Zion hming thar
62
1 A felna zingkhuo anga var a,A sandamna chu meiser anga,
A hung var suok hmâ khat chun,
Zion leiin to naw’ng ka ta,
Jerusalem leiin to naw ning.
2 Hnam tinin i felzie hmu’ng an ta,
Lalhan i ropuizie hmu’ng an tih.
LALPA ngeiin i hming thar ding,
A la sakpek ding chè a nih.
3 LALPA ta din lallukhum mawi,
Pathien ropuina lukhum ni’ng i tih.
4 ‘Màk hnung’ tia ko ta loin,
‘Ditlai’ tiin ko ta’ng an ti che a,
I ram chu ‘Rausan ram’ ti ta loin,
‘Pomlai’ tiin ko lem ta’ng an tih.
I chungah LALPA lawm a ta,
I ram ta din a pasal ni’ng a tih.
5 Tlangvalin nunghak a nei angin,
I nauhaiin hluo’ng an ti che a,
Moneituin mo a lawm angin,
I Pathienin lawm ta’ng a ti che.
6 Aw Jerusalem, i kul chungah,
Ralvêngtuhai ka sie a,
Sŭn le zăn ieng lai khomin,
An ri chu rè ngai naw nih.
Nangni LALPA kotuhai,
Chawl loin ko zing hlak ro,
7 Jerusalem hung tungding a,
Hnam tin inpak tlak dinga,
Siem det a ni hmâ khat chun,
Chawl loin LALPA chu ko ro.
8 A kut chang tieng le bân hrâtin,
LALPA chun thu a’n khàm a:
“Ienglai khomin in bu tharsuok,
Hmêlma fak di’n pe ta naw ning,
Hnam dangin in uoiin thar suok,
Dawn zopek ta naw ni chêu.
9 Bu siktuha’n an bu fa ta’ng an ta,
LALPA chu inpâk an tih;
Grep ra lotuhai khomin,
Ka in thienghlim tuolzawlah,
An uoiin dawn ta’ng an tih” tiin.
10 Fe suok ro, fe suok ro,
Ka mihai ta di’n lam siem ro;
Sung pawng ro, lamlien siem ro,
Lunghai inthiel fai unla,
Hnam puonzar chu khai kâng ro.
11 LALPAN hnuoi kil tawp chenin,
Hi thu hi a puong dar a:
“Zion naunu kuoma chun,
‘En ta, i Sandamtu a hung!
A san suokhai a hung thruoi a,
A’n tlan suokhai a hung som.
12 Anni chu ‘Mi thienghlimhai,
LALPA tlanhai’ ti’ng an tih.
Nang khom ‘Khawpui Ditum,
Hnawl lo khawpui’ ti’ng an ti che.