Zion ta dinga chatuon sandamna
51
1 “Felna hnottuhai po po leLALPA zongtuhai po po chun,
Ka thu hi lo ngaithla ro:
In piengna lungpui hi en unla,
In suokna lung khur hi en ro.
2 In pu Abraham tieng en ro,
A hringtu cheu Sari en ro.
Ka ko lai chun nau an nei nawh,
Mal ka sawm a, ka sukpung a,
Tam takin ka’n din suok kha.
3 LALPA chun matheiloin,
Zion chu thlamuong a ta,
A chim sietna po po khom,
Lungsietna mitin thlîr a ta;
Thlalĕr chu Eden huon angin,
Ram fil chu LALPA huon angin,
A la hung siem ding a nih.
Chu taka chun hlimna le lawmna,
Lawmthu hrila inpakna ri,
Hriet hung ni lem tang a tih.
4 “Ka mihai, mi lo ngaithla ro;
Ka hnamhai, mi lo ngaithla ro:
Keima kuoma inthokin,
Dàn thu chu a hung suok a,
Ka rorêlna indik chu,
Hnamhai èntu ning a tih.
5 Ka felna chu a hung hnai a,
Ka san suok hun a tlung mek;
Ka bânin hnam tin chungah,
Indik takin ro rêl a ta,
Thlierkarhan mi beisei an ta,
Ka bân hrât hi ngai an tih.
6 Chung tieng khi hang thlir unla,
Hnuoi tieng khom zuk thlir bok ro.
Van khi meikhu ang elin,
A la’n zam ral ding a na,
Hnuoi khom hi silfen angin,
A la chul vong ding a na,
A chunga cheng po po khom,
Tho angin la thing an ta,
Sienkhom ka sandamna chu,
Kumkhawtluonga ding a na,
Ka felna tlol ngai naw nih.
7 A thra a sie thlier theitu,
Lungrila ka dàn vongtuhai,
Ka thu hi lo ngaithla ro:
Mihai deusaw tri naw unla,
An diriem tri bok naw ro.
8 Anni chu silfen angin,
Hângthimin fa zo an ta,
Sahmul a fak siet angin,
A la fak siet ding a nih.
Sienkhom ka felna ruok chu,
Kumkhuoin um tang a ta,
Ka sandamna chun suon tin,
A dai vong ding a ni si a.
9 LALPA har la, har la, tho rawh,
Tiena mihai kuoma i hratzie,
I’n langtir ang khan tu hin,
Hung inlangtir nawk raw khai.
Nile-a cheng Rahaba sat nawi a,
Tuipui dragon sun tlangtu kha,
Nangma i ni naw am a ni?
10 Tuipui inthuk sukkang a,
I mi thlanghai kàn thei dinga,
Tuipui monga lam siemtu kha,
Nangma i ni naw am a ni?
11 LALPA intlanhai hung kîrin,
Hla sakin Zion hung lût an ta,
Chatuon lawmna khum an ta,
Hlimna le lawmnan hmuok a ta,
Beidong inrŭm rè tang a tih.
12 “Keima, keima ngei el hi,
A thlamuongtu cheu chu ka nih.
Hlobet anga ral nawk el ding,
Thi thei mihriemhai mei mei hi,
Ieng dinga in tri am a na?
13 Kei hi LALPA, nangni siemtu,
Van kei phara hnuoi thrut remtu,
Ka nizie in theinghil ta maw?
Ieng leia nêksawrtu lungsen,
Tri rêng rênga in um am a na?
14 Kûn tlok tloka intânghai chu,
Insuo zalen ni vak an ta,
Lung in thimah thi nawng an ta,
Fak ding tlasam bok naw ni hai.
15 Kei hi LALPA in Pathien,
Tuipui chok phula infawntirtu,
Iengkim LALPA chu ka nih;
16 Kei, vanhai khom kei phartu,
Leihnuoi innghatna phûmtu,
“Ka mihai in ni ie” ti a,
Zion kuoma hriltu chun,
I bauah ka thu ka sie a,
Ka kutin ka hum zing che.”
LALPA lungsenna no
17 LALPA kuta inthoka,
A lungsenna uoiin dawn a,
A hlek chikte khom hla loa,
Nang, a berbu tlak fai paptu,
Har ta rawh, har ta rawh,
Aw Jerusalem, thranghar rawh.
18 I hring, i naupahai lai khan,
Thrangpui ding che an um naw a,
I nau chawmlienhai lai khan,
Kei bât ding che an um bok nawh.
19 I chunga sietna thuo hni tlung-
Sukràuna le sukramna lakah,
Trămpui le kawlhnâm laka hin,
Iengtin am hnĕm ka ti che a?
20 Chăuin i nauhai an tlu hmăt a,
Lèn chânga sakhi awk ang elin,
Kotthlêr pêng tinah an tlu phung a.
LALPA lungsennan a del de a,
Pathien zilhau an tuok a nih.
21 Chuleiin, nang hrem tuortu,
Uoiin loa vai ruia um,
Hi thu hi lo ngaithla rawh:
22 LALPA i Pathien ngei el,
I mi le sahai humhaltu chun,
Hieng ang hin a hril a nih:
“En ta, a sukruitu che no kha,
I kuta inthokin ka lak hmang tah.
Ka lungsenna berbua mi kha,
Dawn nawk ta ngai naw ti nih.
23 “Kan hraw dingin bokkhup la,
I ruongzâng chu hnuoi zawl ang,
Kotthlêr angin daw tlûn rawh”
Tia sukrinumtuhai chê kutah,
Berbu chu pe tang ka tih” tiin.