕm êm a,
Ka thlarau a’n chek dar vong.
12 “Khaw lam bei le uoiin teh?”
Tiin an nuhai an indon a;
Hliem tuor thisûk baw angin,
Kotthlêrah an tlep thla a,
An nuhai ângsung ngeiah,
An nun a chat thla riei riei.
13 I ta di’n iem hril ka ta?
Ieng le’m ka tekhi ding che,
Aw nang Jerusalem Naunu?
Ka hnĕm theina ding chein,
Ieng am ka’n chansin ding che,
Aw Zion naunu thienglâm?
I hliemna inthukzie hi,
Tuipui li ril ang a na,
Tu’n am a sukdam ding che?
14 I zawlneihaiin inlàrna,
Tlâktlâi dĕr lo an hmu a,
I suolna tar lang lem hai sien,
Saltang pumpel thei khom i na,
Sienkhom khêl le inhlĕmna thu,
An inbă lem tlat si che kha.
15 A fe pĕl taphot chein,
An kut an ben khum che a,
Jerusalem naunu chu,
Nuisawa lu thin khumin,
“Hi khawpui hi an naw maw,
Hnuoia khaw mawi famkim le
Hlimna khuoa an hril chu?”
Tiin an ti-el hlak che.
16 I hmêlmahai po poin,
An bău an phong khum che a,
Nuisaw le ha rawt khumin,
“Ei lem zo dĕr an ta hi!
Hi ni ngei hi an naw maw,
Ei lo Tlumte thlir hlak kha?
Damin ei tong ta hi!” an tih.
17 Tiena a puong tah angin,
LALPAN a tum a thaw a,
A thu chu a hlen zo tah.
Lungsietna nei dêr loin,
Aman a kei thlak che a;
Hmêlma inuong khumtirin,
I dohai ki a chawisang.
18 Aw Zion Naunu kulpui,a
Lungrilin LALPA ko khêk ro,
In mitthli sŭn le zănin,
Vadung angin luong raw se.
Chawl loin trap zing unla,
In mit insîm naw raw se.
19 Zàn vèng intran a’nthokin,
Tho unla, khêk tran ve ro;
LALPA hmaah in lungril,
Tui angin bun suok unla,
In nauhai hringna ta di’n,
LALPA hmaah bân phar ro,
Kotthlêr tontir taphotah,
Phingtrâmin an tlep thla hi.
20 LALPA en la, dâwn ve rawh!
Hieng ang hrim hrim hin mi dang,
I soisak hrep hlak a ni?
Nuhaiin an rǐla ra,
An nau duot ngawi ngawi lai sa,
An fâk el ding am a ni?
Thiempu le zawlnei chen khom,
LALPA hmun thienghlim ngeiah,
Thatin an um el ding maw?
21 Naupang le a tar a zûr,
Kotthlêr pilvut lai an tlu a,
Ka nunghak tlangvalhai chu,
Kawlhnâmin an sàt thlùk a,
I lungsen ni’n i that a,
Lainatna hrim nei loin,
A sămin i săm tawl kha!
22 Kûta i ko khawm angin,
Sir tina min huol dingin,
Ka ràpzawnghai i ko khawm.
LALPA lungsenna ni chun,
Hima tlan suok an um nawh;
Ka mi duot le keitleihai,
Hmêlma’n an răwt ram zo tah.