Damaska chungthu hrilna
17
1 Damaska chungthu chu hieng ang hin a nih:“Ngai ta, Damaska khawpui chu,
Chimin tlu se vong a ta,
Khawpui ni zing ta naw nih.
2 Aroer biela khuohai chu,
Rausanin um vong a ta,
Beram ruol bok khawm an ta,
Suktritu um ta naw ni hai.
3 Kula inhuon khawpui hrim hrim,
Israel ramah um ta naw ni a,
Damaska inlalna tawp a ta,
Aram mi la um sunhai chun,
Israel chan ang chang vein,
An ropuina la chuoi veng a tih,”
Iengkim LALPA chun a tih.
4 “Israel ropuina chu
Chu ni chun chuoi tang a ta,
A ram hausakna po po khom,
Zûr thla zo vong tang a tih.
5 Refaim ruoma bu sîk huna,
Buphal an lak khawm hnung a,
Lak hmai zong ang ning a tih.
6 Oliv ra sawi tril hnung a,
A zik tieng pahni pathum,
A buk thratnaah pali panga,
A la um ang chauh ning a tih,”
LALPA, Israel Pathienin a tih.
7 Chu huna chun mihai chu,
Anni Siemtu tieng nghain,
Israel Mi Thienghlim en an tih.
8 An kuta siem maicham tieng,
Ngha zing ta naw ni hai a,
Kuta siem Asera lim thing dam,
Rimtui inhlànna maicham dam,
Ngaisang ta bok naw ni hai.
9 Chu ni chun khaw nghet tak tak kha hmaa Israelhai leia Hiv mihai le Amor mihai lo tlansan ang khan an khawpui kul nghet tak tak hai chu ram hnuoi chimbuk kara rausan khuo ang vong ni tang a ta, khaw ram inchang tang a tih.
10 In Sandamtu Pathien chu,
In lo theinghil dêr ta a,
In himna kul Lungpui chu,
In hriet fuk ta ngai bok nawh.
Hmun danga inthoka in lak,
Grep thra tak phun inla khom,
11 An inthrang nuom êm leiin,
Ni khatin inpărtir inla khom,
Grep ra hrim lo naw ti niu a,
In sìk ding chu lungngaina le
Natna benvon chauh ning a tih.
Hnam dang suksiet an ni thu
12 Hnamhai lungsen a hrâng ie,
Tuipui insok ri ang a nih!
An ri hang sosang dan chu,
Tui tam tak ri ang a nih.
13 Tui lien sang ang hum humin,
So buon buon hai sienla khom,
Aman a zilhau pha chu,
Hla takah tlan hmang an ta,
Tlanga busi thli len dar ang le
Thlipuiin kokbong a fen angin,
Anni chu hnot lengin um an tih.
14 Zan tienga trium rapthlak chu,
Khaw var hmain a bo zo tah!
Chu chu mi roktuhai chan a na,
Chu chu mi suomtuhai chan a nih.