27
1 Chu ni chun a kawlhnâm ngei,Trium le hromhraw tak chu,
LALPA chun inlet a ta,
Rûlpui vuong thei Leviathan,
Inziel hnûr chu hrem a ta,
Tuipui dragon chu that a tih.
2 Chu ni a hung tlung pha chun,
A grep huon thra chanchin chu,
LALPAN hieng hin hril a tih:
3 Kei, LALPA hin ka vĕng a,
Tuiin ka chawm zing hlak a,
Tu khom suksiet lo dingin,
Sŭn le zăn ka vĕng a nih.
4 Ka lung sen zing ta naw nih.
Hmêlma hling le buor hai chu,
Kei ngeiin hmason ka ta,
Meiah raw hmang vong ka tih.
5 Chuong chu a ni naw khomin,
Ka kuomah hung tlu lŭtin,
Mi hung inrempui hai sien,
Dawvan hung kai raw hai se.
6 Hun la hung tlung dinga chun,
Jakob chun zung kei a ta,
Israelhai chu hung kŭmŭmin,
La hung par vul nawk an ta,
An rain khawvel sip a tih.
7 Anni vawtuhai a vuok angin,
LALPAN anni a vuok ve nawh;
Anni thattuhai a that angin,
Anni chu a that ve nawh.
8 An phu ang chara hremin,
Saltang dingin a tir suok a,
Khawsak thli a’n lĕn hmangtir.
9 Hnam dang maicham lunghai,
Chinai anga rawt phit vong a,
Asera lim thinghai phûr a,
Rimtui rawna maichamhai,
An sukbo vong huna chauh,
Jakob thlahai suolna chu,
Ngaidam hung ni chauh a ta,
Israelhai suolna rà po po,
Lak hmang ni ve chauh a tih.
10 Kul khuohai a ram vong a,
Thlaler hmun rè a’n chang a,
Ranha’n tlatna hmuna neiin,
Bok khawmnain an hmang a,
Thing hnahai an pet kol zo.
11 Thing zărhai an inrieu a,
A kauhai an hung rop thla a,
Nuhmeihan meia ti dingin,
A kâu trawlhai an fom khawm.
Hrietthiemna nei lo hnam an na,
An Siemtu’n a lunginsiet naw a,
An Siemtun a lainat bok nawh.
12 Chu ni chun buphal angin anni chu LALPAN a mal malin a kutin rût khawm a ta, sak tieng Eufretis vadunga inthoka thlang tieng Aigupta ruom chena Israelhai chu a hrizawla chun hung thruoi khawm a tih. 13 Chu ni chun tawtawrawt lien tak mût an ta, Asuria le Aiguptaa khawsa, thi lêng lĕng tahai chu hung kir an ta, Jerusalema tlâng thienghlima chun LALPA chu chawibiek an tih.