Hnam danghai sandamna
56
1 LALPA chun hieng hin a tih:Indikna kengkaw unla,
Indik takin ro rêl hlak ro;
Ka san suok vat ding cheu a na,
Ka felzie hung inlang vat a tih.
2 Indikna kengkaw tlat a,
Kei mi pom nghet tlat hlaktu,
Ka chawlni vong thienghlimtu,
Suol thaw laka kut keitu chu,
Mi hamthra a nih.
3 LALPA cheltu ram dang miin,
“LALPAN a mihai lakah
Kei chu mi en hrang a tih”
Ti ngai hrim hrim naw raw se.
Mi tilrè khomin inthlahrungin,
“Kei chu thing trawl ang ka nih”
Ti ngai hrim hrim naw raw se.
4 Mi tilrèhai chungthuah,
LALPA chun hieng hin a hril:
“Ka chawlnihai insertu,
Ka lawmzawng thaw thlangtu le,
Ka thuthlung vong nghettu chu-
5 Ka tempul le kul bang sunga,
Ka naunu le naupahai nêkin,
Hming thra lem chu peng ka ta,
Kumkhuon a hming bo naw nih.
6 “Ram dang mi, LALPA cheltu,
A rong bawl dinga inpe,
LALPA hming chu hmangaia,
Ama chawibiek hlaktuhai,
A chawlni bawse loa
Inser thienghlim hlaktuhai,
Ka thuthlung vongtuhai chu-
7 Ka tlâng thienghlimah thruoiin,
Ka trongtraina ina chun,
Anni chu sukhlim ka ta,
Pumraw thilhlân an hung chawi,
Ka maichama an inhlàn chu,
Keiman lo pompek ka tih;
Ka in chu hnam tin ta dinga,
Trongtraina in la ting an tih” tiin.
8 Israel saltanghai thruoi khawmtu,
LALPA ka Pathien ngei chun,
“Ka thruoi khawm tahai bàkah,
A dang khom hung thruoi ka tih”
Tiin a hril bok a nih.
Israel thruoituhai a dem
9 Ram sa po pohai hung ro,
Ram hnuoia sa tinrênghai,
Anni fa dingin hung ro.
10 Israel vêngtuhai chu,
Mitdel le ieng khom hre lo,
Rawl nei lo ui ang an na,
Tu khom an inbauh thei nawh.
Zal puma thil suongtuo hi,
An inhoi tizawng a ni a,
In bur bur hi an thlâkhla.
11 Ui hnukrawl trâm zing angin,
Khop tik hrim an nei naw a,
Berampu an ni dea chu,
A sie a thra an thlei thei nawh,
Mani hlawkna ngot hnot a,
Mani lam hrawtu an nih.
12 “Hung ro, uoiin lam ka ta,
Dit tawkin dawn ei tiu khai;
Zinga lem chu voisun nèkin,
Inhoiin ropui dai lem hman a tih”
Tiin mi tin an inko tuo a.