Lal Ahaz kuoma thucha
7
1 Juda lal Uzia naupa Jotham naupa Ahaz inlal laiin, Aram lal Rezin le Remalia naupa Israel lal Peka hai chu Jerusalem rûn dingin an hung inthok a, sienkhom an hnê el thei naw a. 2 Chu phing leh Davida sunghai kuoma chun, “Aram lal le Efraimhaia an thrangruol a nih” tiin an va hril a, lal Ahaz le a mipuihai lungril chu thliin ram thing a sawi hnǐng ang elin a’n hnǐng a. 3 Chuongchun, LALPAN Isai kuomah, “Nang le i naupa Sear-Jasub chu dil sakhnung lem tui lakna tawpa puon sawptuhai phŭl panna lampuiah Ahaz hmu dingin fe suok ro. 4 A kuomah, ‘Fimkhur la, tri loin muong takin um rawh. Aramhai le an lal Rezin le Remalia naupahai lungsen inhrăwk chu thingthu hring rêm hnung khu lui lui ang chauh a na, thlaphangna ding ieng khom a um nawh. 5 Aram hai, Efraim hai le Remalia naupa hai chun i sietna ding an phier ruk a, 6 ‘Judai ram hang rûn ei ta, khoi dar vong ei ta, insem ei ta, lal Tabeel naupa chu lalah sieng ei tiu” an ti a nih.7 LALPA Chunghnungtak ruok chun hieng hin a hril:
“An thil phier puitling naw ni a,
Hlawtling ngai bok naw ni hai,
8 Aram khawpui chu Damaska,
Damaska lu chu Rezin el hi a nih.
Kum sawmruk panga sungin,
Efraim hnam se vong a ta,
Hnamin dam khawsuok naw nih.
9 Efraim lu chu Samaria a na,
Samaria lu chu Remalia naupa el a nih.
Ringnaah in ngir nghet naw chun,
Dingchang thei ngai naw ti niu”
tiin.
Immanuel chungchang thu
10 LALPA chun Ahaz a biek nawk a, 11 “Seol inthûk tak amanih le vàn insâng taka inthokin amanih inchikna inentir dingin LALPA i Pathien kuomah hni rawh” a ta. 12 Ahaz chun, “Hni naw ning, LALPA chu fie naw ning” a ta. 13 Chu phing leh Isai chun, “Davida sunghai, tuhin lo ngaithla ro khai. Mihriemhai dawtheizie fie hi huntawk in la ti naw rop a ni maw? Ei Pathien dawtheizie chen khom fie pei in tum am a ni? 14 LALPA ngeiin inchikna inhmutir a ti cheu: Nunghak thienglâm chun nau pâi a ta, nau pasal nei a ta, a hmingah Immanuel sak an tih. 15 Ama chun a sie le a thra a thlier thei pha chun bawngnene khal le khuoizu ring a tih. 16 Chu naupang chun a sie hnawl a, a thra a thlang thei tak tak hma khomin, i tri èm ém hlak lal pahnihai ram chu sukramin um a tih. 17 Efraim-in Juda a threab inthoka la tlung ngai lo thil chu LALPAN nangma le i khuo le tuihai le i pa sungkawhai chungah hung intlungtir a ta, Asuria lal chu hung thruoi a tih. 18 Chu ni chun LALPAN Aigupta vadung tawp rĕta thohai le Asuria rama khuoihai chu faifûkin ko a tih. 19 Ruom khokroka hai, lungpui kak kăra hai, hlingbuka hai le tui lăkna hmun le phŭlahai fu sip vong an tih. 20 Chu ni chun Eufretis vadung khĕla LALPA hmul vawna haw Asuria lal chu hmangin i lu le ke vaw kol vong a ta, i khâkhmul chen khom ziet fai a tih. 21 Chu ni chun pa pakhatin bawngpui tuoi pakhat le kèlpui pahni chu la vâi hrăm a tih. 22 Nenetui an hau èm leiin ama chun khuoizu leh ring a ta, rama cheng la um sunhai khomin bawngnene khal le ram khuoizu ring veng an tih. 23 Chu ni chun grep huon, kung sangkhat bil, sekel sangkhat lam theina hmunhai kha hling le buorin bawm sip a tih. 24 A ram chu hling le buorin a bawm sip tak leiin chu taka chun mihai chu thalngul le thal chawiin sa pêlin ramsuok an tih. 25 Tuthlaw hmanga tlâng lo in neina hlakhai chu hling le buorin bawm khum a ta, thlo dingin fe ta ngai nawng in ta, bawng ruol le beram ruol tlatna hmun inchang ta’ng a tih.