57
1 Mi indik chu a thi a,Tu khomin an lungrilin,
An ngaituo zui ta naw a;
Pathien ngaisaktuhai khom,
Lak hmanga an um changin,
Thil thra naw tuok lo dinga,
Lak hmang an nih ti hrim hrim,
Ngaituo zui thiem an um nawh.
2 Ngîl taka kal chawitu chu,
Fam changa a zâl pha leh,
Thlamuongnaah an lût a,
Hadam takin an chawl hlak.
3 Nangni dawithiemnu nauhai,
Uire le nawchizor thlahai,
Hi taka hin hung hnai ro.
4 Tu am a na in nuisaw?
Tu am hmêl insiet khuma,
Tu’m a na lei in thlak khum?
Hel hmang ruol in ni naw maw,
Khêlhlip ruol thlahai ngei chu?
5 Saisaw bilah zâuthâu takin,
A buk tin hnuoiah in che a;
Ruom inthŭk, rawl pûka hai,
In nauhai in inhlàn a.
6 Ruoma lung nàm taphot chu,
In pathien lema ngaiin,
In chanpuol bǐkah in ruot a,
In chanpuol khom a ni hrim.
A chungah uoiin burin,
Bu le bâl thilhlânhai chu,
In inhlàn hlak a ni kha.
Hieng ang thil po po lei hin,
Ka lung a awi ding a ni?
7 Hmun sâng le tlâng sâng tinah,
In zălkhum ding in rem a,
Chutaka chun inthawi dingin,
In hang fe hlak a ni kha.
8 In kot bul le in in sŭngah,
Pathien limhai in sie a,
Keima mi theinghil daiin,
I khumpha chu in hăwk a,
Khum laizawlah in kăi a,
In inkei phar hlak a ni khah.
In zălpui châk deuhai chu,
Thu in intiempui hlak a,
An saruokna in enhlà hlak.
9 An pathien Molek kuomah,
Oliv hriek chawiin in fe a,
Rimtui in innâl treuh bok a.
In palaihai chu hla takah,
Biek ding zongin in tir a,
Seol chena inthûkin,
In infetir hlak a ni kha.
10 Biek ding in zongna lamah,
In insuksâwl dĕr hlak a,
Sienkhom, “Beisei a bo ie!”
In ti nuom chuong ngai si nawh.
Beisei ding thar in hmu pei a,
In chău tlep naw mei mei a nih.
11 Ka kuomah thukhêl hril a,
Hriet khom mi hre fu ta lo a,
Mi ngaituo zui ta lo khopa,
In pangzat le in trì tlon chu,
Tu hi’m a ni rêng rèng a?
Ka to sawt taluo leia,
In mi trì ta naw a ni?
12 Dika in hriet le thilthawhai,
Ka hung puong lang ding a na,
Săwtpuina nei naw ti niu.
13 Thrangpuitu ding in ko pha,
In milim lak khawmhai hin,
Hung thrangpui cheu raw se chu!
Thliin la hmang vong a ta,
Thuokin mût lêng vong a tih.
Keima mi bĕltu ruok chun,
Ram hi hung rochung a ta,
Tlâng thienghlim hi hluong a tih.
Lungngaihai thlamuongna
14 “Sung pawng ro, sung ruol lo,
An lam hraw ding buotsai ro;
Ka mihai insui theina po po,
A rêngin inthiel fai ro”
Tiin ama chun la hril a tih.
15 Chatuona hring, Mi Thienghlim,
Hmunsânga um chun a hril:
“Hmun insang le thienghlima chêng
Ni lang khom ieng lai khomin,
Thuhnuoirol le insîrhai kuomah,
An thlarau ngui sukhar ding le,
Insirhai lungril kei har dingin,
An kuomah ka um zing hlak.
16 Suolah intum zing naw ning,
Ka lung sen zing bok naw nih.
A sen zing chun bohmang an tih,
Thuoka ka’n din an ni si a.
17 An suol le du-àm leiin,
An chungah ka lungsen a,
Anni chu ka hrem tawl a,
Ka hmêl ka thuppek dai a,
Anni hlakin an nuom zawng,
Lampui chu an hraw pei si.
18 An um dan ka hmu vong a,
Sienkhom sukdam nawk ka tih.
Thruoi ka ta, an ngirhmun khom,
Hadamin siem nawk ka tih.
19 Israel rama lusun po po băuah,
Inpâkna thu sieng ka ta,
Ram hla le hnâihai kuomah,
Inremna inlèngtir ka ta,
An rêngin sukdam ka tih”
Tiin LALPA chun a hril.
20 “Sĕhnok le chir vor suok hlak,
Tuipui insok zing ang hin,
Mi rilohai chu um an ta,
21 Muongna hrim hmu naw nihai”
Tiin ka Pathienin a hril.