Babulon chungthu hril lawkna
21
1 Babulon ram chungthua inlàrna hung chu:Negev nuoitu thrawngaleivir angin,
Thlalera inthokin rûntu a hung,
Ram tritrămuma inthokin.
2 Inlàrna râpum tak ka hmu a:
Phatsantu chun a phatsan a,
Mi roktu chun a rok a.
Elam, nangnin nor tung unla,
Media, nangnin hang inhuol ro.
Inrûmna a’n tlungtir po po chu,
Ka suktawp ta ding a nih.
3 Chuleiin ka tâi băwr vel hi,
A satin a sa huoi huoi a,
Nuhmei nau ha sê angin,
Inkon khopin a mi thrăm a;
LALPA thilthaw tum ka hrietin,
Khaw hre loin ka zoi thla a,
Pangzatin ka mit a’n vai.
4 Ka lung a chawmchawrok a,
Triin ka’n thin hlop hlop a,
Ka nghakhla khawfingchat khom,
Ka pang sukzatu a nih.
5 Dawkan an buotsai a,
Truongah zampher an pha a,
An făk a, an dawn a!
Tho ro khai, hotuhai,
In phawhai hriek năl ro!
6 LALPA chun ka kuomah,
“Fe la, kulah ralvêngtu sie la,
A hmu phot hung hril raw se.
7 Sakora chuong hung a hmu a,
A kop kopa hung an ni chun,
Sabengtung chunga chuong dam,
Sanghawngsei chunga chuong dam,
An hung sa a hmu bok chun,
Ngun takin en chieng sien la,
Lo inrălring hlê raw se” tiin.
8 Ralvengtu chu a hung khĕk a:
“Aw LALPA, kulbing sangah,
Sŭn nithlâkin ka ngîr zing a,
Zan khawvârin ka um bok a.
9 En ta u, sakor chungchuong mi,
A kop kopin an hung saw.
Anni chun hieng hin an hril:
‘Babulon a tlawm tah, a tlawm tah,
A pathien limhai po po khom,
Hnuoiah an tlu dar vong tah!’ tiin.
10 Hrizawla bu an chìl anga,
Chìl lo tuok tah aw ka mihai,
Iengkim LALPA thu min hriettir,
Israel Pathien thu ka hriet chu,
Ka hril sawng cheu a ni hi.
Edom chungthu hrilna
11 Dumaa chungthu chu hieng ang hin a nih:
Seir tlanga inthokin miin,
“Ralvengtu, zăn a bo vang ta?
Iengtik am khuo a var ding?”
Tiin a hung indon a.
12 Ralvêngtu chun a don a:
“Zingkhuo a var ding an tah,
Zanin zui nâwk vak a tih;
I’n don nuom năwk a ni chun,
Hung kir la, mi’n don nawk rawh”
Tiin ama chu a hril a.
Arabia chungthu hrilna
13 Arabia chungthu chu hieng ang hin a nih:
Aw Dedana inthoka hunghai,
Ran ruol le Arabia phŭla riekhai,
14 Aw, Tema khaw mihai,
Raltlân chăuhai ta dingin,
Făk le dawn ding hung chawi ro.
15 Kawlhnâm le thalngul hmanga,
An inbeina hmuna inthoka,
Hung tlăn suokhai an ni kha.