Zawlneiin mihai suolna a phor
59
1 Sansuokna din LALPA kut chu,A tawi taluo teu naw a,
A nâ khom a sêt bok nawh.
2 Sienkhom in khawlonain,
LALPA leh a kei thrè chêu a,
Insuolnain a hmêl chu,
Hmu thei loin a hlie a,
A rawl khom in hriet thei nawh.
3 In kutah thisen a kâi a,
In kut părhai po po khom,
Khawlonain a sukporchè a;
In hmŭrin khêl a hril a,
In leiin rîtlona a sâk suok.
4 Thudik zong in um naw a,
In chungthu khom indik takin,
Tu khomin in hril ngai nawh.
Thu hmang loin in insĕl a,
Thukhêl ngot in inhril tuo a,
Buoina nâuin in von a,
Khawhlona in hring suok a.
5 Rûlngân tui in op kĕu a,
Aiumril puon in khawng a,
An tui fatuhai chu an thi a,
A koia chun rûl dang an pieng a.
6 Aiumril puon chu puon dinga
Hmang tlak hrim a ni naw a,
An puon khawng chu silfĕna,
Inbel thei chi a ni nawh.a
An thilthawhai hrim hrim chu,
Khawlona thil vong a na,
Râwng takin kut an thlăk hlak.
7 Suol thaw din an ngal a hrât a,
Poi tawk lo thisen insuo chu,
An kut inrangna zawng a nih.
Thil suol ngot an ngaituo a,
Ràuna le sietnahaiin,
An lam tin chu a sip a.
8 Muongna lam an hriet naw a,
An lam hraw taphota chun,
Indikna a um ngai nawh.
A kawitan ngot an zong a,
Anni le fe tu el khomin,
Thlamuongna an hmu ngai nawh.
Mipuiin suol an inpuong
9 Rorêlna indik chu kan hlat a,
Felnain a mi tlung phak nawh;
Var chu zongin kan nghăk a,
Sienkhom thimnan a mi chǐm a,
Êng zongin kan inmai a,
Thim sa mup vong a ni si.
10 Mitdel anga bang chel bâtin,
Kan inmai kan inmai hlak a,
Mit bo mihriem ang kan nih.
Thimbut angin sŭnchanga khom,
Kan insui khut khut hlak a.
Mi hrâthai le tèkhi ding chun,
Mithi ruong ang chauh kan nih.
11 Savom angin kan inhŭk a,
Vathru angin kan inkŭrukuk a.
Rorêlna indik kan nghak a,
Sienkhom a um dèr si naw a,
Sansuoktu ding kan nghak a,
Sienkhom a hla hlê bok si.
12 Kan bawsietna a tam a,
I mithmuah a’n tieng hnŭr a,
Kan suolnahan an mi hĕk a,
Kan bawsietnahai hlak chun,
An mi chĕngchil zing bok si.
13 Kan khawhlonahai kan hriet:
Inphatsan le helsanin,
LALPA chu kan hnung nghat a,
Nêksawr ding le hel dinga
Infui por hlaktu kan ni a,
Kan lungrila kan lo păi rùk,
Khêl thu ngot kan săk suok hlak.
14 Rorêltu thra kan hnot hmang a,
Felna chu hla takah a ngîr a,
Thutak chu kotthlêrah a tlu a,
Indikna a lût thei ta nawh.
15 A nih, thutak an leng ta naw a,
Thil thra naw hnawltuhai chu,
Sa anga pêlin an um pei.
Chu chu LALPAN a hmu zing a,
Indikna a bo tah lei chun,
A lung a awi thei ta nawh.
LALPA sansuokna
16 Mi indik a hmu dĕr nawh,
Hrilpuitu khom an um nawh.
Mak a ti ĕm êm leiin,
Ama bân thâ ngei hmangin,
Sandamna a siempek a,
Ama felnan a hum a,
17 Felna awmphaw chu hâkin,
Sandamna lukhum khumin,
Phuba lâkna silfĕn inbelin,
Thrahnemngaina korfuol chun,
Ama chu a’n zem khum a.
18 An thilthaw dungzui peiin,
Ama chun thungrul a ta,
Hmêlma chungah a lungsenna,
Dotu chungah a thungrulna,
Ama chun intlâktir a ta,
Thlierkarhai khom thungrul a tih.
19 Khawthlang tienga chênghaiin,
LALPA hming trì ta’ng an ta,
Khawsak tienga chênghaiin,
A ropuina inza ta’ng an tih.
LALPA thuoka a mùt luong,
Tui lien sang hung ang elin,
A hung inthok ding a ni si a.
20 Zion tlanga Jakob thlahai,
Mani suol simhai kuoma chun,
Tlantu a hung ding a ni si a”
Tiin LALPA chun a puong.
21 LALPA chun hieng hin a hril a, “Hi hi anni le inkara keima thuthlung chu a nih: Nangmaa um ka Thlarau le i băua ka sie ka thuhai hin, tuta inthok le chatuon chenin, i bau suoksan ta naw ni a, i thlahai bau khom suoksan ta naw ni a, i thlahai thlahai pei bau khom tuta inthoka kumkhawtluongin suoksan ngai naw nih” tiin.