Aigupta chungthu hrilna
19
1 Aigupta chungthua hril lawkna thu chu:En tû, sûm hrât tak chungah chuongin,
Aigupta panin LALPA chu a hung.
A hmaah Aigupta milimhai inthinin,
Aigupta mihai lungril a tui inzop.
2 “Aigupta miin Aigupta mi,
Do dingin chok phûr ka ta,
Unau le unau,tuolbawm le tuolbawm,
Khuo le khuo, ram le ram,
Indo tuong an tih.
3 An lungril hung zuoi a ta,
An thil tum suktlol ka ta,
An milimhai râwn an ta,
Mithi thlarau râwn an ta,
Aisânthiemhai râwn an ta,
Rau ko thiemhai râwn an tih.
4 Hotu rawng le suol tak kutah,
Anni chu pe suok ka ta,
Lal kol takin hruol tawl a tih,”
Lalpa, Iengkim LALPA chun a tih.
5 Vadung tui kang vong a ta,
Vakam inhil bor bor a tih.
6 Tuilamhai hung thŭng a ta,
Aigupta va hnâr tui chu,
Hung tlawmin kang vong a tih.
Phairuong le tui hlohai chu,
Vuoiin hung rop vong a ta,
7 Nile kam le a suo lai a,
An thil chinghai po po chu,
Trawlin hung rop zo a ta,
Thliin len hmang vong a ta,
Hmu ding hrim um ta naw nih.
8 Ngamantuhai trap an ta,
Nile-a ngakuoi thlaktuhai,
Lĕn denga khawsahai chu,
Beidongin inrûm an tih.
9 Jija khâwnga fak zonghai chu,
Beidong takin um an ta,
Puon zai inhmi khâwngtuhai chu,
An beisei bo dêr a tih.
10 Pat thema inhlawhai chu,
Lungzîngin ngûi tlep an ta,
Inhlawfahai lungngai an tih.
11 Zoan khuo thruoituhai chu,
Invêt um khawm ruol an nih;
Faraw remruottu mi varhaiin,
Thurawn hmang lo an pĕk a.
Iengtin am Faraw kuomah,
“Mi var pakhat vĕ ka na,
Tien lai lalhai thlă ka nih”
An ti ngam hrim hrim a na?
12 Khaw la’m i mi varhai chu?
Aigupta laka Iengkim LALPAN,
A thaw tum inentirin,
Chieng takin hril che raw se!
13 Zoan khaw thruoituhai chu,
An hung invĕt zo ta a,
Memfis-a thruoituhai khom,
Hlèmbăwla um vong an nih;
Mipui innghatna banhaiin,
Aigupta an thruoi hmang si.
14 LALPA chun an lu chungah,
Lu hâina thlarau a buok a;
Zurui chu a luok bulah,
A pai chon chon hlak angin,
Aigupta thilthaw tinreng,
Fe indik khur a um ta nawh.
15 Mi hausa amanih rethei,
Mi poimaw amanih poimaw lo,
Tu khom ta din Aigupta chun,
Thawpêk thei a nei dèr nawh.
16 Chu ni chun Aigupta mihai chu nuhmei ang el ning an ta, Iengkim LALPAN kut a hlăng khum an hmu chun triin inthin hâwp an tih. 17 An chunga tlung ding LALPA thu ruot lei chun Judai ram chu Aigupta mihai pangzat hung ning a ta, Juda hming an sàm ringot khomin thlabâr an tih.
18 Chu ni chun Aigupta rama khawpui pangahai chun Hebrai trong hmangin Iengkim LALPA chungah ringum dingin thu intiemkam an tih. Chuong laia khaw pakhat chu Heliopolis, Nisa Khawpuia ti a nih. 19 Chu ni chun Aigupta laili-ah LALPA ta dingin maichăm um a ta, a ramria chun LALPA ta dingin lungphun um bok a tih. 20 Chu chu Iengkim LALPA ta dinga Aigupta rama inchikna le hrepuitu ning a tih. Nêksawrtuhai leia LALPA an ko pha chun, sandamtu le humhimtu an kuomah tir a ta, ama chun anni chu san suok a tih. 21 LALPAN Aigupta mihai kuomah ama inhriettir a ta, chu ni chun LALPA chu hung pom ta’ng an ta, hlanbiekna thilpek inhlànin chawibiek ta’ng an ta, LALPA kuomah thu tiem an ta, chu chu hlen bok an tih. 22 LALPAN Aigupta chu hripuiin hrem a ta, a hrem leiin Aigupta mihai chu LALPA tieng hung nghang an ta, an hnǐna chu lo ngaithlang a ta, sukdam tawl a tih. 23 Chu pha chun Aigupta le Asuria chu lamlienin sun tlang ta’ng a ta, Asuria mihai chu Aiguptaah fe’ng an ta, Aigupta mihai chu Asuria ramah fe bok an ta, Aigupta mihai le Asuria mihai chun Pathien pakhat chawibiek tlàng tàng an tih. 24 Israel ram chu an inzompui ram ni’ng a ta, an pathumin inthukop an ta, khawvel lailia malsawmna ni’ng an tih. 25 Iengkim LALPA chun, “Ka mi Aiguptahai, ka kutsuok Asuria-hai, ka rochan Israelhai chu malsawmin um raw se” tiin mal a sawm tawl ding a ni si a.