Bu nghei dàn indik
58
1 “Inring takin khêk unla,In rawl ren naw ro.
Tawtawrawt ri ang elin,
Inring takin khêk suok ro.
An bawsiet le hel thu chuh,
Ka mihai kuomah hril unla,
Jakob sungkuohai kuomah,
An suol danhai chu hril ro.
2 An Pathien thupekhai chu,
Zamsan naw ni âwm takin,
Ka lampuihai hre châk a,
Thil indik thaw nuom angin,
Ni tin tinin an mi zong a;
Pathien hung hnai châk angin,
Rorêlna fel an mi hnih.
3 “Nangin i mi hmu si naw chun,
Ieng leiin am bu kan nghei ding?
I mi hriet fûk si naw chun,
Ieng leia kan insukrimsi ding?”
Tiin in hril hlak a ni khah.
Bu in nghei ve chàng hlak chun,
Nuom ang angin in che a,
Sinthawtu in sorhai hlak chuh,
In nĕksăwr a rè chuong nawh.
4 In bu nghei ve nihai hlak,
Inhal insuolin a tawp a,
Kuttum in inthlăk khum a,
Tuta in bu nghei dan hi,
Chung tieng hriet tlak a ni nawh.
5 Mani insukrimsik ni-a ngaiin,
Thli mut kur luong ang elin,
In lu in kei kun tawl a.
Saiip sila zâl thlep a,
Vut laia inbuol vel hi,
Bu nghei dan ding chu a ni?
LALPA a lawm in ring maw?
6 Bu nghei dan ding ka dit chu,
Indik lo taka hrĕnhai,
An hrĕngthir sŭtthlâkpĕk dam,
An ringkol hrui sŭtpek dam,
Nêksawrhai insuo zalen a,
An ringkol suktliekpek dam,
7 Retheihai fak ding sem dam,
Ina vakvaihai thruoi lût dam,
Saruokhai silfen pek dam,
Laichinhai nghatsan lo dam,
Ka dit dàn chu a ni lem.
8 Chu pha zet chun in var chu,
Zingkhuo angin var a ta,
In natna dam nghâl a ta,
Mi Dik chun in hma thruoiin,
LALPA ropuina chun somin,
In hnung dâltuah thrang a tih.
9 Chu huna chun ko in ta,
LALPAN hung don a ti cheu.
Thrangpuitu dinga in ko pha,
“Hi taka hin ka um ie”
Tiin don nghal a ti cheu.
“Nêksawrtu ringkol thè thla a,
Mi khîksaw chîng mihai le
Hrilsetuhai in thè thlàk pha,
10 Phingtrâmhai chu ngaisak a,
Nĕksawrhai in suktlai pha chun,
In var chu inthim mup lai,
Hung varin èng suok a ta,
In zăn chu sŭnchang angin,
Hung var phŭt lem tang a tih.
11 LALPAN thruoi a ti cheu a,
Ni intrĕng le ram trâwlah,
In mamawhai phùhrûk a ta,
In rù le chàng sukhrât a ta,
Tui chawm zing huon ang el le
Tuihnăr kang lo ang ning in tih.
12 Khaw ram hnung indin tharin,
A lungphumhai rem sang in ta,
‘Bang tlu hnung tungdingtuhai,
Kotthlêr le in siemthratuhai’
Ti hming la hung put in tih.
Sabat inser lawmman
13 Ka Chawlni bawse lo ding le
Nuom nuoma hmang lo dinga,
In kehai in vêng tlat chun,
Ka Chawlni chu lawmum ti a,
LALPA ni thienghlim chu inza a,
In nuom zawnga inser lo a,
Titinaa in hmang naw chun,
14 LALPA-a chun lawm in ta,
Hmun sangah sieng ka ti cheu a,
In pu Jakob ka rochung thilhaiin,
Ka hrai tlai ding cheu a nih”
Tiin LALPA bauin a hril.