16
1 Thlalĕr dep Sela khuoa,Moab mi raltlànhai chun,
Ram rorêltuhai kuomah,
Dawvan an kaina dingin,
Beramte an hung chawi ie,
Zion naunuhai tlanga chun.
2 A bua inthoka rau darh,
Vate vuong vel ang elin,
Arnon vadung kăi vèlah,
Moab nŭhai an invăkvài.
3 “Kan um dan ding mi rêlpekin,
Nangnin rem mi ruotpek unla,
Sunchangah thingbuk zar angin,
In hlimah min chawl damtirin,
Râltlanhai hi mi hliekhu unla,
Hmêlma kutah min hlàn naw ro.
4 Moab mi, vâkvaihai hi,
Nangni lai kan um phal unla,
Mi sukbohmang tumtuhai lakah,
Kan inbikrukna ni ro”
Tiin Judahai chu an ngèn a.
Neksawrtu la bo a ta,
Sietnahai khom la rêng a ta,
A rama inthokin rûntu khom,
An inkieng hun la tlung a tih.
5 Davida sungkawa mi ngei,
Lalin la hung inthrung a ta,
Ringumna le hmangaina leh,
Thudik tranin, ro fel takin,
A la rĕl ding a ni si a.
6 Moab-hai chapo dan kan hriet-
An chapo dan a hleihluok;
Mi an chaldel, an tuklul bok,
Umze boa uongthuong an nih.
7 Chuleiin, Moab mihai po poin,
Moab chana tlu chu sûnin,
An rêngin an trap khĕk a nih.
Kir Hareset mihai ta dingin,
Lungse vankaiin trap ro.
8 Hesbona huonhai an rĕm zo a,
Sibmaa grep huonhai khom.
Grep thra anga inzam dar Moab,
Jazer khuo chen inzâm a,
Thlaler ramah inzâm lût a,
A kâupenghai inzâm dar a,
Tuipui thi chena inzâm chu-
Hnam tin lalhan an pal sop tah.
9 Jazerin Sibmaa grep huon,
A tră angin ka tră ve cheu a nih.
Aw Hesbon, Aw Eleale,
Mitthliin ka’n siltir cheu hi!
I thei hmin chunga i lawm rihai,
Busik huna i hlim rihai kha,
Tu hin a va hang rè ta ngei de!
10 Thei huona hlimna rihai kha,
Lak hmangin a um ta a,
Grep huonah tu khom khêka,
Zai hla rem an um ta nawh.
Grep sir sawrna khura hai,
Uoiin sawr ta naw ni hai,
Hlimna ri ka suktawp ta si.
11 Tringtrang ri inuoi ngawi angin,
Ka lungrilin Moab a sŭn a,
Ka lairil takin Kir Hareset.
12 A hmun sanga Moab kai chu,
A sawl thlawn mei mei a nih;
A tempula a trongtrai khom chun,
Trangkaina a nei dêr nawh.