LALPAN hnuoi a hrem ding thu
24
1 Ngai ta, LALPAN hnuoi hi suksein,A sukram vong ding a nih.
A letin kei khup thop a ta,
A mi chenghai dai dar a tih.
2 Vantlang chunga a thaw angin,
Thiempu chungah thawng a ta,
Hotu chunga a thaw angin,
Siehlaw chungah thawng a ta,
A pi chunga a thaw angin,
Siehlawnu chungah thawng a ta,
Zortu chunga a thaw angin,
Inchawtu chungah thawng a ta,
Pûktu chunga a thaw angin,
Inpuktirtu chungah thawng a ta,
Battu chunga a thaw angin,
A batna chungah thawng a tih.
3 Hnuoi hi sukram dèr a ta,
Rok ram dèrin la um a tih,
Tiin LALPA chun a hril.
4 Hnuoi hi chârin rop a ta,
Khawvel hi nguiin zûr a ta,
Hnuoia chawimawi hlawhai chu,
Nguiin indom kun an tih.
5 Hnuoia cheng mipuihaiin,
Hnuoi hi an sukporche a,
Danhai an poisa naw a,
Thupêkhai an zawm naw a,
Kumkhaw thuthlung an bawsiet.
6 Chu lei tak chun hi hnuoi hi,
Trongsephur a lo ni ta a,
A sunga cheng mipuihai chun,
An suol thaw man intêlin,
Hnuoia cheng an hung kiem a,
A dam suok tlawmte an nih.
7 Grêp hrui a hung vuoi a,
Uoiin thar a hung kang a,
Hlimhlop chenhai an ngui zo.
8 Darbenthek ri a chawl a,
Hlimhlop ri a hung re a,
Tringtrang rimawi a rè tah.
9 Uoiin dawna hlim taka,
Hla sak ri a um ta nawh,
Zu chu kha an ti èm èm si.
10 Khaw ram le rausana chun,
In tin kot chu a’n kal vong a,
Tu khom lut thei a ni nawh.
11 Uoiin a um ta naw leiin,
Kotthlêrah an khêk chŭl a,
Hlim chu ngŭiah inchangin,
Hnuoi lawmnan zamuol a liem.
12 Khawpui a tlu ram vong a,
Kul kotkharhai an sat siet zo.
13 Oliv ra sawi tril hnung le
Grep sǐk hmaih zong ang elin,
Khawvel hnam tin la um an tih.
14 La dam sunhai chun lawmin,
Hlim takin khêk suok an ta,
Khawthlang rama chênghaiin,
LALPA ropuizie khêkpui an tih.
15 Khawsaka chênghai khomin,
LALPA ropuizie chawimawiin,
Thlierkara chênghai khomin,
LALPA, Israel Pathien hming,
Inpakin chawimawi raw hai se.
16 Mi fel an chawimawi ri chu,
Hnuoi kil tawpa inthok khomin,
Kan lo hriet phăk vê vong a.
Nisienlakhom kei ruok chun,
“Lungngaiin ka zûr tiel tiel,
Lungngaiin ka zûr tiel tiel,
Ka chung a va pik de aw!
Mi’n phattu chun mi’n phat peiin,
A mi’n phat zuol deu deu si”
Tiin ka lo hril ve thung.
17 Aw, hi leihnuoia chênghai,
Tritna le khur le chânghaiin,
An inhuol vel chêu a nih.
18 Tritna ri leia tlansie chu,
Khuorkhurûmah tlâng a ta,
Khuorkhurûma inthoka suok chu,
Chânga chun inâwk a tih.
Vàn kotkhar inhong a ta,
Ruopui vanawn sŭr a ta,
Hnuoi nghatsan inhnîng a tih.
19 Hnuoi hi koi dar vong a ta,
Hnuoi hi inchek dar a ta,
Hnuoi hi sawi letin um a tih.
20 Hnuoi hi zurui lawn ang elin,
A paiin pai tliei tliei a ta,
Tru sawi hnǐng ang ning a tih.
A bawsietnan a del rik a,
A tlu dêr a, tho ta naw nih.
21 Văna văn lêngruolhai chu,
Chu ni chun LALPAN hremin,
Hnuoi lalhai khom hrem a tih.
22 Ripa intânghai angin,
Anni chu khal khâwm a ta,
Tăng inah khum tawl a ta,
Ni iemani zăt hnungah,
Anni chu hrem tawl a tih.
23 Zion tlang, Jerusalemah,
Iengkim LALPA chun ro rêlin,
Lalin inthrung ta’ng a ta,
Upahan a ropuizie hmung an ta,
Thlăpa khi inzakin dâng a ta,
Nisa khom inzakin sen a tih.