Aigupta le an thuthlung chungthuah
30
1 LALPA chun hieng hin a tih:“Nau helhmanghai chung a pik!
Ka remruotna thrang vê dĕr lo,
Anni thil phan chu an thaw a,
Ka thlarau thrang dêr loin,
Anni karah thuthlung an siem a,
An chungah suol an intieng.
2 Keima mi rawn dêr loin,
Aigupta ramah an fe thlăk a,
Faraw humhalna ngĕnin,
Aigupta angsung an pan.
3 Sienkhom Faraw humhalna chu,
Anni sukzaktu chauh ning a ta,
Aigupta angsung an bêl chu,
An muolphona chauh ning a tih.
4 An hotuhan Zoan an tlung a,
An palaihan Hanes an tlung.
5 An ta dinga hmangna bo dĕr,
Thrangpui thei lo, hlawkna nei lo,
Inzakna le muolphona chauh,
Pe theitu hnamhai lei chun,
An rêngin muolpho an tih.
Negev-a ramsahai chungthu
6 Harsatna le beidongna ram,
Keipui le keichalhai lengna,
Rûlriel le rûl vuong thei tamnaa,
Trangkai lo hnamhai pèk dingin,
Palaiha’n an sum le paihai chu,
An sanghawngseihai thlukvŭmah,
An rosumhai an inphurtir.
7 Aigupta thrangpuina chu,
Hmangna bo dĕr a ni leiin,
‘Rûlpui Kăwkbo’ ka ti a nih.
Helhmang Judahai chungthu
8 Tu hin fe la, an ta dingin,
Lungphĕkah ziek thlapek la,
Lekhabuah ziek thla bok rawh,
Ni la hung pei dinga hai,
Hrepuitu ni kumkhuo dingin.
9 Hienghai hi hnam helhmang,
Nau khêlhril hmang tak el,
LALPA thupĕk ngai pei lo an nih.
10 Hretheituhai kuoma chun,
“Inlarna hmu ta naw ro” an ta,
An zawlneihai kuoma khom,
“Thu dik mi hril lawk ta loin,
Ngaithlak inhoi chauh hril unla,
Duthusam thil hril lem ro.
11 Hi thil hi tawpsan unla,
Hi lampui hi petsan ta ro;
Israel Mi thienghlim leh
Mi’n hmasontir ta naw ro” tiin.
12 Chuleiin, Israel Mi thienghlimin,
Hieng thu hi a hril a nih:
“Nangnin hi thu hi hnâwl a,
Inpawngnêkna le inhlèmna thu,
Ringa in inghat lem leiin,
13 Lung bang kak le chim vàng vâng,
Puom pûra a hnaw tah angin,
In suolnan del chim thut a ti cheu.
14 Belhemtun indoi lo a,
Bêl a vuok dar vong ang hin,
Vaw dar vong a ti cheu a,
A koihăr mei luokna khop khom,
Rŭt ding um naw nih” tiin.
15 LALPA, Iengkim LALPA,
Israelhai Mi Thienghlim chun,
“Inlamlèta um trok trok hi,
In ta din sandamna a na,
Dei dapa ringzo ngam hi,
In ta dinga hrătna a nih.
Nisienkhom in nuom si nawh.
16 ‘Sakor chunga chuong kan ta,
Kan tlan hmang thei’ in ti maw?
Chuong ang tak chun tlan hmang ro.
‘Sakor hrat chungah chuongin,
Tlan hmang ei tih’ in ti an naw?,
Sakor hrăt lemin hnot an ti cheu.
17 Mi pakhat inthri le hrăwkin,
Mi sangkhat tlan sieng in ta,
Mi panga inthri le hrăwkin,
In rêngin tlan sieng in ta,
Tlâng sîpa in puonzar khai chu,
A malin tlansietsan in tih.
18 A zangaina inentir nuomin,
LALPAN a la nghak zing cheu.
A lungsietna inhmutir dingin,
A mong a phong zing a nih.
LALPA chu rorêl thiem a na,
Ama nghaktuhai an hamthra.
Pathienin a mihai malsawm a tih
19 Aw Zion mipui, Jerusalema chênghai, trap ta naw ti niu. Thrangpui in hnina rawl ri a hriet pha chun ieng ang lawmin am a lunginsiet ding cheu chu! A hriet charin hung don a ti cheu. 20 LALPAN vangduoina bu le tuorna tui pe sienla cheu khom, in Zirtirtuhai chu inbi hmang zing ta naw ni a, in mit ngeiin hmu tang in tih. 21 Chang tieng amanih voi tieng amanih in pèt chang khomin, in hnung tienga inthokin, “Hi hi lampui indik chu a nih, hi tieng hin fe ro” tia hrilna rawl chu in nâ ngeiin hrieng in tih. 22 Chu pha chun tangkaruo le rangkachaka siem in milimhai chu thil porche anga hnawlin, nuhmei thla pal laia a sukporche puon angin, “Thuruk sek” tiin peihawn in tih. 23 Loa thlai chi in thèhai trona dingin ruotui hung tir a ta, a ramin bu le bâl a tontawin tharsuok a ta, chu pha chun in ranhai chu hmun hring incham duoiah tla ta’ng an tih. 24 In ran sor bawngchal le sabengtunghai chun chi saw ran bu thra, thirkut le suodura chok hruoi chu fang an tih. 25 Chu ni, in hmelmahai phĕk săm a, an kulbing sanghai insukchim dur dur ni chun, tlang tin le muol tina inthokin tui hnàr hung luong suok a tih. 26 LALPAN a mihai sukdam a, an hliemhai a tuompek ni chun, thlapa chu nisa angin var a ta, nisa chu a let sariin, ni sari sunga a var po po tlukin hung var ta’ng a tih.
Pathienin Asuria a hrem ding thu
27 En ta u, hla taka inthokin,
Lungsenna mei chok puot puot,
A khu intûr ngul ngul leh,
LALPA hming chu a hung ie!
A bău chu lungsennan a sip a,
A lei chu meichok angin a’n hlap.
28 A thuokin tui lien sang angin,
An rîng chenin a chìm a,
Sietna leidarah hnamhai a sêp a,
Hnamhai thruoi hmangna dingin,
An bauah sietna thirbar a’n bùk.
29 Nangni ruok chu kût thienghlim in hmang tir zan ang khan hlim takin hla sak in ta, Israelhai Lungpui, LALPA tlàng pana theihle mŭt ri leh inawi a, in som tung duol duol lai ang khan hlim in tih. 30 LALPA chun a rawl ropui tak chu insuong a ta, a kut thlak chu mi tinin hmung an ta, a lungsenna râpthlâk tak chu kang hmang thei meichok puot puot ang le ruopui vanawn sûr le thlipui hrăng le riel tla dur dur angin hung tlung a tih. 31 A hmoltuma a vuok pha chun, LALPA rawl leiin Asuria chu inthin hawp a tih. 32 LALPAN Asuria chunga hremna kut a thlak zătin khuong vawin tringtrang tum in ta, a kawlhnâm vaiin anni chu bei a tih. 33 Asuria lal rawna hmun ding chu buotsai diem a ni ta a, khur inthŭk tak le lien tak a ni a, thing an dĕng vûm thur a, sukkăng dingin LALPA chun vadung anga luong mei le kât inthuok suok a tih.