Israelhai thrangpuitu
41
1 “Aw nangni thlierkar tinhai,To trok trokin mi ngaithla ro.
Hnam tinin tha thar insuoin,
Ka rorêlna hmaa hin hungin,
In chungthu hung hril unla,
Hang inhmu tlang ei tiu khai.
2 “Khawsak tienga mi pakhat,
Felna leia a rongbawla a ko,
Sir tina hnèna changtu hi,
Tuin am a ko suok a na?
A kutah hnamhai a pêk a,
A hmaa lalhai a tukdol a,
A kawlhnâm chun pilvut angin,
A thal chun bu si inlêng angin,
Anni chu a’n changtir a.
3 Kea a la sir lo ram chenin,
Anni chu a hnot thlŭr a,
Him takin hma a tâwn pei a.
4 Hieng hi thaw a, inhlentirtu,
Mihriemhai um dan ding rêl a,
Suon hung peihai ko suoktu chu,
KEIMA, LALPA ngei ka na,
Kei hi a bul le tawp ka nih.”
5 Thlierkarhan hmuin an tri a,
Kawl kil chenin an inthin a,
Hung panin an hung hnai a.
6 “Hrât takin um rawh” tiin,
Mi tin an inthrangpui tuo a,
An unauhai chu an infui a.
7 Thil ser le sung thiem mi chun,
Rangkachak sertu an fui phŭr a,
An milim siem vaw namtu chun,
Thîrsu chu an fŭi phŭr a,
“I sut mat thra ie” a ta,
Mi lim chu a zom khawm a,
Tlu thei lo din a kil nghet a.
8 “Nang, ka siehlaw Israel,
Ka mi thlang Jakob nauhai,
Ka ruolpa Abraham thla in nih.
9 Ka rong in bawl theina dingin,
Hnuoi tawpa inthoka thruoi suokin,
Pei thla loin ka thlang cheu hi.
10 Tri naw ro, in kuomah ka um,
Chî-ăi naw ro, in Pathien ka nih.
Sukhrâtin thrangpui ka ti cheu a,
Ka felna kutin tungding ka ti cheu.
11 “Nangni theidatuhai chu,
Muolpho takin um an ta,
Nangni khingtuhai po po chu,
Iengma loin bohmang an tih.
12 In hmelmahai zong inla khom,
Tu khom hmu zo ta naw ti niu.
Nangni hung dotuhai po chu,
Iengma lo inchang an tih.
13 In kut chang tiengah chela,
‘Tri naw, thrangpui ka ti cheu’
Titu LALPA in Pathien ka nih.
14 Aw Israel, mi hmusit ni la khom,
Tri naw rawh, thrangpui ka ti che”
Tiin nangni intlantu LALPA,
Israel Mi Thienghlim chun a hril.
15 Bu chǐlna khawl thar thra tak,
Ha nei chi angin siem ka ti che a,
Tlânghai chîlin phîn dar i ta,
Muolhai chu bu sî angin siem i tih.
16 Hang zâp in ta, thliin lèn a ta,
Thrawngaleivirin fen hmang a tih.
LALPA-a chun lawm in ta,
Israel Mi Thienghlim ropui a tih.
17 “Retheihai le tlasamhaiin,
Tui an zong a, an hmu naw a,
An dangcharin a’n hil a nih.
Kei, LALPA chun ngaisak ka ta,
Kei, Israel Pathien ngei chun,
Anni chu maksan naw ning.
18 Tlâng châra inthok khomin,
Vadung inluongtir ka ta,
Ruomah tui hnăr suok a ta
Thlalĕr chu dîlah siem ka tih,
Ram châr khom tuihnăr hmunah.
19 Sidar thing le sittim thing dam,
Inhmûi le oliv thing dam,
Far thing chi hrang hranghai leh
Thlalĕra chun phun ka ta;
20 Chu chu miha’n hmung an ta,
LALPA kutin chuong po po chu,
A thaw a niziehai ngaituoin,
Israel Mi Thienghlim inumtir,
A nizie hung hre tang an tih.
Milimhai tlaktlai nawzie
21 “In thu hung put lut unla,
In chungthu hung hril ro khai”
LALPA, Israelhai lalin a tih.
22 In mi limhai hung chawi unla,
Thil tlung ding hril lawk unla,
A tlung ta sa hril bok unla,
Chu chu ngaituo tlang ei ta,
A tawpna ding hre thei ei tih.
An naw leh thil la tlung ding,
Iemani bĕk hung hril ro.
23 Pathien in ni le ni naw,
Kan hung hriet theina dingin,
Maktia inthin hawpna khop,
A thra a sie iemani bĕk,
Thil la hung tlung ding hril ro.
24 Sienkhom ieng khom ni lo a,
Hmangna bo dĕr in lo ni chun,
A thlangtu cheu chu tirdak a um.
25 “Khawsaka inthok mi ka ko a,
Ama chun ka hming lam a tih.
Hmar tienga inthokin hung a ta,
Ama chun rorêltuhai chu,
Bu rawt lung angin rawt a ta,
Belhemtun bepil a sir hriel angin,
Ama chun sir hriel tawl a tih.
26 Ei hriet lawk theina dingin,
Tu’n am a tǐr khan a lo hril hlak?
“Hi hi a’n dik” ei ti theina dingin,
Tu’n am a mi lo hril lawk hlak?
Tu khomin an hril ngai naw a,
Tu khomin an hril lawk naw a,
In thu hrie an um dêr nawh.
27 Keiin Zion mihai kuomah,
“En ta u, in mihai an hung” ti a,
Chanchin lawmum thu chuh
Jerusalem kuoma hriltu ka nih.
28 Ka ngha vel a, tu khom an um nawh,
In milimhan thurawn an pek nawh,
Ka zawna an don thei bok nawh.
29 En ro, thil lem vong an ni hi!
Thil tlâktlai an thaw thei naw a,
Hieng milim sunghai hi thli ang,
Iengmalo vong an ni hi!