Moab-hai chungthu hrilna
15
1 Moab-hai chungthu hril lawkna chu:Moab rama Ar khuo chu,
Zan khat thilthu’n a ram ie!
Moab rama Kir khuo khom,
Zan khat thilthuin a ram!
2 I mihai chun Dibon-a
Hmun sang tempula hai chun,
Nebo le Medeba chan chu,
Sûnin trap tlok tlok an ta,
An lu met kol vong an ta,
An khăkhmul khom tan an tih.
3 Kotthlêrah saiip silin,
In chung le tuol zawla hai,
Dingthrathruona inthrungin,
Trapin khêk rong rong an tih.
4 Hesbon le Eleale trap ri chu,
Jahaz chen a’n hriet phak a,
Chu chun Moab sipaihai lungril,
Nasa takin a sukzăm a,
Lungdongin an trap rŭt rût.
5 Ka lungrilin Moabhai a tra.
Zoar le Eglat Selisia chenin,
Mipui chu an ràltlàn a.
Trap pum zinga pan tungin,
Luhit khuo chen an tlung a,
Horonaim lampui tluonin,
An siet tuok chu an tra a.
6 Nimrim tui chen a kang a,
Hlohai an hung vuoi zo a,
Thil mawnghai an thi vong a,
Hmun hring hrim a um ta nawh.
7 Rosum an khawl khawmhai chu,
Phurin an tlănpui tawl a,
Phahrâm Ruom răl tieng an pan.
8 Moab ramri intluonin,
An trap ri a thangkhawk a,
An chieu riin Eglaim a tlung a,
An inrûm riin Beer Elim a tlung.
9 Dimon vadung tuihai chu,
Thisenin a pol sen kul a,
Chu nêka râpthlak lem chu,
Dibon chungah la tir ka tih:
Moab rama inthoka râltlàn le
A rama la um sunhai chu,
Sakeibakneiin sè hlum a tih.