Israelhai suolna
50
1 Hi hi LALPA chun a hril:“In nu ka tir hmang lai khan,
Măkna lekha ka pêk maw?
Ka leibatna mihai kuomah,
Nangni ka zor cheu a ni?
In suolna leiin annawm,
Zor hmanga in um lem chu.
In bawsietna lei chauin,
In nu khom tir hmang a nih.
2 Ka hung khan iengti leia,
Tu khom in um naw am a na?
Ka ko cheu khan ieng leia,
Mi don ding in um der naw?
Nangni intlansuokna di’n,
Ka bân a tawi taluo maw?
Nangni san suokna dingin,
Hratna ka nei naw a ni?
Tuipui khom ka hal kang a,
Vadunghai khom thlalĕrah,
Ka thuin ka’n changtir a,
Tui tlasamin nga an thi a,
Ngahai chu an hung thu a.
3 Van chu thimin ka’n khum a,
Saiipin ka tuom khuma” tiin.
LALPA thu awitu siehlaw
4 Chăuhai infuia tungding dan,
Ka hung hriet theina dingin,
LALPA ka Pathien ngei chun,
Zirtir thiemna lei mi pein,
Tuk tin tina mi keiharin,
A thu zirtir hre thiem dingin,
Ka nä a mi hongpek hlak.
5 LALPA ka Pathien ngei chun,
Ka na a mi hongpek a,
A lakah ka hel ta naw a,
Hnung ka’n nghatsan ta bok nawh.
6 Mi vawtuhai hmaa chun,
Ka ruongzâng ka dawpek a,
Ka khâkhmul pottu kuomah,
Ka bieng khom ka dawpek a,
Nuizat bûra mi siem a,
Chil mi sakkhumtu kuomah,
Ka hmâi ka dawpek lem hlak.
7 LALPA ka Pathien ngei chu,
Mi thrangpuitu a ni leiin,
Sukmuolphoin um naw ning.
Chuleiin, meitawk lung angin,
Ka hmai ka sukpachang a,
Inzakin mi siem naw nih,
Ti hi chieng takin ka hriet.
8 Mi trantu a hung hnai ie,
Tu’n am mi khing ngam an ta?
Hang inhmason ei ti aw!
Tu’m a na mi hêktu chu?
Hmaisanah inbei kan tih.
9 LALPA ka Pathien ngei chu,
Mi thrangpuitu a ni leiin,
Tu’m thiem naw min chang ding?
Silfen angin la hlui an ta,
Hângthimin fa se vong a tih.
10 Nangni lai hin LALPA tritu,
A siehlaw thu awi in um am?
Inthim hnuoia kal chawitu,
Var hrim hmu nawtu khomin,
LALPA hming chu ring sien la,
A Pathienah innghat raw se.
11 Tuta mani mei awi a,
Mani meiser insittuhai,
In meichoka chun lêngin,
In mei lum chu awi mol ro,
Ka kuta in dong ding chu,
Na tak tuora inper a nih.