ISAI
Thuhma
Isai lekhabu hi ei hmang lai Thuthlung Hlui Baibula bu 23-na, bung 66 le chang 1292-a sei, a ziektu Zawlnei Isai hminga a bu hming hi an ko a nih. Kum 790-700 B.C vel inkara ziek a nih. A lekhabu hi thruong thuma thrè thei a nih:
1. Bung 1-39 chen hi Judai lalram chu anni nêka hrat lem an tuolbawm Asuria ramin nasa taka a nĕk chĕp laia thil tlunghai thu a nih. Isai hmu dan chun, an hmelma Asuria neka an ta dinga trium lem chu Pathien an ring zo nawna, a laka an suolna le bawsietna a nih. Chuleiin, sietna an chunga a tlung nawna dingin Pathien thu zawm ding le indik taka rorêlna kengkaw dingin rorêltuhai le mipuihai chu a’n fui a nih. Chun, khawvela muongna le inremna hung tlung ding le Davida thlaa inthokin duthusama thra le fel lal a la hung suok ding thu a hril lawk bok a, chu chu Mesia, Isu Krista hung inlang ding thu a lo puong lawknaah kristienhai chun an pom.
2. Bung 40-55 sunga beisei ding um lo khopa Babulon rama Israel thlahai sala an intàng laia nĕksawrna an tuok chanchin dam, an Pathienin a mihai chu a la san suok dingzie le Jerusalem tieng a thruoi kir nawk dingzie dam le Israel hnam chu hnam tinhai ta dinga malsawmna an la hung ni dingzie thu hrilna dam a chuong.
3. Bung 56-66 po hi Jerusalema kir nawkhai kuoma thucha, Pathienin a thu tiem a hlen ngei dingzie thu dam, indik taka rorêl dam, Sabat inser dam, hlanbiekna inhlan le trongtrai ngai poimaw a trulzie dam hrilna a nih. Bung 61.1-2 hi Isun rong a bawl tran khan a hung san hril fiena dingin a hmang hiel a nih.
Thuthlung Hlui bu po poa Isu Krista hung ding hlimthla inlang rawnna tak chu Isai lekhabu hi a ni ring a um. Chun, thu thupa hril le thu inzom naw tak tak hril kop a tam leiin, a hun laia hieng lai ram ngirhmun iemani chen hriet fie naw chun hriet thiem el thei lo ding thu a tam bok.
A thu tlangpuihai:
Hril lawkna le thu tiemhai (1:1-12:6)
Hnamhai hremna chungthu (13:1-23:18)
Khawvel chunga Pathien rorelna (24:1-27:13)
Hril lawkna le thu tiem danghai (28:1-35:10)
Juda lal Hezekia le Asuriahai (36:1-39:8)
Thu tiemna le beiseina thuchahai (40:1-55:13)
Hril lawkna le thu tiemhai (56:1-66:24)