10
1 Dan indik naw siem suok a,Nêksawrna thu petuhai chu,
An chung a va pik de aw!
2 Ka mihai chu nêksawrin,
Rethei, hmeithai le fahra hai,
Chanvo an inchŭ thlăkpĕk a,
Hmeithaihai an soisak a,
Fahrahai rokin an suom.
3 Ram hla taka inthoka,
Sietna ka hung tir pha leh,
Iem in chang hrim ding a na?
Thrangpuitu tu’m in ko ding?
In hausakna po po kha,
Khawlam in thup hmang ta ding?
4 Sala an manhai laia
Lo inthin hawp ve el le,
An thathai laia thrang chu,
In chan ding um sun a nih.
Chuong ang hiel chu ni sien khom,
A lungsen a re naw a,
A kut a la hlâng zing tho.
Asuria chunga Pathien rorel
5 Ka lungsenna hmol Asuria chu,
A chung a va pik de aw!
Ka lungsenna hmoltum chu,
Kutin a chawi zing a nih.
6 Pathien inza lo hnam chu,
Do dingin ka tir suok a,
Ka lung suksentu bei di’n,
Ama chu ka tir a nih:
Râllâkhai chu làkpèk a,
Suom thei po po chu suom a,
Kotthlêra chirhak ang a,
Anni chu chîl pher dingin.
7 Sienkhom chu chu a tum nawh,
Ngaituo khom a ngaituo nawh.
Hnam tam tak rawt ram treuh chu,
A tum rŭk a lo ni lem.
8 ‘Ka kawmandar po po hi,
Lal tluk seng an ni naw maw?
9 Karkhemis ka tukdol angin,
Karno khuo ka hne an naw maw?
Hamath khom Arpad angin,
Samaria khom Damaska angin,
Ka soisak tawl a ni kha.
10 Milim betuhai ram chu,
Ka kut ngeiin ka lâk a,
Jerusalem le Samaria nêka,
Hming inthang lem vong an nih.
11 Samaria le a milimhai,
Ka soisak tah ang char khan,
Jerusalem le a milimhai khom,
Ka soisak ve naw di’m a ni?
Tiin a hril vel a ni kha.
12 LALPA chun, “Zion tlang le Jerusalem chunga ka thaw tum po po ka thaw zo pha leh, Asuria lal chu a lungril a chapo èm lei le uongthuong taka a meng leiin ka hrem ding a nih” tiin a hril.
13 Asuria lal chun hieng hin a hril a:
“Ka kut hrătin hieng hi ka thaw a,
Varna le hriet thiemna ka nei leiin.
Hnam tin ramrihai ka son kuol a,
An rosumhai ka rokpĕk a,
Mi hrât khawkhĕng ang elin
An lalhai ka tukdol a.
14 Kuta vate bu luok angin,
Hnamhai hausakna ka luok a,
Mihan a pui rausan hnunga
A tui an lak khawm angin,
Ram tam tak ka luok khawm a,
Zak khawng ngam an um naw a,
Inhrâm ngam an um bok nawh.”
15 Hreipui hmangtu chunga chun,
Hreipui a uong thei hlak maw?
Thing àtna hmangtu chungah,
Thing àtna a uong thei maw?
Hmol tumin a lektu chungah,
Hmol a lek khum thei naw a,
Funghrol khom a thruntu boin,
Amain a lawn thei nawh.
16 Lalpa, Iengkim LALPA chun,
A ralhrathai chunga chun,
Ropna hri inlèngtir a ta,
A ropuinan em kâng a ta,
Meipui angin chok an tih.
17 Israelhai Èntu chu,
Chu mei ngei chu ni’ng a ta,
An Mi Thienghlim ngei el chu,
An meiser chu ni’ng a ta,
Chu chun ni khat thilthuah,
Buor le hlo hling neihai chu,
Kăngin sukbohmang a tih.
18 A ramngaw zîng khup el le
A ramchang hmun thrahai chu,
Ngor an zŭr hmang ang elin,
A rop se vong ding a nih.
19 A thi bâng um sunhai chu,
Naupangin an tiem khop chauh,
Mi tlawmte chauh ni’ng an tih.
Hlaa um sun Israelhai
20 Chu ni chun hlaa la um Israelhai,
Jakob sungkuo dam khawsuokhai chun,
Anni thattuhaiah innghat ta loin,
LALPA, Israel Mi Thienghlima chun,
Titakzetin innghat lem tang an tih.
21 Hlaa la um sunhai laia,
Jakob thla la dam sunhai chu,
Pathien Hrat kuomah kir nawk an tih.
22 Aw Israel, i mihai tamzie chu,
Tuipui trieu ang hiel khom ni sien,
Hlàa umhai chauh kir nawk an tih.
An phŭ anga siet tuok dinga,
Fel taka rèl sá a nih.
23 Lalpa, Iengkim LALPA chun,
A ram puma sietna intlun dinga,
Thu a lo ruot tah ang ngeiin,
Amain hung hlen suok a tih.
24 Lalpa, Iengkim LALPA chun,
Hieng thu hi a hril a nih:
“Aw, Ziona chêng ka mihai,
Aigupta mihai thaw ang khan,
Asuria-han hmola vawin,
Kut inlet khum sien cheu khom,
Anni chu trì dêr naw ro.
25 In chunga ka lungsen hi,
Ka lâk kieng vak ding a na,
Anni suksietna dingin,
An chungah fu ta’ng a tih.
26 Horeb lungpuia Midianhai,
LALPAN a sukhlum ang khan,
Iengkim LALPAN anni chu,
Vuokna hruolin vuong a ta,
Aiguptaa a thaw ang khan,
Tui chungah hmol hlâng a tih.
27 Chu ni chun in liengko a,
Phurrik an innghathai chu,
Hlip thlâkin um ta’ng a ta,
Bawi ringkol in bàthai khom,
Sukbongin um tang a tih,
In hung thau ta hle si a.
28 Aiath khuo an lut ta a,
Migron khuo an hung pĕl a,
An thuomhnawhai po po chu,
Mikmas-ah an sèk khawm a.
29 Chu zoah kawn an liem a,
Geba khuo-ah an riek a,
Rama khuohai an inthin a,
Saula khuo Gibeahai an tlan sie.
30 Aw Galim naunuhai khêk ro,
Laisa khuohai, lo ngaithla ro,
Aw Anathot, lo don ta la!
31 Madmena chu a tlan se a,
Gebim mihai an inbi a.
32 Voisun Nob-ah châm an ta,
Zion naunu tlang, Jerusalem chu,
An kuttum inhmu’ng an tih.
33 Lalpa, Iengkim LALPA chun,
Thing zăr angin tha hnĕ takin,
Sok thla hmok hmok tawl a ta,
Thing lienhai chu phûr a ta,
Thing insanghai ngâwr a tih.
34 Rampui chu hreipuiin vât a ta,
Lebanon thing insang lûr angin,
Asuria chu phûr thlŭng a ta,
Mi Hrât hmaah inthal a tih.