Hnamhai a hrem ding thu
34
1 Hnam tinhai, hung hnai unla,Ngaithla din hung inkhawm ro!
Aw, hnamhai, ngai poimaw ro,
Hnuoi le a sunga um po po hai,
Hungin hung ngaithla seng ro.
2 Hnam tin chungah LALPA lungsenin,
An sipaihai chungah a lung an ling.
Anni chu sukse vong a ta,
That dingin pe suok a tih.
3 Thathai chu pei suok an ta,
An ruong thu vut vut a ta,
Tlânghai chu an thisenin,
Luong khumin chie zop a tih.
4 Vana arasihai khi,
Sukbohmangin um an ta,
Van khi lekhabu angin,
A zuolin la zuol a tih.
Vana umhai po po khi,
Grêp hna trawl hnung ang le,
Theichang ra vuoi ang elin,
La hung tril thla vong an tih.
5 Vanvêla khin ka kawlhnâmin,
A khop tawk a dawn ta a,
En ta, hnam ka suksiet hnung,
Edom chungah ro rêl dingin,
A hung trum thla ding a nih.
6 LALPA kawlhnăma kâi chu,
Thisen le thău inpol a nih:
Beram le kĕl thisen dam,
Beramchal kala thău dam.
Bozra khuoah LALPAN,
Hlànbiekna la nei a ta,
Edomhai that treu a tih.
7 Ramsielhai leh that a ta,
Bawng tuoi le bawngchalhai leh.
A ram chu thisena zopin,
A pilvut chu thauin tlor a tih.
8 LALPAN phuba a lak ni,
Zion chunga Edom thilthaw,
A thungrul kum a ni si a.
9 Edom vadunghai po po chu,
Alkatara angin inchang a ta,
A pilvut chu kât chok angin,
A ram phêkin chok a tih.
10 Sùn le zàn mit naw ni a,
Kumkhuoin khu tung a ta,
Suon an um sung po po chu,
Sukramin um tang a ta,
Tu khomin sir ta naw nih.
11 Simbu le chingpirinu hai,
Mungêk le vaak ruolin,a
Chu hmun chu hluo tang an tih.
Pathienin Edom chunga chun,
Chî-âina hrui kei zam a ta,
Inkhìna hmol a hmang khom chu,
Tlakram dèrna hmol ning a tih.
12 A ram optua thrang nuom,
Tu khom um ta naw ni hai a,
Hotu ding um naw ni hai.
13 Lal in chu hlingin bawm a ta,
Theihmi le zakthlai bilin,
An kulhai chu inchang a ta,
Sihalhai le chingpirinuhai,
Tuol lengna hmun ni tang a tih.
14 Thlalĕra ram sahai chu,
Satene ruol leh tlâng an ta,
Sakĕlin sakĕl ko a ta,
Zana fak zong hlakhai chun,
Chu taka chun hmun khuorin,
Zanah rieknan hmang an tih.
15 Chu chun simbuin bu sep a ta,
Intuiin op kêu a ta,
A thla hnuoiah op khâwmin,
A te hruoihai chu chawm a ta;
Muzum khomin a kop kopin,
Riekna hmunah hmang an tih.
16 LALPA lekhabuah en ro,
Chuonghai chu pakhat té khom,
A kim lo um naw ni hai a,
Koppui bo um bok naw nih.
A bâu ngeiin thû a pêk a,
A Thlarauin thruoi khawm a tih.
17 An chan seng a ruotpek a,
Ama kut ngeiin a sem a,
Kumkhuoin hluo tang an ta,
Suon an um sung po po chu,
Chu taka chun chêng an tih.