Pathienin Jerusalem hum a tih
31
1 Israel Mi Thienghlim en lo a,LALPA thrangpuina hni lo a,
Aiguptaah fe thla a,
An thrangpuina zu hni a,
An sakorhai ring lem a,
An tawlailir hauh inhnĕmpui a,
An sakor chungchuonghai hratnaa,
Innghat lemtu chung chu a pik.
2 Ama chu var tak a na,
Anni sukbohmang a ta,
A thû khom a sût ngai nawh.
Mi rilo sungkuohai le
Thil suol thawpuituhai chu,
Hung thoin bei tawl a tih.
3 Aiguptahai chu mihriem el,
Pathien an ni ve naw a,
An sakorhai khom sâ el,
Thlarau an ni ve bok nawh.
LALPAN a kut a’n let pha,
Thrangpuitu chu petek a ta,
Thrangpuia um chu tlung a ta,
An pahniin bohmang an tih.
4 Hieng hin LALPAN a mi hril:
Sakeibaknei sa hauh lai chu,
An inrûm nghur nghur hlak a,
Berampu ruol inpung inla khom,
An khĕk ri le hawhaw ri chu,
Iengah a ngai naw ang bokin,
Iengkim LALPA khom indo din,
Zion tlangah hung trum a tih.
5 Vatehan an buzawl vêng a,
An vuong kuol vel hlak angin,
Iengkim LALPA chun a phawin,
Jerusalem hliekhung a ta,
Op khumin sandam a ta,
Hung kanin san suok a tih.
6 Aw nangni Israel mihai,
Nasa taka in helsan tieng chu,
Ngha lêtin hung kìr ta ro.
7 Chu ni a hung tlung pha chun,
Tangkaruo le rangkachaka,
In kut tirdakum taka in siem,
Milimhai chu hnawl tang in tih.
8 “Mihriem kawlhnâm ni loin,
Mihriem inlet lo kawlhnâmin,
Asuria chu tlûng a tih.
Kawlhnâm lakah tlânsieng an ta,
An tlangvalhai chu man an ta,
Sala thruoiin sor lui an tih.
9 Trium rapthlâk tak lei chun,
An kulpui nghet chu chim a ta,
Indona puonzar an hmu pha,
An kawmandarhai chî-ăiin,
Bak lêngin tlân sieng an tih”
Tiin Zion-a mei sêmtu le
Jerusalema thuk neitu,
LALPA chun a puong ta si a.