Babulon chunga phuba
51
1 LALPA chun hieng hin a tih:Ngai ta, Babulon chunga le
Leb Kamaia mihai chunga chun,
Thlisie ka tir ding a nih.
2 Babulon chu sêp fai ding le
A ram sukse vong dingin,
Ram dang mi hung tir ka tih.
A siet ni a tlung pha chun,
Sîr tinah inhuol an tih.
3 Thal kaptuin a thalngul,
Kuoina hman nei naw ni a,
Thir zakuo hâk hman naw nih.
A thralaihai hlà nei dĕr naw la,
A sipaihai râwt chimit rawh.
4 Kaldai mihai that treu an ta,
Kotthlêrah inthal phung an tih.
5 Israel Mi Thienghlim hmaah,
A ram chu suolin sip sien khom,
Pathien, Iengkim LALPA chun,
Israel le Judahai ruok chu,
A maksan tawl ngai si nawh.
6 “Babulon chu tlànsan ro,
In hringna hum di’n tlân ro!
A suolna thi phà naw ro.
LALPA thungrul hun a na,
A phu ang tak hmung a tih.
7 Babulon chu LALPA kuta
Rangkachak no ang a na,
Chu chun hnuoi pum a’n ruitir a;
Hnamhan a uoiin an dawn a,
An inhâi hmuol vong a nih.
8 Babulon tlu dar thut a tih.
Ama chu trà rak rak ro!
A hung dam thei takduoiin,
Thinghnăi damdawiin zût ro.
9 Babulon sukdam ka tum a,
Sienkhom a dam thei si nawh;
Chuleiin, mani ram sengah,
Ama chu maksan ei tiu.
A thiem nawna’n vàn a tong a,
Vàn sânga sûm a hang tong.
10 LALPA chun a mi’n thiem tah.
LALPA ei Pathien thilthaw hi,
Thaw ro, Zion-ah puong ei tiu.
11 Thalhai chu tât ngei unla,
In phawhai chu chawi seng ro!
Babulon suksetu dingin,
Media lalhai lungril chu,
LALPAN a chok tho a nih.
LALPAN phuba la’ng a tih,
A tempul phuba ngei chu.
12 Babulon kul bang ep-a chun,
In puonzar chu khai unla,
Vêngtu tam lem sie unla,
Enthlatu sie bok unla,
Lambun dingin inring ro!
Babulon mihai chunga,
LALPAN thaw a tumhai chu,
A hung hlen suok ding a nih.
13 Nang tui tam tak laia chêng,
Sum le pai hau êm êmtu,
I tawpna chu a tlung tah,
I nun hrui săt chat ni chu.
14 Iengkim LALPA chun mani,
Hming sâlin thu a’n khàm a:
Khau hon anga tam mipuiin,
Hung chìm sip an ti che a,
Hlado insam khum an ti che.
15 A theinain hnuoi a siem a,
A varnain khawvel a’n din a,
A remhrietnain van a zar a.
16 A rawl a hung insuo pha,
Vana tui an ri dur dur a;
Kawl kilah sûm a’n suoktir a,
Ruo a sûr a, kawl a’n lep a,
Thli chu a bawma inthokin,
A hung insuo hum hum a.
17 Mi tin chu an chawlol a,
Hrietna hrim an nei naw a,
Rangkachak sertuhai chu,
An milim serin a sukzak a,
An milimhai chu thuok nei lo,
Inhlemna thil mei mei an nih.
18 Tlaktlaina an nei naw a,
Mi nuizatbûr vong an na,
An chungthu rĕl a ni pha,
An la bohmang ding a nih.
19 Jakob Chanvo ve ruok chu,
Chuong ang chu a ni ve nawh.
Thil iengkim Siemtu a nih,
A rohluotu hnam chenin;
A hming chu Iengkim LALPA.
LALPA hembawk
20 Raldonaa ka hembawk,
Ka hriemhrei chu nang i nih:
Hnamhai le lalramhai chu,
Nangma hmangin ka sukdar a,
21 Sakor le a chung chuonghai,
Tawlailir le a khaltuhai chu,
Nangma hmangin ka phìn dar.
22 A nuhmei a pasalin,
Putar le tleirawlhai dam,
Nunghak le tlangvalhai dam,
Nang le chu ka ngam vong a,
23 Berampu le ran ruolhai,
Loneitu le bawngchalhai,
Ram optu le thoktuhai,
Nang le chu ka thuhnê vong.
Babulon hremna
24 “Babulon le Kaldai mihaiin,
I mithmu ngeia Zion chunga
Thil thra lo an thaw po po chu
Ka thungrul ngei ding a nih,”
Ti hi LALPA thu suok a nih.
25 “Aw nang suksetu tlâng lien,
Khawvel po po suksetu,
Ka khing che a nih” ti hi,
LALPA thu suok chu a nih.
“I chungah kut thlâk ka ta,
Răwlah inhlum ka ti che a,
Tlang kâng hawpah siem ka ti che.
26 In kila a lungphŭm dingin,
I lung làk ni ngai naw ni a,
Inthruta rem ding khomin,
I lung la ngai naw ni hai a,
Kumkhuon rausan ning i tih”
Ti hi LALPA thu suok a nih.
27 “A ramah puonzâr khâi la,
Hnamhai lai tawtawrawt mûtin,
Ama do ding hnamhai buotsai la,
Ararat le Minni le Askenaz
Ramhai hi inpung khawm la,
An kawmandar ding ruot la,
Khau hon anga tam sakor,
Anni bei dingin tir rawh.
28 A do ding hnamhai buotsai la,
Media lalhai, ram optuhai,
Thoktuhai le an ram ophai leh.
29 Ram chu na tuorin a’n thin a,
Babulon sukram dĕr a,
Hluotu nei ta loa siem chu,
LALPA hlen tum chu a nih.
30 Babulon râlhrâthai chun,
An raldo lai chu an băng a,
Kulpui sungah an intom a,
An pachangna a hung rè a,
Thaiduopah an inchang zo a;
An inhai a kàng dur dur a,
Kotpui kalnahai a tliek a.
31 Khawpui po po an làk thu,
Babulon lal hril dingin,
Zuolko an tlàn zûr zut a,
Tirhai chu an insùlpel zut zut.
32 Vadung kâihai an làk a,
Phairuong bil chu an raw a,
Sipaihai an zàm zo tah.
33 Iengkim LALPA,
Israel Pathienin hieng hin a tih:
“Babulon naunu chan chun,
Hrizawla bu chìl lai a ang!
Bu anga an chìl hrep hun chu,
A hung tlung ding a ni si a.
34 “Babulon lal Nebukadnezzarin,
Mi lemin a mi se nawi a,
Bêl angin a mi bun ruok a,
Ka sa inhnik a tizawng po,
Rûlpui angin a dol thlăk a,
A phingpui a sukkhop a,
Chu zoah a mi luok suok a.
35 Zion tlanga chênghai chun,
‘Kan chunga a thaw angin,
Babulon chunga khom tlung sien,
Soisakna tuor ve raw se’ ti sien,
Jerusalema chênghai khomin,
‘Kan thisen maw po po chu,
A chungah tla vong raw se” ti sien.
36 Chuleiin, LALPAN hi hi a hril:
“Ngai ta, nangma tran ka ti che a,
I phuba khom lapêk ka ti che;
A tuipui sukkang vong ka ta,
A tuikhur khom sukkang ka tih.
37 Babulon chu tlu ram a ta,
Sihalhai tuol lengna hmun,
Mi makti le inchek khum,
Tu khom an cheng nawna hmun,
Ka la’n changtir ding a nih.
38 Sakeibaknei vang lai angin,
A mihai an inhùk dum dum a,
Sakeibaknei tehruoi angin,
Mi an inngur khum hlak a.
39 An inrăwp zuol lai takin,
An ruoi ding buotsai ka ta,
Khuo hre loin hrâi rui ka ta,
Hlimin innui khêk an ta,
Chu zoah tho ta lo dingin,
Kumkhuoin in ta’ng an tih”
Ti hi LALPA thu suok a nih.
40 “That ding beramte angin,
Beramchal le kelchal angin,
Anni chu thruoi hmang ka tih.”
Babulon chan ding
41 Khawvel uongpui Sesakb chu,
An la man ruou ding a na,
Babulon chu hnam tin lai,
Mi pangzat hung kai a tih.
42 Babulon chungah tui lien a ta,
Tui fawn sangin chim pil a tih.
43 A khawpuihai chu rausan khuo,
Thlaler ram trawl, mi cheng nawna,
Khuolzin tu khom sir lona hmun,
Hung inchang vong tang a tih.
44 Babulona Bel chu hrem ka ta,
A lo dol tah hai po po khom,
Inluok suoktir nawk ka tih.
Hnamhan hung bĕl ta naw ni a,
Babulon kul bang chu chim a tih.
45 “Ka mihai, hung suoksan ro!
Hringna hum di’n tlân suok ro!
LALPA lungsenna trium lakah,
Insanhim din tlân suok ro.
46 Thuthang a hung inlĕng pha,
Zâm naw unla, tri bok naw ro.
Tu kum thuthang lo hrieng in ta,
Kum nawk thuthang hre bok in tih,
A ramah inpawngnêkna thu,
Lal le lalhai insuol ri a’n thang.
47 Babulona an milimhai,
Ka hrem ni la tlung ngei a ta,
A ram pumin muolpho a ta,
Mi ka sukhlumhai po po chu,
A bulah tlu phung an tih.
48 Hmar tieng panga inthokin,
Suksetuhan hung rûn an ta,
Hnuoi le van le a sunga mihan,
Babulon siet tuok lawm an tih”
Ti hi LALPA thu suok a nih.
49 Israelhai a that treuh leiin,
Babulon chu tlu ngei a tih,
Khawvel puma mi tam tak,
Thina intluntu a ni si a.
Babulona um Israelhai kuoma thucha
50 Nangni kawlhnâm pumpeltuhai,
Muongchang loin tlan suok ro!
Ram hla taka inthok khomin,
LALPA chu hre zing unla,
Jerusalem theinghil naw ro.
51 “LALPA in, hmun thienghlimah,
Ram dang mi an lŭt leiin,
Kan muolphona chunga chun,
Inzakin kan hmai a mâwk.”
52 “Sienkhom a ram pumpuia,
An milimhai ka hrem ni chu,
A la hung tlung ding a na,
Hliem tuorin inrûm an tih,”
Ti hi LALPA thu suok a nih.
53 Babulon chun vàn tongin,
A kulhai suknghet sien khom,
Suksetu ding hung tir ka tih”
Ti hi LALPA thu suok a nih.
Babulon siet ding thu
54 Babulona inthoka trap ri,
Kaldai ramin sietna rapthlak,
A tuok ri chu ngaithla ro.
55 LALPAN Babulon sukmit a ta,
A vaupŭm ri na tak chu,
A hung hmet dei ding a nih.
Tuipui fawn insok angin,
Hmêlma lungsen sosâng a ta,
An ri chun thangkhawk a tih.
56 Suksetu chun Babulon,
A hung bei ngei ding a na,
Pasalthrahai man a ta,
An thlahai suktliek a tih.
Thungrultu LALPA Pathien a na,
La thungrul ngei ngei a tih.
57 A hotuhai le a mi varhai,
Optuhai le thrangpuituhai,
An pasalthrahai khom chu,
An rêngin hrâi rui ka ta,
In song an ta, har ta naw ni hai”
Tiin Laltak chun a hril a,
A hming chu Iengkim LALPA a nih.
58 “Babulon kul sà tak chu,
A la tlu hmât ding a na,
A kotkhar insanghai khom,
A la kàng hmang ding a nih;
Hmang loin mipuihai chu,
An insuksawl mei mei a,
An hnam sininrimna chu,
Meia ti ding chauh a nih”
Iengkim LALPA chun a tih.
59 Hi hi Juda lal Zedekia inlala inthoka kum linaa Babulon tienga Zedekia le fe ve Seraia kuoma zawlnei Jeremia-in thucha a pek chu a nih. Seraia chu lal in enkoltu lû tak a na, a pa chu Maseia naupa Neria a nih. 60 Jeremia chun Babulon chunga sietna hung tlung ding po po chu lekha zielah inchikin a ziek thlak vong a. 61 Ama chun Seraia kuomah, “Babulon i tlung pha leh hieng thuhai po po hi tiem ngei la, 62 ‘Aw LALPA, hi hmun hi kumkhuoa mi le sa chĕng ta lona dinga i sukram ding thu chu i lo hril tah hi’ ti rawh. 63 Chun, hi lekha ziel hi i tiem zo pha lungtum leh khit de la, Eufretis vadungah pei la, 64 ‘Babulon chu hieng ang hin a mi chenghai leh la pil a ta, a chunga sietna ka hung intlun ding lei chun tho nawk ta ngai naw nih’ tiin i hril ding a nih” a ta.
Hi po hi Jeremia thu chu a nih.