Zion ropuina
60
1 “Tho la, i êng insuo rawh,I var chu a hung tlung ta a,
LALPA ropuina i chungah,
A hung èng suok tah a ni hi.
2 En ta, thimin hnuoi inkhumin,
Thim sain mipui a tuom a,
Nisienlakhom, i chungah,
LALPA èng a hung suok a,
A ropuinan a’n khum che.
3 Hnamha’n i êng pan an ta,
I hung var suokna tieng chu,
Lalhai khomin pan an tih.
4 “Ngha vêlin hang thlîr vêl la,
An rênga inhûi khawmin,
I kuom tieng an hung pan ie.
Ram hla taka inthokin,
I naupahai an hung a,
I naunuhai an hung thruoi.
5 Chu huna chun i hmêl chu,
Hlimin hung êng suok a ta,
Um ngaina hre lo khopin,
Hlimnain sip tang a tih.
Tuifinrieta sumdawnghaiin,
Hausakna hung phur an ta,
Hnam tinhai hausakna chu,
I kuomah hung lùt a tih.
6 I ramah sanghawngsei ruol,
Midian le Efaa inthoka mi,
Sanghawngsei tuoihai le chun,
Hmun tinah tla khâwm an ta,
Seba rama inthokin,
Rangkachak le rimtui phurin,
Hung pan duol duol an ti che a,
LALPA inpakna thu puong an tih.
7 Kedarhaia ran ruol po po khom,
I kuomah hung thruoi an ta,
Nebaiotb beramchalhai khom,
Ka maichama hlànbiekna dingin,
Pumraw thilhlânah hmang i ta,
Chuonghai chu pom ning an ta,
Ka Tempul chawimawi ka tih.
8 “Sûm anga intawl duol duol,
Mani buzawl tieng seng pana,
Vathru ruol anga vuong saw,
Tuhai am an ni ta leh?
9 Thlierkar hla taka inthoka,
Israel thlahai hung phurtu,
Tarsis long ruol an ni saw!
Israelhai Mi Thienghlim,
LALPA in Pathien ropuina di’n,
An rangkachak le tangkaruo leh,
An hung phur tawl a ni saw.
Ama chun ropui takin,
A thuom mawi cheu a ni hih.
10 “I kul bang chim tah hai chu,
Ram dang mihan rem nawk an ta,
An lalhan i rong bawl an tih.
Lungsenin ka vuok chea chu,
Ditsakin lunginsiet tang ka ti che.
11 I kul kotkharhai chu sŭn-zănin,
Khâr loin inhong ta’ng a ta,
Hnam tin lalhan an rosumhai,
Hung tol lut zut zut an ta,
An lalhan hung zui lut an tih.
12 Tu khom i rong bawl nuom lo,
Ram le hnamhai hrim hrim chu
Se-in bohmang letdèr an tih.
13 “Lebanon tlang sukropuitu,
Far thing chi hrang hrang hai chu,
Ka hmun thienghlim cheina di’n,
Hung tol thla hum hum an tih,
Ka ke innghatna hmun ngei chu,
Ka sukropui ding a ni si a.
14 Nêksawrtu cheu thlâhai chu,
I hmaah hung bokkhup an ta,
A hmusittu che po po khom,
I ke bulah hung bokkhup an ta,
‘Israel Mi Thienghlim Zion,
LALPA Khawpui’ ting an ti che.
15 “Rausan le theida changin,
Tu sir hlaw lo ni la khom,
Kumkhawa khawpui suongum,
Suon tin lawmah siem ka ti che.
16 Hnam tin nenetui tlàn i ta,
Lalhai nenetui dawn i tih.
Chu hun a hung tlung pha chun,
Kei LALPA hi, i Sandamtu,
Tlantu le Jakob Mi Thienghlim,
Ka nizie hung hre tang i tih.
17 Dâr aiah rangkachak pein,
Thîr aiah tangkaruo pein,
Thing aiah dâr thîr pe lemin,
Lung aiah thîr peng ka ti che.
Thlamuongna chu inlal a ta,
Felna chun ro rêl tang a tih.
18 Inpawngnêkna ri hrim hrim,
A ramah hriet ni ta naw nih.
Răuna le sietna ri hrim hrim,
A ramah hriet ni bok naw nih.
In kul hming chu ‘Sandamna’
Kotkhàr hming chu ‘Inpâkna’
Tiin ko ta lem in tih.
19 Sŭna nangma êntu dingin,
Ni khi hmang ta nawng i ta,
Thla var ngai ta nawng i ta,
LALPA chu kumkhawtluonga,
I var hung ni tang a ta,
Pathien chu kumkhawtluonga,
I ropuina ning a tih.
20 I nisa chu tla ta naw ni a,
I thlà mang ta bok naw nih.
LALPA chu kumkhawtluonga,
I var hung ni tang a ta,
I lungngaina nihai chu,
Kumkhuoin tawp tang a tih.
21 Chu pha chun i mihai chu,
Mi fel ni vong tang an ta,
A ram chu kumkhawtluongin,
An hluo song ta ding a nih.
Ka mawina tar lang dinga,
A zung inder ka phun an na,
Ka kutsuok lieu lieu an nih.
22 Nangni laia tlawm tak khom,
A sângin la hung pung a ta,
In laia hnam chin tak khom,
Hnam ropui la ning a tih.
Kei hi LALPA chu ka na,
Hienghai hi a hun takah,
Inrang takin hlen ka tih.