Ethiopia chungchang thu
18
1 Nile vadung hrûla um Ethiopia,Khàu anga thla zâp ri hum hum,
2 Nile vadungah phairuong longa
Palai hung tir hlaktu ram chu,
A chung a va hang pik de aw!
Hnam duongkai thra le pangti nâm,
An kawl le kienga mihai trìsim,
Hnam kol le trong dang hmang mi,
Nile vadungin a thre dar rama
Chênghai kuoma chun fe ro,
Aw nangni palai truonthrahai.
3 Khawvela chênghai po po,
Leihnuoi hluotu po poin,
Tlângah indona puonzar,
Ka khai pha hmu seng in tih.
Tawtawrawt ka mût pha leh,
A ri hre seng bok in tih.
4 Hi hi LALPA mi hril a nih:
“Sŭn luma laiking bel raw angin,
Busîk hun thrâl rum vâng laia
Daidaw pâitu sûm ang elin,
Ka chengna hmuna inthokin,
To zingin zuk thlir ka tih”.
5 Grep a păr a, a hung ra a,
A pàrhai a hung rĕm a,
Grep hmina a’n chang hmaa,
Theikung thrumnaa a kauhai,
At bonga an dehawn angin,
Ethiopia khom la sâm a tih.
6 Tlanga vate hnukrawlhai le
Ram sahai tlăn dinga maksanin,
Nipui sung vate hnukrawlhan,
Thlasikah ramsahan tlăn an tih.
7 Chu hun chu a tlung pha chun,
Hnam dung insang le pangti nâm,
An kawl le kienga mihai trìsim,
Hnam kol le trong dang hmang mi,
Nile thre darh ramhai khom,
Iengkim LALPA kuomah hungin,
A hming umna Zion tlangah,
Thilpêk hung chawi ta’ng an tih.