Babulon chunga rorelna
47
1 Aw Babulon naunu thienglàm,I lalthrungphaa inthok khan,
Trum la, pilvutah inthrung rawh.
Aw, ang Kaldaihai naunu,
Hnuoia hin inthrung rawh.
“I va hang inno chik chek de!”
Ti ta ngai nawng an ti che.
2 Bu rawtna lung kha chel la,
Bei ding buhùm rawt phit rawh.
I hmai dier kha hawk thla la,
I puonbil kha hlîm sîng la,
I malpui inlang vongin,
Vadung tui kha pal kai rawh.
3 Saruok filin um i ta,
I zamaw inlang a tih.
Phuba ka lâk ding a na,
Tu khom hla hrim nei naw ning.
4 Kan Tlantu hming chu-
Iengkim LALPA a na,
Israelhai Mi Thienghlim a nih.
5 Aw Kaldai naunu, to zingin,
Thimthama hin inthrung rawh,
‘Ram tin lalnu’ ti hrim hrimin,
Ko ta ngai nawng an ti che.
6 Ka mihai chunga lungsenin,
Ka rochanhai ka soisak a,
I kutah ka’n hlan tawl a,
An chungah za i ngai naw a,
Tarhai chen khom indoi loin,
Phur rik tak i’n phurtir a.
7 ‘Lalnu ni kumkhuong ka tih’
Tiin ni song i’n ring a.
Nisienlakhom hieng thil hi,
I lo ngaituo ngai naw a,
Thil la hung tlung theihai khom,
Sût nachâng i hriet bok nawh.
8 Chuleiin, nang hoithawnu,
Ngaingam taka khawsain,
‘Kei hi ka ni el a nih,
Kei naw tu khom an um nawh;
Hmeithai ni ngai nawng ka ta,
Nauhai chân ngai naw ningah’
I ti hlak a ni naw maw?
9 Chu pahni chun thawklekhatin,
Hung nang thut an ti che a,
Ni khatah tlung ruol a ta,
Nau chânin hmeithai i tih.
Ieng anga aisan thiemin,
I dawithiemna hmang la khom,
A kimin hung tlung a tih.
10 I rîtlona ringsanin,
‘Tu khomin an mi hmu nawh’
I ti hlak a ni naw maw?
Var le hrea inngai a,
‘Kei hi ka ni el a nih,
Kei naw tu khom an um nawh’
I ti hin a thruoi suol che.
11 Sietnan tlàk buok a che a,
Dang ngaina hrim hre naw ti nih.
Vangduoinan tlak buok a che a,
Intlan suok zo naw ti nih.
Sietna rŭnpuiin hriet lawk loin,
A nang thut ding chè a nih.
12 I naupang lai a’nthoka,
Mitvaidawi le dawithiemhai,
I lo ngaisang hlakhai khan,
An san thei ding phot che chun,
Chuonghai chu ko khêk ta la!
Mipuihai pangzat ding zawng,
Thawpêk nawk dingin ngèn rawh.
13 Remruottu i hau talaw hi,
I sawl pha lem a ni hi.
Van arasihai hmanga,
Thil la tlung ding hril lawk thiem,
Thla kipa ding hrillawktuhan,
Hung thrangpuihai sienla che,
Thil hung tlung ding laka chun,
Hung san suok raw hai se chu!
14 Sienkhom, bu pawl ang ela
Meia kang hmang thei an na,
Meichok laka inthokin,
An insan suok thei si nawh.
Thuka mei awi ang an nawh
An ta dingin a sa tluo.
15 I naupang laia inthoka,
I lo thokrimpuihai le
I lo indawrpuihai kha,
Chuong chauh chu an ni si a.
Mi tinin an lam inhmang,
An la zui tawl ngat ngat a,
San suok ding che an um nawh.