Lal hung suok ding
9
1 Nisienlakhom, beidonga umhai khom lungzîng zing ta naw ni hai. Tien lai chun Zebulun ram le Naftalia ram chu a suktlawm a, sienkhom hun la hung dinga ruok chu Jordan vadunga inthoka tuipui panna lampuia um Jentelhai chengna Galili ram chu ropui taka chawimawiin um a tih. 2 Thim hnuoia kalchawihai chun,
Var ropui tak an hmu a,
Thina hlima chênghai chungah,
Zing khaw mawi a hung var a.
3 Chuong hnamhai chu suklienin,
An hlimna i sukpung a,
Bu sik huna an lawm angin,
Râllâk sum insem chânga,
Nasa taka an hlim angin,
I hmaa chun an hlim a.
4 Midianhai i hnè ni ang khan,
An rikphurna ringkol hai,
An thil inkotna liengkot hai,
Neksawrtuhai hmoltum hai,
Nangin i suktliekpek tah.
5 Indonaa mihranghaiin,
An bun hlak pheikhokhai dam,
Thisen kai an thuomhai dam,
Meiin la raw hmang an ta,
Thing angin la ti’ng an tih.
6 Ei ta dingin nau a pieng a,
Naupa pĕkin ei um a,
A liengkoa chun rorêlna,
Innghatin kengkaw’ng a ta,
A hming chu Remruottu Mak,
Pathien Hrât, Chatuon Pä,
Remna Lal la ti’ng an tih.
7 A ram lien zuol pei a ta,
A ramah inremnain,
Tawpintai nei ngai naw nih.
Davida lalthrungphaah,
Thrungin ro hung rêl a ta,
Indik tak le fel takin,
Chu hun le chatuon chenin,
A ram chu suknghet a tih.
LALPA thrahnemngainain,
Chuong po po chu thawng a tih.
Israel laka LALPA lungsenna
8 Israel chunga tlung ding chu,
LALPAN Jakob sungkuo a hril a.
9 Israel ram le Samaria mihan,
An rêngin la hrieng an tih.
Anni chun chapo tak le
Lungril uongthuong tak elin,
10 “A trêklei chim tahai chu,
Lung ser nàmin thlâk ei ta;
Theichang tluon an hmanghai chu,
Sidar thingin thlak vong ei tih”
Tiin an hril hlak si a.
11 Sienkhom anni bei dingin,
Rezin hmêlmahai kut chu,
LALPAN a sukhratpek a.
12 Sak tieng pangah Aramha’n,
Thlang tieng pangah Filistinha’n,
Israelhai fak zo tumin,
An bàu an ka tuou a nih.
Chuong hiel chu ni sienla khom,
A lungsen a re naw a,
A kut a hlâng zing a nih.
13 Chuong hiela a hrem khomin,
Iengkim LALPA kuom tieng chun,
Simin an hung kìr chuong nawh.
14 Chuleiin, Israel lu le mei chu,
Tûm kâu le phairuong angin,
LALPAN ni khat thilthuin,
A fik bong vong ding a nih.
15 Mi lien le upahai chu,
A lu tieng pang ni’ng an ta,
Khêl hriltu zawlneihai chu,
A mei tieng pang ni’ng an tih.
16 Hnam thruoituhan an mihai,
An thruoi suol a, an bo zo.
17 Pathien poisakna nei lo,
Mi rilo le khêl hril hmang,
Anni tawl vong tlat leiin,
Thrangtharhai chungah Pathien,
A lungni thei ta naw a,
Fahra le hmeithaihai khom,
A lunginsiet thei ta nawh,
Chuong hiel chu ni sienla khom,
A lungsen a rè naw a,
A kut a hlâng zing a nih.
18 Meiin buor le hlo hling nei,
A kăng hmang vong hlak angin,
Suolna khomin mei angin,
Ram a kăng dur dur hlak a,
Rampuihai khom a kăng a,
A khû a’n tung ngŭt ngŭt hlak.
19 Iengkim LALPA lungsenin,
Ram po po raw hawp a ta,
Mihai chu meia tì din,
Thing herah inchang an ta,
Mani unauhai chen khom,
Tu khomin hlà naw ni hai.
20 Chang tienga mi an dol a,
An tràm a re chuong naw a,
Voi tienga mi an fàk nawk a,
Khop tik an nei chuong si nawh.
Mi tinin mani nauhai sa,
Intîm loin fa’ng an tih:
21 Manase le Efraimhai,
An sa infa ton an ta,
An pahnia inthuruolin,
Judahai beihron an tih.
Chuong hiel chu ni sien khom,
A lungsen a re naw a,
A kut a la hlâng zing tho.