1 Suria lal Sargon chun a sipai lal tak chu Filistin khawpui Asdod bei dingin a tir a, a hne a. 2 Chuong lai chun Amoz naupa Isai kuomah LALPA thu a hung tlung a, “Fe la, i kâwnga i dierkei saiip kha hlîp la, i pheikhok khom kha hlîp bok rawh” a ta. A ti ang chun a thaw a, saruokin, pheikhok khom bun loin a fe ta a. 3 Chun, LALPA chun, “Ka siehlaw Isai hi kum thum zet saruok le pheikhok bun loin a um ta a. Hi hi Aigupta chunga le Ethiopia chunga buoina nasa tak ka hung intlungtir ding inchikna chu a nih. 4 Asuria lal chun Aigupta mihai le Ethiopia mihai chu a naupang a upain man khawm a ta, Aigupta muolphona dingin, saruok le pheikhok bun loin, mong inlangin thruoi hmang tawl a tih. 5 Ethiopia hratna le Aigupta ropuina inhnĕmpuituhai chu tri’ng an ta, sukzakin um an tih. 6 Chu ni chun tuifinriet kama chênghai chun, ‘En ta u, Asuria lal laka mi sanhim dinga ei ringsan le an mi thrangpui beiseia ei bêlhai kha ieng am an chang an ta maw! Iengtin am ei insan suok thei ta ding a na?’ la ting an tih” a ta.