Babulon pathienhai
46
1 An pathien Bel le Neboa hai chu,An va tlawm ta rong rong de!
Sabengtung ruol an inphurtir a,
A rik leiin an kat tron tron a.
2 A phurtu le an thil phurhai chun,
Inkhup lupin hnuoi tieng an en a.
A betuhan an hum thei naw a,
An biekin a hum thei bok naw a,
An pahniin salah an thruoi diel.
3 Aw, nangni Jakob sungkuo,
Israel sungkuo la um sunhai,
Ka thu hi lo ngaithla ro.
Sula inthoka tungdingtu cheu,
In pienga keitleitu cheu ka nih.
4 Tar kûn lu truok in ni chenin,
Keima, keima ngei el hi,
A tungdingtu cheu ning ka tih.
Ka siem cheu a, pom ka ti cheu,
Tungdingin san suok ka ti cheu.
5 A tu le am mi tekhiin,
Tu am ka tlukpuiah in sie?
Tu am ka ang nia hrein,
Tu le’m in mi tekhi ding?
6 Threnkhat chun an ipa inthokin,
Rangkachak an bun suok a,
Tangkaruo an bŭk suok a,
Thil ser thiemhai an ruoi a,
Pathien lim an insungtir a,
Bokkhupin an biek hlak a.
7 Liengkoah an inchuon a,
A hmunah an inthrut a,
Chu chun inson thei loin,
Milim chu a ngir zing a,
An ko khomin a don nawh;
An buoiin a san thei bok nawh.
8 Nangni lungril helhmanghai,
Chu chu hre zinga ngaituoin,
In lungrilah vong zing ro.
9 Tiena tlanga thil tlung tah,
Thil um dan kha hre zing ro.
Keima hi Pathien chu ka nih,
Kei naw tu khom an um nawh.
Keima hi Pathien chu ka na,
Keima ang tu khom an um nawh.
10 Kei chun a tawp dan dinghai,
Atira inthokin ka’n hriettir a,
Thil la hung tlung dinghai khom,
Tiena inthokin ka hriet vong.
Ka tum chu dingchang a ta,
Ka nuom angin thawng ka tih.
11 Ka thil tum hlentu dingin,
Khawsak tienga inthokin,
Vate hnukrawl ko ka ta,
Ram hla taka inthokin,
Ka mi ruot chu ko ka tih,
Ka hril angin thawng ka ta,
Ka tum angin hlen ka tih.
12 Nangni lungril ngar le khauh,
Felna le inkârkîkhai,
Ka thu hi lo ngaithla ro.
13 Tu hin hun sawt riel loin,
Ka felna hung hnai a ta,
Zion chu san suok ka ta,
Israel sukropui ka tih.