Saltang kir nawkhai
14
1 LALPAN Jakob lunginsiet a ta,Israel chu hung thlang nawk a ta,
An ramah inchengtir nawk a ta,
Ram dang mihan hung panin,
Jakob sunghai hung bĕl an tih.
2 Hnam tinin hung thruoi an ta,
An ram ngeiah fepui an ta,
LALPA ramah chuong mihai chu,
Siehlawpa le siehlawnuah,
Israelhan la sor an ta,
Sala neituhai chu salah man an ta,
Nêksawrtuhai chunga ro la rêl an tih.
Mithi khuoah Babulon lal
3 Inrim tak le rawng taka sala in intangna le buoina in tuoknaa inthoka LALPAN a’n chawltir pha cheu chun,
4 hi ti-elna thu hi Babulon lal chu in insam khum ding a nih:
Neksawrtu chu i va rè ta ngei de!
I vaupŭm khom a va rè ta ngei de!
5 LALPAN i rîtlona hmol le,
I lal hmol a suktliekpek ta che.
6 Chu hmol chun lungsen eltiengin,
Mipui i vuok zot zot hlak a,
Hnam danghai chawl loa nêkin,
Rawng takin i tukdol hlak kha.
7 Ram po po ralmuonga chawlin,
Zai hla an rem thei nawk ta hi.
8 Lebanona far le sidarhai chenin,
I chungthu leiin an lawm a,
“Suktlawma i um hnung hin chu,
Mi phûr ding an hung ta nawh”
Tiin lawmin an hril a nih.
9 Hnuoia Seol, mithi khuo chun,
I tlung hun ding an tŭng a nih!
Fam lo chang tah thlarauhai chu,
Hmuok ding chein a chok tho a,
Hnam tin lalhai an hung tho ie,
An lalthrungphaa inthokin.
10 An rêngin nangma chu bein,
I kuomah hieng hin hril an tih:
“Nang khom keinihai ang bokin,
I chău ve dèr el an ta maw?
11 I ropui bùng bûng vei leh,
I perkhuong ri se po po leh,
Seol-ah thruoi thlak i ni ta si.
I puonphá chu thil ngê a na,
I sil ding chu thil lung a nih.”
12 Aw nang “Vartrien naupa le
Sikhawvar’ inti hlak pa,
Vana inthokin i tla dêr el a!
Nang, hnam danghai suksetupa,
Hnuoia pei thlakin i um ta hi!
13 ‘Vanah hang lawn kai ka ta,
Pathien arasihai chunga khin,
Ka lalthrungpha indin ka ta,
Hmar tawp kil, pathienhai tlangah,
Lalthrungphaah inthrung ka ta,
14 Sûm chungah hang kăi ka ta,
Chunghnungtak tlukah insiem ka tih’
I ti lungril hlak vei leh khan!
15 Sienkhom Seol khur mong rĕtah,
Nam thlâkin i um ta si.
16 A hmu phot che chun en zuiin,
“Hi hi maw hnuoi sawi hnìng a,
Lalramhai sawi danglamtu kha?
17 Hnuoi hi thlalèra inchangtir a,
Khawpui tam tam suksetu le,
A sal manhai insuo nuom lo kha?
Tiin i chungthu la hril an tih.
18 Hnam tin lal chu mani thlanah,
Ropui takin an zal tawl a.
19 Kâu hmang lo sat thlak angin,
I thlàna inthoka pei suokin,
Râl kuta thi, kawlhnâma sun tlang,
Ruong an sir ziel mei meihai leh,
Thlan khatah vui liem an ti che.
20 I ram chu i suksiet a,
I khuo le tuihai i that leiin,
Anni lai phumin um ve naw ti nih.
Mi rilohai suonhai chu,
An hming sàm zui naw nihai.
21 An pahai suolna leiin,
A nauhai that ram pei ro:
Ram hluo a, lal hung ni a,
Khuo siem a, hluo sip dinga,
An kir nawk ta nawna dingin.
22 “Anni bei di’n hung tho ka ta,
Babulona inlal ta lo dingin,
An hming chu nuoi bo ka ta,
A dam khawsuok sunhai le,
An nauhai le an thlahai chenin,
Ka sukbohmang ding a nih.
23 Simbua chêngnaah siem ka ta,
Chirdûpah inchangtir ka ta,
Sietna hmunphiin phît ka tih”
Tiin Iengkim LALPAN a hril.
Asuria siet ding thu
24 Iengkim LALPAN hming sâl meuin,
Hieng ang hin thu a’n khàm a:
“Ka tum dan angin tlung a ta,
Ka thu ruot dingchang a tih.
25 Ka rama ngei hung thruoiin,
Asuria chu tukdol ka ta,
Ka tlângpuiah sir sop ka tih.
Ringkol a lo inbăttirhai chu,
Keiin hlip thlapek ka ta,
An liengkoa inthokin,
An rikphur chawi thlang ka tih.
26 Khawvel pumpui ta dinga,
Chu chu a thaw tum a nih;
Chu kut chu hnam tin chungah,
Inlet a ni tah zing bok.
27 Iengkim LALPA thaw tum chu,
Tuin am sût thei a ta?
A kut inlet ta hnung chu,
Tuin am kei thlang a ta?
Filistinhai chungthu hrilna
28 Lal Ahaz a thi kumin,
Hi thu hi a hung tlung a:
29 Filistin mi po pohai,
An vuokna hlak cheu hmol chu,
A tliek leiin lawm naw ro;
Kha rûl tuia inthok khan,
Rûlngân dang hung suok a ta,
Chu rûl chu tûra sip rûl,
Rûl vuong thei la ning a tih.
30 Rethei mongtolhan tlatna,
LALPA bulah hmu’ng an ta,
Tlasamhai chu muong takin,
A bulah chawldam an tih.
In zunga suokhai ruok chu,
Tràmnain sukhlum ka ta,
I dam la um sunhai khom,
Ka sukhlum vong ding a nih.
31 Aw kotpui, trap khêk rawh!
Aw khawpui, trap inrûm rawh!
Nangni Filistinhai, zop thla ro!
Mei khu lui lui angin hmar tieng,
Sipai an hung mup mup a,
A hnufuol hrim an um nawh.
32 Filistin hnam palaihai chu,
Iengtin am ei lo don ta ding?
“Zion chu LALPA indin a na,
A mi, sukdùdana tuorhaiin,
Chu chun himna hmung an tih”
Tiin in hril ding annawm.