Tura chungthu hrilna
23
1 Tura khaw chungthu chu hieng ang hi a nih:Aw Tarsisa longhai, trap ro,
Tura chu suksietin a um ta a,
In le long chawlna a nei ta nawh.
Kupraa thuthang in lo hriet kha,
Thu indik a ni si a.
2 Longpuhaiin an sukhausa,
Tuipui kama chenghai le
Sidona sumdawngtuhai,
To thriepin tră ta ro khai.
3 Tuipuia sumdawnghai chun,
Nile vadung kam tharsuok,
Sihor-a bu an hung tol a,
Hnam tinin an hung inchawk a,
Tura sum hnâr tak a nih.
4 Inzak rawh, aw Sidon,
Nang, tuipui kama kulpui nghet,
Tuipui chun hieng hin a tih:
“Nauha sè ka’n voi ngai naw a,
Nau khom ka hring ngai bok nawh;
Naupa ka chawm tlei naw a,
Naunu ka kei tlei bok nawh.”
5 Tura chanchin an lo hriet pha,
Aigupta mihai beidong an tih.
6 Tarsis panin tlân hmang ro,
Trap ro, thlierkara chenghai.
7 In hlimhlop chènna khawpui,
Khawtrotrima in khawpui,
Hla taka hmun khuor dinga,
Thruoi hlaktu cheu khawpui kha,
Hi khawpui hi a ni naw maw?
8 Lala mi tam tak siemtu,
Mi hausa tam tak indintu,
Khawvel hrieta sumdawng inlàr,
Neitu Tura chunga tlung dingin,
Tuin am hieng hi a ruot a na?
9 Iengkim LALPA thaw a nih,
An suong ropuina suktlawm a,
Hnuoi mi lărhai sukmuolpho din.
10 Aw, nangni Tarsis mihai,
Nile vakama an thaw angin,
In ramhai inlet ve ro khai,
Long chawlna in nei ta si nawh.
11 Tuipuiah LALPAN kut inletin,
Lalram tam tak a sawi hning a.
Foinikihai kul po po khom,
Sukse dingin thu a pek a.
12 Chun, ama chun an kuomah,
“Aw Sidon naunu, nu thienglàm,
Intlawmin i um ta si a,
Hlim ni hmu ta naw ti nih.
Tho la, Kupra-ah fe thla rawh,
Sienkhom, chu taka khom chun,
Hlim ni hmu chuong nawng i tih.
13 En ta, Kaldaihai ram hi,
Tì khop mi an um ta nawh.
Thlalera ram sahai tlatna dingin,
Asuria-han an inchangtir zo tah.
A’n huolna di’n in sang an bawl a,
An kulhai an rok fai kêl a,
Khaw ram an inchangtir tah.
14 Tarsis longhai, trap inrûm ro,
In kulhai a ram zo ta si a!
15 Chu ni chun Tura khuo chu lal dam kum zăt kum sawmsari sûng chu theinghilin um a ta; sienkhom kum sawmsari hnunga chun, nawchizor hlaa a hril angin hung um nawk a tih:
16 Tringtrang tumin khawpui fang rawh,
Mi nghil chang hnung, aw nawchizor;
Tringtrang tum la, hla sak treu rawh,
An hriet zing theina ding chein
ti ang khan.
17 Kum sawmsari hnungah LALPAN Tura chu hung kan nawk a ta, a sumdawngna hung insunzomtir a ta, khawvel ram po po leh nawchizor angin hung indawr ton nawk an tih. 18 A sum lam suok le a hlawhai po po chu LALPA ta dinga ser hran hung ni ta’ng a ta, thupru naw ni a, kol ru bok naw nih. A hlawkhai hnienghnâr taka LALPA hmaa rongbawltuhan fâk le dawn le silfen thra le mawi inchawknain hmang an tih.