Thrangpui hnia trongtraina
33
1 Aw nang ang suksetu Asuria,aSuksieta um ve ngai si lo,
Aw, nang mi dawhaa thaw hlak,
Mi dawhaa um ve ngai si lo,
I chung a va hang pik de aw!
Mi i suksiet zo pha leh,
Nang khom suksiet ning i ta,
Mi i dawha zo pha leh,
Nang khom dawha’ng an ti che.
2 LALPA, kan chungah zangai la,
Nangma a nih kan ngai che.
Tûk tina kan hrâtna ni la,
Lungzîng niah mi sandam rawh.
3 I rawl inri dur dur chu hrein,
Mihai an tlăn se dur dur a,
Nang i hung inthok meu chun,
Hnam tin an tlăn dar chum chum.
4 Aw Asuria, i râllâkhai chu,
Khău intâm anga tamin,
Inchŭ thlâkpĕk chê tumin,
Hung baw sup sup an ti chê.
5 Van sanga um LALPA chu.
Ropui takin an chawimawi,
Indik tak le fel takin,
Zion-ah ro rêl a tih.
6 Ama chu in dam sŭnga,
Nghet taka in innghatna,
In sandamna le varna,
Hrietna robawm ning a ta,
Robawm hongna chabi chu,
LALPA trǐna ni’ng a tih.
7 En ta, an pasalthrahai saw,
Kotthlêrah an trap khĕk a,
Inremna palaihai khom,
Lung na takin an trap saw!
8 Lamlienhai a thring thruop a,
Khuolzin hmu ding an um nawh.
An thuthlung an bawsiet a,
Hrepuituhai an hmusit a,
Inzà phur hrim an um ta nawh.
9 Ram chu trapin a chău a,
Lebanon inzakin a ngûi a,
Saron chu thlalĕr a’n chang a,
Basan le Karmel tlănga,
Thing hnàhai an tril zo tah.
10 LALPA chun hieng hin a tih:
“Tu hin hung tho suok ka ta,
Keima inchawisang ka ta,
Ka ropuizie tar lang ka tih.
11 In nau von chu favai a na,
Bupawl in hung hring suok a;
Meichok in inthuok suok chu,
Nangni kâng hmangtu a nih.
12 Chinai angin mihai chu,
Meipuia răw ni’ng an ta,
Hling trawl angin pei i ta,
Kang hmang vong an tih” tiin.
13 Nangni ram hlaa mihai,
Ka thilthaw lo ngaithla ro;
Nangni kâr hnaia umhai,
Ka thilthawtheizie hre ro.
14 Ziona mi suolhai chu,
Triin an inthin hăwp a,
Pathien inza nawhai chu,
Inthinnan a man tawl a,
“Kang hmang thei meichok lai hin,
Tu am khawsa thei an ta?
Kumkhuoa chok zing mei hi,
Tuin am tuor thei an ta?” an tih.
15 Indik taka kalchawihai,
Thudik chauh hril hlak mihai,
Pâwnglâkna leia hlâwkna,
Hmutuhai lungten mihai,
Thamna la nuom nawtuhai,
Mi that dinga rotna thu,
Ngaithla nuom ngai nawtuhai,
Suol thaw rotnahai laka,
Nä hip tlat hlaktuhai chu,
16 Hmun insăngah chêng an ta,
Tlânga suonglungpuihai chu,
An himna kul ni’ng a ta,
Făk ding pêkin um an ta,
Tui tlasam ngai naw nihai.
17 Lal hmêl mawi chu hmuin,
Ram inzar duoi la thlir in tih.
18 In thlaphăng hun thlîr kîr a,
Asuria hotu lien tak pa dam,
Sie lo latu le tiemtuhai dam,
Ral vêngbŭk enkoltuhai dam,
Lungrila in hriet suok pha leh,
Khaw lai am an um zo ta a?
Tiin in la’n don ding a ni si.
19 Chuong anga mi kolsenhai,
Trong kholbing tak el hmangtu,
An hril hriet thei lohai chu,
Hmu nawk ta ngai naw ti niu.
20 Ei kŭtna hlak Zion tlângpui,
Jerusalem, muongna khawpui,
Umhmun nghet in khuorna chu,
Mitin thlir lem tang in tih.
In puon in thlungphunhai khom,
Pot phawi ni ta ngai naw ni a,
In puon in keina hruihai khom,
Intan ngai hrim hrim naw nih.
21 Chu taka chun LALPA chu,
A Ropuitak ni’ng a ta,
Ama chu hnâr tam tak nei,
Vadungpui ang ni’ng a ta,
Hmêlmahai long hrim hrimin,
Long kar chi le long lienin,
Chu chun lût ngai naw ni hai.
22 LALPA chu ei roreltu a na,
LALPA chu dan mi petu a na,
LALPA chu ei lal a na,
Aman mi sandam a tih.
23 In long hrui inthla fuol in ta,
Long ngulah vêt ngai naw ni a,
Puonzar in zâr ngai bok naw nih.
Râllâk sum tam tak insem in ta,
Kebai chenin phur ve’ng an tih.
24 Zion tlanga cheng tu khomin,
“Ka dam nawh” ti nei naw ni hai;
Chu taka chênghai suolna chu,
Ngaidamin um vong tang a tih.