LUSUN HLA
Jerusalem lungngaina
1
1 Kháng khopa khawpui lŭn kha,A va hang rè tah tlok tlok ngei!
Hnam tin ngaisang ni hlak kha,
Hmeithai angin a lo inchang tah!
Biel tin chunga lalnu ni hlak kha,
Mi salah a lo inchang tah ie!
2 Biengah mitthli luong zoi zoiin
Zănah a trap tlok tlok a;
A ngaizawnghai tu el khom,
Thlamuongtu an um ta nawh.
A ruolhaiin lêm ang derin,
Dorâl an lo inchang zo tah.
3 Salah an intàng Juda mihai,
Hrem le sor inrim an tuor;
Hnam danghai lai khawsain,
Sawl damna hmun an hmu nawh.
Anni hnottuhan nangchîngin,
Beidong takin an hnăw chĕp.
4 Zion lampui a thring zo a,
Kût hmanga hung an um ta nawh.
A kotkharhai chu ram zoin,
A thiempuhai an trap inrŭm.
A nunghakhai an beidong a,
A lairil a na vong vong.
5 A dotuhan an op khum a,
A hmĕlmahan nunkhuo an phăm;
A suolna a nasa ĕm leiin,
LALPAN a’n tuortir ta si.
A nauhai chu hmêlmahaiin,
Sala manin an thruoi hmang.
6 Zion naunu mawina chu,
Puon ang a lo chul zo ta a;
A hotuhai khom tlatna bo,
Sazuk ang an hung ni tah.
A hnottuhai hmaa chun,
Zoi nengin an tlanse a.
7 Rinum tuora an vai lai chun,
A ropui lai nihai dam kha,
Jerusalem chun a hriet suok a.
Hmêlman an hung làk lai khan,
Santu tu khom a nei nawh.
A chan sietzie chu hmêlmahan,
Hmuin an diriem hle a.
8 A suol nasat êm leiin,
Jerusalem khawpui chun,
Tirdakum a kai zo tah;
Ama ngaisangtuhaiin,
Saruoka an hang hmu chun,
An endong ta êm êm a;
Mi hmêl khom hmu ngam loin,
Naw tieng nghain a’n rŭm a.
9 A tirdakumnahai chu,
A puonbilah a kâi luoi a,
Thu hnung a dawn phàk ta nawh.
A tlăwm dàn a râpthlăk a,
Hnèmtu tu khom an um nawh.
“En ta, LALPA, ka tuorna hi,
Hmĕlma an dingchang ta si!”
10 A rosum nei po pohai chu,
Hmêlmahaiin an rok a,
I mihai pungkhawmnaa,
An thrang i phal ngai dĕr lo,
Pathien ringnawtuhai kha,
I hmun thienghlima an lŭt lăi,
Mit ngeiin a thlir vong vong.
11 A miha’n inrûm pumin,
Fak le dawn ding an zong a,
An hring theina ngaituoin,
An rosumhan bu an thleng.
“Mi zuk en ta, aw LALPA,
Mi hmusit ka kai tah hi!”
12 Nangni inlon velhai chun,
Iengma loah in ngai maw?
Ngha vêlin en chieng unla,
Hremna ka chunga hung tlung,
Ka tuor nêka nasa lem hi,
A um hlak hrim am a ni,
A lungsen inling ni a,
LALPA mi hremna tluk hi?
13 Ka rù sung hlieutu dingin,
Vana inthok mei a hung thlàk.
Ka awkna di’n châng a kam a,
A letlingin a mi khai a,
Inrieng taka mi maksanin,
Sŭnnithlakin thi hmun ka suol.
14 Ka suolnahai chu her thlopin,
Ka rîngkol dingin a siem a;
Ka ringah a hung innghat a,
LALPAN ka thâ a sukchău a,
Ka do hnè lo dinghai kutah,
Ama chun a mi’n hlàn ta si.
15 Kan pasalthrahai po hlak chu,
LALPAN a hnawl hmang vong a;
Ka vâl ruol râwt chimit dingin,
Mi beitu dingin râl a hung tir.
Săwrkhura grêp sir săwr angin,
Juda nunghak thienglâmhai chu,
LALPAN du tâwkin a sir săwr.
16 Chu lei chun a nih ka trap,
Ka mitthli a hul thei nawh.
Hnèma mi sukhartu ding,
Ka hnaiah mi an um nawh.
Ka nauhai an va’n rieng ngei,
Hmêlman an chungdel ta si!
17 Zion chun bân a phar a,
Sienkhom hnĕmtu an um nawh.
Jakob chu a vêla chènghai
LALPAN a’n hmĕlmăktir si.
An ta di’n Jerusalem chu,
Tirdakum a lo chang tah.
18 LALPA chu a’n dik vei leh,
A lakah ka lo hel ta si;
Mi po pohai en ta u,
Ka hang tuor nasat dan hi!
Ka nunghàk tlangvàlhai hlak,
Salah an intăng zo tah!
19 Ka’n thloppuihai ka ko a,
Sienkhom an mi’n phatsan tah.
An hringna san him tuma,
Fak ding bu an zong laiin,
Ka thiempu le upahai hlak,
Tuolah an tlu hlum zo tah.
20 Ka beidong dan ĕm ĕm hi,
Aw LALPA mi zuk en ta!
Ka sûng a sa huoi huoi a,
Ka lung a zing êm êm bok,
Ka hel hmang lei vong a nih.
Lusûnna sukpungtu dingin,
Tuolah kawlhnâm a hrâng a,
In sŭngah hripui a’n lĕng.
21 Mihan ka’n rûm ri an hriet,
Sienkhom hnĕmtu an um nawh.
Ka hmêlmahai po poin,
Ka beidongzie an hriet a,
I thilthaw an lawm a nih.
Keima ang an hung ni hun,
I tiem chu intlungtir rawh.
22 An rǐtlona po po chu,
I hmaah hung inlang sien la,
Ka bawsietnahai leia,
Ka chunga i thaw ang hin,
An chunga khom thaw ve rawh.
Ka’n rûmna zozai lei hin,
Ka lung a chău zo ta si.