Babulon chungthu hrilna
13
1 Babulon chungthu hril lawkna Amoz naupa Isaiin a hmu chu:2 Muol kol sǐpah puonzar khaiin,
Anni chu ko khêk unla,
Mi lienhai kotkhara lût di’n,
Anni chu kutin hûi ro.
3 Ka mi thienghlimhai thu ka pek a,
Ka lungsenna hrîk thla dingin,
Ka mi huoisenhai ka khâwm tah,
Ka hnĕna chunga lawmhai chu.
4 Ngai ta u, mipui tam tak ri ang,
Tlanga ri so nuoi nuoi chu!
Hnam tinhai khĕk ri a na,
An sipaihai an khâwm a ni chu!
Iengkim LALPA chun indo din,
A sipaihai a khâwm a nih.
5 Hla taka inthokin an hung,
Kawl kil tawp rêta inthokin.
A ram pum sukse vong dinga,
LALPA hriemhrei hmang an nih.
6 LALPA ni chu a hnâi ta a,
Nasa takin trap khêk ro,
Iengkimthawtheia inthokin,
Sietna rapthlak hung tlung a tih.
7 Hi lei hin kut po po zoi a ta,
Lungril tin intui zop a tih.
8 Thlaphangnan man tawl a ta,
Natna le lung natnan thrâm a ta,
Nau hase tuor angin inkon an ta,
Anni le anni inpangzat an ta,
An hmèl mei angin sen phût a tih.
9 En ta, LALPA ni, ni rapthlak tak,
Lungsen sosang le trium ni chu,
A hung tlung ding a ni tah.
Ram chu rausan ramah siem a ta,
A sunga mi suolhai that vong a tih.
10 Arasi le arasi bawrhai khin,
Var insuo ta naw ni hai a,
Zing ni suok chu inthim a ta,
Thlà khom var ta bok naw nih.
11 Khawvel hi a suolna leiin,
Mi suolhai chu an suolna leiin,
Ka hrem tawl ding a ni si a.
Chapohai uongthuongna po po,
Ka suktlawm vong ding a nih.
12 Rangkachak hlîr nèk khomin,
Ofir-a rangkachak nêk khomin,
A dam khawsuok mi vâng an tih.
13 Iengkim LALPA lungsen ni,
A lungsen intŭr ni chun,
Van sawi hnǐng dur dur a ta,
Hnuoi hi inson dăwr khopa,
Sukhnîngin la um a tih.
14 Mi pêl lai sazuk tuoi ang le
Vêngtu um lo beram ruol angin,
Mi tinin mani mihai bĕl dingin,
An ram tieng râlzâm an tih.
15 An hmû phot sun tlang an ta,
An man phot sât hlum an tih.
16 An nautehai chu an hmu ngeiah,
Hnuoi vuoknan hmangpek an ta,
An inhai rokpek an ta,
An nuhmeihai pawngsuol an tih.
17 En ta u, Babulon chu bei dingin,
Tangkaa tlon lungawi thei lo,
Rangkachak ienga khom ngai lo,
Media mihai ka chok tho a nih.
18 An thalin tlangvalhai kap tlang an ta,
Naute chungah za ngai naw ni hai a,
Naupang lunginsiet bok naw ni hai.
19 Lalram lunghlu Babulon,
Kaldaihai suongtawlol khawpui chu,
Sodom le Gomora ang bokin,
Pathienin a sukram ding a nih.
20 Tu khomin hluo ta naw ni a,
Tu thla khom cheng ta naw nih;
Arab mi khuolzinhaiin,
Puon in kei ta naw ni a,
Berampuhan an beram ruol,
Intlattir ta ngai naw nih.
21 Thlaler ramsahai chêng an ta,
Sihal hon inzi nuoi nuoi an ta,
Chingpirinuhan bû sep an ta,
Sakĕlhai tuolchaina ni tang a tih.
22 Kulah satene hon inhrâm an ta,
Lal inah sihal ruol inhrâm an tih.
Hrem a ni ding hun a hnâi ta a,
Hun sawt riel ni ta naw nih.