61
1 LALPA lungawi kumLALPA Pathien thlarau chu,
Ka chunga hin a um a,
LALPAN hriek a mi năl a,
Riengvaihai kuoma chanchin thra,
Hril dingin a mi tir a nih:
Lungril koihai tuom hlawm a,
Saltanghai suok ding thu hril a,
Rip thima intânghai kuomah,
Insuo an ni ding thu puong a,
2 LALPA lungawi kum thu puong a,
Pathien phuba lak hun thu hril a,
Lungngaihai chu thlamuong a,
3 Zion-a lusunhai chu hnĕm a,
Vuta inbuolhai chu incheitir a,
Lusunhai chu hlimna hriek nàl a,
Thlarau nguia muchukhai chu,
Inpakna hla insaktir lem dingin,
Ama chun a mi tir a nih;
A ropuina tar langtu dinga
LALPA phun, ‘Felna saisaw thing’
An ni thu hriltu ding ka nih.
4 “Hmun hlui tlu ram tahai chu,
A tharin rem nawk an ta,
Hmun rausan ta hnunghai chu,
Hung indin thar nawk an ta,
Thrang tam lo tlu se ta hnung,
Khuohai chu bawl thar an tih.
5 In ran ruol vengtuhai chu,
Ram dang mi ni ta’ng an ta,
In leilet le grep huona hai,
Ram dang mi sor ta’ng in tih.
6 Nangni chu ‘LALPA thiempu,’
Tia ko ni ta’ng in ta,
‘Ei Pathien rongbawltuhai’
Tia ko ni bok in tih.
Hnam danghai nei tlàn in ta,
An nei chu uongpui in tih.
7 An muolpho aiah chan lêt hni,
Ka miha’n chang ta’ng an ta,
An inzak aiah hlim takin,
An chanvo rochung an ta,
An ram let hni hluong an ta,
Kumkhuoin hlim ta’ng an tih.
8 Kei hi LALPA chu ka na,
Rorelna fel ka ngaina a,
Inrok le khawhlonahai,
Ka theida êm êm a nih.
Anni chu ringum takin,
An lawmman ding pe’ng ka ta,
Chatuon thuthlung thlungpui ka tih.
9 An thlahai chu hnam tin lai,
Mi hriet lar hung ni’ng an ta,
An thla sawng peihai khom chun,
Mi hriet hung hlaw pei an tih.
Anni hmutu taphotin,
‘LALPA malsawmhai an nih’
Tiin hung namnghet an tih.
10 LALPA-ah ka lawm hle a,
Pathienah ka thlarau a hlim.
Moneituin thiempu anga,
Chêng lûra lu a kawm ang le,
Moin thuom mawi a’n bel angin,
Sandamna silfen mi’n belin,
Felna korfuol a mi’n haktir.
11 Leilungin thil introtir a,
Huon thlai a’n thranglien ang hin,
LALPA ei Pathien ngei chun,
Felna le inpaknahai chu,
Hnam tin lai introtir a tih.