Inpâkna hla
26
1 Chu ni chun Judai rama mihan,Hi hla hi sak tang an tih:
Khawpui nghet tak el kan nei,
Sandamna bang le kulpuia,
Pathienin a huol vel chuh.
2 Hnam fel le ringumhai chu,
Kot hongpêkin in lûttir rawh.
3 I chunga lungril innghattu,
Nangma ring tlattuhai chu,
Thlamuongna famkim pein,
Anni chu huol him i tih.
4 Kumkhuoin LALPA ring ro,
LALPA JEHOVA ngei chu,
Chatuon lungpui a ni si.
5 Hmun insanga chênghai chu,
Ama chun a suktlawm a,
Khawpui inchung lûrhai chu,
Hnuoi tawkin a thrum hnuoi a,
Pilvut lai a’n zăltir a;
6 Mihaiin an sir sop a:
Nêksawra umhai kein,
Retheihai ke ngei el chun.
7 Mi fel lampui a tluongngil a,
Aw Mi Indik, mi felhai lampui chu,
Nangin i sukruolpek hlak.
8 A nih, LALPA i dan zawmin,
Nang chu kan nghak zing che a,
I hming hre zingtu ni hi,
Kan lungril nuom tak a nih.
9 Zanah ka thla’n a ngai che a,
Zing tieng ka thla’n a zong che.
Hnuoi ro i hung rèl pha le chauh,
Mihan thil fel thaw an tum hlak.
10 Mi rilohai chunga chun,
Zangaina inentir la khom,
Mi fel ni an tum chuong nawh.
Indikna rama ngei khom,
Thil suol an thaw zui zing a,
LALPA ropui an poisa nawh.
11 I kut phar sang la khom LALPA,
An mitin an hmu hrim hrim nawh.
An ta dinga i thrahnemngaizie hi,
Hrea an inzak theina dingin,
Hmelma ta dinga i sek khawl,
Mei khan lem tawl lem raw se.
12 Muongna mi pe rawh, LALPA,
Kan thil hlenhai po po hi,
Nangma thaw vong a ni si.
13 Aw LALPA le kan Pathien,
Lal dang khomin kan chungah,
Thu neiin an inlal hlaka chu,
I hming chauh a nih kan lam.
14 Thiin muol an liem zo a,
Hung kir nawk ta naw ni hai.
Nangman beiin i sukbohmang a,
Hriet zui hlaw an um ta nawh.
15 LALPA, kan hnam sukpungin,
Kan hnam hi i suklien a,
Kan ramri mi zauhpêkin,
Nangma i hung inchawimawi.
16 I thununna an tuor pha leh,
Beidongin an pan che, LALPA,
An rawl khom a suok zo ta nawh.
17 Nuhmei nau nei ding trêp lai,
Nauha se tuor lai ang elin,
LALPA, i hmaah kan um hi.
18 A nih, nau kan păi ve a,
Nauha se tuorin kan inrùm a,
Sienkhom thli chauh kan hring si.
Hnuoi sansuokna kan intlun nawh,
Khawvel mipuihai ta dingin,
Ieng khom kan hring suok nawh.
19 I mithihai chu hring nawkin,
An ruonghai chu tho nawk a tih.
Pilvuta zalhai hung har suokin,
Hlimin zaihla rem an tih.
I daidaw zing daidaw ang a na,
Hnuoiin a mithihai insuong a tih.
Israel tungdingna
20 Ka mihai, in pindanah lût ro,
Sûng tieng kot inkal khum ro;
A lungsen inkieng hma po chu,
Chu chun inbi hmang hrì ro.
21 A chĕngna hmuna inthokin,
Hnuoia mi suolhai hrem dingin,
En ta u, LALPA a hung suok mĕk.
Hnuoiin a mithi zăt puong a ta,
An ruong thup zing ta naw nih.