LALPA chauh Pathien
44
1 Aw ka siehlaw Jakob thlahai,Aw, ka mi thlang Israelhai,
Tu hin ka thu hi lo ngaithla ro.
2 Sula inthoka indintu cheu,
Nangni thrangpuitu LALPA chun,
Hieng thu hi a hril a nih:
Aw ka siehlaw Jakob thlahai,
Ka thlang Jesurunhai,a tri naw ro.
3 Ram trawla chun tui buok ka ta,
Ram chàrah vadung inluongtirin,
I suonhai chungah Thlarau buokin,
I tû le tĕhai malsawm ka tih.
4 Phûla hlo hring dup ang le
Vadung kama phahrâm angin,
Hung inthrang tuol tuol an tih.
5 Pakhatin, ‘LALPA ta’ inting a ta,
Mi dangin Jakob hming put a ta,
Mi dang nawk chun a bânah,
‘LALPA ta’ tiin ziek a ta,
Threnkhatin Israel hming chu,
Hnam hmingah put tang a tih.
6 LALPA, Israelhai Lal le Tlantu,
Iengkim LALPA chun a hril:
Kei hi a bul le a tawp ka nih;
Keima naw Pathien an um nawh.
7 Tu am a na, keima hril anga
Thil tlung ding hril lawk thei?
An thei chun puonghai sien la,
An thawtheizie suklang raw se.
Tienlai mihai ka’n dina inthoka,
Thil tlung tah le la tlung dinghai,
Hung puong suok ve raw hai se.
8 Zâm naw ro, tri bok naw ro.
Tiena inthok khan puongin,
Ka hril lawk chêu an naw maw?
Nangni hi ka thu hretu in nih.
Keima naw Pathien an um maw?
An um nawh, Lungpui dang hrim,
Pakhat khom an um ka hriet nawh”
Milim biek deusawna
9 Milim siemtuhai chu an rêngin mi hmang lo an ni a, an thil ngaihlut zawnghai chu thrathnempui tlak a ni naw a, an milimhaiin an hmu thei nawzie le hriet thei nawzie hrepuitu khom anni ngei an nih. Chuleiin, la muolpho an tih. 10 Tuin am pathien lim indinin, trangkaina nei lo milim chu a sung ding a na?
11 Ngai ta u, milim betuhai po po le milim siemtu, pathien siem theia inngaihai, mihriem ve el ni sihai chu LALPA hmaah an rêngin tri tak le muolpho takin la ngîr an tih. 12 Thirsu chun milim a sut a, meilingah a rol lut a, tuboin a sut a, a bân tha hrat chun a vuok dèn a, a ser a. A phìng a hung trăm a, a thâ a hung zoi a, tui a dawn naw chun a hung chau hlak. 13 Mistiri chun inkhina hmangin thingtum chu a’n khi a, a ruongam ding pensilin a’n chik a, haver le thing nawtna hmangin a mawi thei dan ang takin mihriem lim a ker a, tempula inthrut dingin a siem a. 14 Sidar thing dam, inse thing dam, saisuo thing dam a phûr a, a hung chang theina dingin ram hnuoiah a sie trawl phot a. Sidar thing a phun a, ruotuiin a hung chawm lien a. 15 Thinga ti thei a ni pha chun a thren meia ti dingin a lâk a, mei a sèm a, a awi a, bei dam siemin a ur a. A thing làk a threna inthokin pathien lim a siem a, a biek a, a milim ker hmaa ngei chun a bokkhup a. 16 Thing zatve chu meiah a ti a, sä a raw a, a fak a, a khop a. Mei chu awiin, ‘Tuhin chu ka lum tawk tah. Mei awi chu a manhla ie” a ta. 17 Meia a ti bâng po chun pathien lim a siem a, a hmaah a kûn a, a biek a; a kuoma chun trongtraiin, “Mi sanhim rawh, ka pathien i ni si” a ti hlak.
18 An hriet naw a, an man phak nawh. An hmu thei nawna dingin an mit a’n del tlat a, an hriet thiem thei nawna dingin an lungril mit a’n del sa bok a. 19 “A zatve meiah ka ti a, meilingah bei ka hlieu hmin a, sä ka em a, ka fâk a. A dang po hi thil tirdakumah siemin, thing tum hmaah ka kûn el ding am a ni?” hang ti nachâng hre dingin hriet thiem theina an nei si nawh. 20 An lungril dawi vêta a um leia fe suol le vut bâr an ni tlat leiin, “Ka chang tienga ka chawi hi inhlĕmna thil mei mei a ni naw maw?” tia hang intâl suok nachang an hriet hrim hrim nawh.
21 Hieng hi hre ro, Jakob thlahai,
Israelhai khomin hre zing ro,
Ka siehlaw in ni si a.
Ka siehlaw indin Israelhai,
Theinghil ngai nawng ka ti cheu.
22 In bawsietnahai chu sûm angin,
Ka lak kiengpek ta cheu a,
In suolnahai khom trieusum angin,
Ka lak kiengpek vong ta cheu.
Ka kuom tieng hung kir ta ro,
Ka’n tlan suok ta si cheu a.
23 Aw vanhai, hlimin khêk ro,
LALPAN a thaw ta si a;
Piellei thuo riet khom hlimin,
Inring takin khêk raw se.
Aw tlânghai, hlimin khêk ro,
Rampui le thing tinrêng khom;
LALPAN Jakob thlahai chu
A hung intlan suok ta a,
Israelhai lai a’n chawimawi.
24 Sŭla inthoka indintu che,
Nangma intlantu LALPA chun,
“Kei hi iengkim siemtu LALPA,
Mani chaua văn kei phartu,
Hnuoi phĕk zartu chu ka nih.
25 Zawlnei derhai thu hril lawk,
Suktloltu chu kei ka na,
Aisan thiemhai sukmuolpho a,
Mi varhai hrietna thai let a,
Hmangna boa siemtu ka nih;
26 A siehlaw thu suknghet a,
A mi tirhai thu hlenpĕk a,
Jerusalem chungchang thua,
“Hluoin la um nawk a tih” titu,
Judai ram khuohai chungthua,
‘Indin thratin um nawk a ta,
A lo tlu ram tah hai khom,
Siem thra nawk ka tih’ titu,
27 Lipui ril kuoma, “Kang rawh,
Vadunghai sukkang ka tih” titu,
28 Kura khom, “Ka berampu a nih,
Ka tum angin hlen a tih” titu,
Jerusalem chungthua,
“Indin tharin um nawk a tih” titu,
A Tempul chungthua khom,
“I lungphŭm remin um nawk a tih’
Titu ngei chu ka nih” tiin.