Fel taka rorêltu ding lal
32
1 Ngai ro, fel taka rorêltu ding,Lal a hung suok ding a na,
A rorêltuhai khomin ro,
Fel takin rêl ta’ng an tih.
2 Thlipui laka inbîkna,
Ruopui laka inhumhimna,
Thlalĕra vadungtê ang le,
Ram châra lungpui hlim ang
An hung ni ta ding a nih.
3 Mita hmutuhai mit chun,
Ngun takin thlir tang a ta,
Naa hretuhai khomin,
An na daw zing tang an tih.
4 Lungril inhmawhai khomin,
Mani’n hre thiem tang an ta,
Dang inawk hlakhai khomin,
Innâl takin hril tang an tih.
5 Invêthai chu mi inzaumah,
Tu khomin ngai ta naw ni a,
Mi vervêk khom tu khomin,
Ngaisang ta bok naw ni hai.
6 Invêt trong chu a tlahol a,
Suol thaw ding ngot a phan a,
Pathien poi tawk a tum răn a,
LALPA thu indik lo takin,
Mi kuomah a thĕ dar a,
Phingtrâmhai a ngaisak naw a,
Dangchârhai tui ding a chărpek.
7 Mi vervêk tum chu a rilo a,
Khêla pasehai suksiet a tum a,
An indikna thil khom ni sien,
An sietna ding a phan rûk zing.
8 Mi thra chun thil thra a phan a,
Thil thra thaw chu a ngǐrna a nih.
Jerusalem nuhmeihai
9 Nangni ngai sukngam nuhai,
Tho unla, ka thu hi ngaithla ro;
Nangni hima inngai nuhai,
Ka thu hril hi lo ngaithla ro.
10 Kum khat invoi hnung elah,
Hima inngaihai hi inthin in ta,
Grêp sǐk ding um naw ni a,
Theira ieng khom tlung naw nih.
11 Inthin ro, ngai sukngamnuhai,
Hima inngai naunuhai,
In mit âr intră raw se!
In silfenhai hlip unla,
In kawngah saiip bì ro.
12 In lo thra le ditum hai,
In grep ra nuomhai sûnin,
Beidongin âwm inchum ro.
13 Hling le buorin a bawm ding,
Ka mihai ram hi sûn ro,
Hi hlim chenna khawpui le
Hlimhlopna in po po hi,
Sûnin trap khêk rong rong ro.
14 Kul chu rausanin um a ta,
Khawpui so ri rè ta’ng a ta,
A muol zawl le ralvêngbukhai,
Kumkhuoin ram ta’ng a ta,
Sabengtung le beram ruolin,
Tlatna hmunah hmang an tih.
15 Sienkhom, chunga inthoka
Thlarau buok a ni pha chun,
Thlalĕr ram chu ram hnawngah,
La hung inchang nawk a ta,
Lohai chu rampui angin,
La hung zing khup nawk a tih.
16 Thlalĕr hmun ni hlaka chun,
Indiknan ro hung rêl a ta,
Ram thraa chun fel takin,
Thil iengkim thaw ta’ng an tih.
17 Fel taka an thaw leiin,
Hmun ralmuong inchang a ta,
A ramah kumkhawtluongin,
Muongna le himna um a tih.
18 Ka mihai chu muongleiah,
Tu khomin chawkbuoi loin,
In himah chêng ta’ng an tih.
19 Rampui chu thli le rielin,
Nuoi hmât vong khom lo ni sien,
Khawpui chu tlu hmât sienkhom,
20 Ruom tinah thlai chîng in ta,
In ran ruol le sabengtunghai,
Zalen takin tlâng an ta,
In ham a va thra awm de!