53
1 Kan thu hril hi tuin am awiin,LALPA kut hung inlang hi,
Tuin am hre thiem an ta?
2 A hmaa chun thing tuoi inno,
Hnuoi chàra zung thlak angin,
Ama chu a hung pieng a.
Ama chun mi hang hîp dingin,
Pienhmang mawina a nei naw a,
A hmêl inlang dan hrima khom,
Lungdumna ding a um nawh.
3 Mihan hmusitin an hnawl a,
Mi lungngai, natna hre mi a nih.
Mi’n an hmuin hmâi an hup a,
An endong a, ei ngaisang nawh.
4 Ama chun ei natna mi tuorpekin,
Ei lungngainahai a mi phurpek a,
Sienkhom Pathien kut a tuor leia,
Vuok thitling le suknata um,
Niin ei ngaipek lem hlauh si.
5 Ei bawsietnahai leiin,
Ama chun hliem a tuor a,
Ei khawlonahai leiin,
Vuok thitlingina a um a;
Thlamuonga ei umna dingin,
Hremna a chungah a tla a,
An vuokna hliemhai lei chun,
Sukdamin ei lo um tah.
6 Ei rêng hin beram angin,
Mani lampui seng hrawin,
Ei invak hmang zo ta a;
Ei khawlona po po chu,
LALPAN a’n phurtir a nih.
7 Soisakin an intuortir a,
Sienkhom a don lĕt vè nawh.
That ding beramte angin,
Ama chu an thruoi vĕl a,
Beram hmul vawtu hmaa,
Beram a to zing angin,
Ama khomin bău a ka nawh.
8 Mana a chungthu rêlin,
Ama chu an thruoi hmang a,
A thlahai chanchin tu’n am,
An hung hril ta ding a na?
Hringmi rama inthokin,
A hringna an lakpek a,
Ka mihai bawsietna leiin,
Thatin a lo um ta si.
9 Tharum insuo ngai lo le
Khêl hril ngai lo ni sien khom,
Mi suol angin an vŭi a,
Mi hausa thlânah a zâl.
10 Sienkhom LALPA thu leia,
Vuok thitling chu tuor a nih;
Ama chu suol ngaidamnan,
Inhlàn lo ni tah sien khom,
A chi thlahai la hmung a ta,
A dam kum suksei a ta,
A kutah LALPA tum chu,
Sukhlawtlingin um a tih.
11 A tuor inrim ra a hmu pha,
A thlawn nawzie hmung a ta,
A lung awi takzet a tih.
Ka siehlaw mi fel hrietna chun,
Mi tam tak thiem inchangtir a ta,
An suolhai phurpêk a tih.
12 Chuleiin, ka siehlaw chun,
Thi hiela hringna bun thla a,
Bawsetu laia tiema a um leiin,
Mi lienhai lai tiem veng ka ta,
Mi tam tak kuomah râllâk,
Ama chun sem tang a tih;
Mi tam tak suolhai phurtu,
Bawsetuhai hrilpuitu a ni si.