LALPA thungrulna le intlanna
63
1 Edom rama inthoka hung,Bozra khuoa inthoka mi,
Thuom sen hâk saw tu’m a na?
Lal thuom mawi tak inbel a,
Hrât taka hung saw tu’m a na?
“Keima, indik taka thu hril hlak,
Ropui taka sandamtu ka nih.”
2 Iengti leia i thuom khom chu,
Grep sawrna khura thokhai anga,
A sen hnêng hnuong am a na?
3 “Keima chauin hnam danghai,
Grep ra angin ka sir sawr a,
Mi dang tu khom an thrang nawh.
Lungsenin ka sir sop tawl a,
Ka lung chokin ka chîl rak a,
An thisenin a mi chik khum a,
Ka thuomah a kâi a nih.
4 Phuba ka lak ni ding chu,
Ka lungrilah a um zing a,
Ka mihai intlanna dinga,
Ka kum ruot a tlung ta si.
5 Thrangpuitu an nei am tiin,
Ka hei ngha vel ruoia chu,
Mi tu khom an hung si nawh.
Santu an nei hlol naw el chu,
Mak khom ka ti ĕm êm a.
Chuleiin sandamna chu,
Ka kut ngeiin ka hlen suok a,
Ka lung chokin a mi sukthatho.
6 Ka lung chokin hnamhai chu,
Sukruiin ka sir sop neng a,
Hnuoiah an thisen a luong.”
Inpâkna le trongtraina
7 LALPA ngilneizie hril ka tih,
Ka ta dinga a thilthawhai dam,
A lungsietna le ngilneina zara,
Israel sungkaw ta dinga thil thra,
A thawpek zozai hai dam leiin,
Ama chu inpâkin hla sak ka tih.
8 LALPAN, “Ka mihai ngei an na,
Mi hlĕmtu nau an ni nawh” a ta,
Anni sandamtuah a thrang a,
9 An lungzingna a lungzingpui a,
An beidong ni po poah,
A vantirkohai chu hmangin,
Anni chu a san suok a,
A hmangaina le zangainain,
Anni chu a’n tlan suok a,
Tiena tlanga inthok ta khan,
Nau ang pomin a puok khai hlak.
10 Chuong sa khom chun an hel a,
A Thlarau Thienghlim an suknuor.
Chu lei chun a lungril thlâkin,
An hmèlmaah a thrang a,
Anni chu a do lĕt tah a nih.
11 Chu phing leh a mihai chun,
Mosie hun laia thil tlung tahai,
Tien lai thilhai chu an sui kir a,
“An ran ruolhai le vêngtu po po,
Tuipui a’nthoka thruoi suoktu kha,
Khaw lai am a um ta le?
Anni laia a Thlarau Thienghlim,
Sietu kha khaw lam a um ta a?
12 Mosie bàn chang tienga thrang,
Bân mak le hrât hung tirtu kha,
Kumkhaw hrilfàk tling hiel khop,
An hmaa tui vaw tantu kha,
13 Li ril inhraw thlengtirtu,
Hmun rema sakor thruoi anga,
Insui thlu loa inkântirtu kha,
Khaw lai am a um ta le? an ta.
14 Phaizawla ran tla diel diel angin,
LALPA Thlarauin inchawltirin,
A hming sukropuina dingin,
A mihai chu a thruoi hlak si.
Lunginsietna le thrangpui hnina
15 I hmun thienghlim le ropui,
I chĕngna van sanga inthok khan,
Juong thlìrin mi zuk en ta;
I thrahnemngaina le hratna kha,
Khaw lai am a um zo ta a?
I mi’n voina le lainatna kha,
Kan lakah i lâk kîr vong an ta?
16 Nang chu kan Pa i nih;
Abrahamin a mi hriet phak nawh,
Israelin a mi hmu phâk bok nawh.
Aw LALPA, nang chu kan Pa i na,
Tiena inthokin i hming hi,
Kan Tlantu a ni kumkhuo.
17 Aw LALPA, i lampui a’nthok,
Ieng dinga i min vak hmangtir?
Ieng dinga nangma tri lo dinga,
Kan lungril i sukngar hlak am?
I siehlaw, i rochan hnamhai leiin,
Hung ngha kîr hràm raw khai!
18 I hmun thienghlim hi i mihan,
Tawite chauh an hluo hman a,
Hmêlmahan i hmun thienghlim,
An chǐl siet zo an ta hi.
19 Tiena inthoka i tâ kan na,
Sienkhom kan lal ni ngai lo,
I hming put ngai lohai ang el,
Kan lo inchang zo ta si a.