Israelhai lululna
48
1 Aw, nangni Jakob sungkuo,Nangni Israel hming chawitu,
Juda thràlbea inthoka suok,
Thutak le felnaah ni loa,
LALPA hminga inkhâma,
Israel Pathien hming lamtuhai,
Hi thu hi lo ngaithla ro:
2 “Khawpui thienghlim mi le sa,
Tiin in inko hlak a,
In ringsan Israel Pathien khom,
A hming Iengkim LALPA a nih.
3 Kha hmaa thil tlunghai kha,
Tiena ka hril lawk sa a na,
Ka bau ngeiin ka puong a,
Kei ngeiin ka’n hriettir a,
Chuonghai chu ka hlen thut a,
Chuongchun an hung tlung ta a.
4 In lululzie ka hriet a,
In rǐng thîr angin a khong a,
In bawk khom dâr angin a chang.
5 ‘Ka milimhai thaw a nih,
Ka thing milim siemhai le
Ka thîr pathien sunghaiin,
An intlungtir vong a nih’
In ti thei nawna dingin,
Hieng thil a tlung hma dai hin,
Ka hril lawk cheu a ni kha.
6 Hieng thilhai hi in hriet ta a,
Indik in ti hle naw maw?
Tuta inthok ruok hin chu,
Thil thar hril tang ka ti cheu,
In hriet lo thil inthuphai chu.
7 A hmaa in hriet ngai lo,
Tuta ka’n umtir a nih,
‘Ka hriet ta sa annawm ie!’
In ti thei nawna dingin.
8 Nain in hriet ngai naw a,
Lungrilin in hriet ngai nawh,
Hun sawt taka inthok khan,
In na a var ta si nawh.
Vervek taka thaw hlak mi,
In nizie ka hriet chieng a,
In pienga inthok hrima,
Hel hmang tia ko in nih.
9 Ka sat thlak nawna ding cheuin,
Ka hming zarin ka lungsen,
Ka’n kei tìm hrăm hrâm hlak a,
Inpak ka hlawna dingin,
In chungah ka’n sŭm a nih.
10 En ta u, ka sukthienghlim cheu,
Tangkaruo ang chu ni loin,
Tuorna meiin ka fie cheu hi.
11 Keima le keima zarin,
Keima le keima zar chauin,
Hieng thil hi ka thaw a nih.
Ieng leiin am ka hming hi,
Sukhmelhemin um a ta?
Ka ropuina chu mi dang,
Tu khom intrawmpui naw ning.
Kura, LALPA mi thlang
12 Aw, nangni Jakob sungkuo,
Nangni Israel hming chawituhai,
Ka thu hi lo ngaithla ro:
Keima hi keima chu ka nih,
A bul le a tawp ka nih.
13 Hnuoi innghatna lungphŭm chu,
Ka kut ngeiin ka phŭm a,
Van khi ka kut chang tiengin,
Ka kei phar a, ka zâr a,
14 In rênga hung inkhawmin,
Ka hril hi hung ngaithla ro.
Hieng thil hi milimhai lai,
Tu’m hril lawk thei an um a?
LALPA thlang Kura ngei chun,
Babulon chunga a thiltum,
A rêngin hung hlen a ta,
Kaldai mihai chunga chun,
A kut chu hung thlâk a tih.
15 Keima ngeiin ka hril hi,
Ama chu ka ko ta a,
Ama chu hung thruoi ka ta,
A thilthaw hlawtling a tih.
16 Ka kuom hung pan hnai unla,
Ka hril hi hung ngaithla ro:
Thu ka puong hmasa tak khan,
A rûkin ka hril naw a,
A hung tlung hun lai khomin,
Keima chu um zing ka tih.”
(Tuhin Chunghnungtak LALPA chun,
A Thlarau leh a mi tir a nih.)
A mihai ta dinga LALPA thil tum
17 Nangni intlantu LALPA,
Israelhai Mi Thienghlim chun,
Hieng ang hin a hril a nih:
“LALPA in Pathien chu ka nih,
In thratna dinga zirtirtu,
Kal chawi dan hriltu cheu chu.
18 Ka thu in ngaithlak phot chun,
Inremna chu in chungah,
Tui ang luong dem dem a ta,
Felna khom tui fawn angin,
In chunga fawn vel a tih.
19 Trieulung ang hiela tamin,
In thlahai chu pung an ta,
Pilvut anga tiem seng lo,
Tu le te hung nei in ta,
An hming chu ka hmaa hin,
Thai bo ni ta ngai naw nih.
20 Babulon suoksan unla,
Kaldaihai tlăn hmangsan ro.
Hi thu hi hlima khêkin,
Hrilin puong dar vel unla,
“LALPAN a siehlaw Jakob,
A’n tlan tah” tia hrilin,
Hnuoi kil tinah puong dar ro.
21 Thlalĕra a thruoi lai chun,
Dangchâr hrim an hriet naw a,
Lungpuia inthokin tui,
An ta di’n a’n luongtir a,
Lungpui chu a vuok koi a,
Tui a’n chik suok zur zur a.
22 “Mi rilo ta ding ruok chun,
Muongna hrim hrim a um nawh”
Tiin LALPA chun a hril.