Jerusalem chunga rorelna
3
1 Lalpa, Iengkim LALPA chun,Jerusalem le Judai rama inthokin,
Fak le dawn le tui lakna hnàr,
A sukchât ding trêp a nih!
2 Mi huoisen le ralhrâthai,
Rorêltuhai le zawlneihai,
Aisanthiemhai le upahai,
3 Sawmnga hotu le lalhai,
Remruot thiem le themthiemhai,
Dawithiemhai khom an rêngin,
A la suktawp vong ding a nih.
4 An lalah naupang sieng ka ta,
Tlanglaktehan op khum an tih.
5 Anni le anni innêksawr an tih,
Pa le pa, tuolbawm le tuolbawm.
Upa chungah tleirawl inlek an ta,
Mi chinin mi inzaum hmusit a tih.
6 Miin a pa inah a unaupa chelin,
“Nang chun zakaw fuol i nei hih,
Kan thruoituah nang thrang la,
Sietna intieng hnêr hnûr hi,
Ching feltuah nang thrang rawh”
A ti hun la tlung a tih.
7 Sienkhom chu ni chun aman,
“Kei chun ieng law thei naw ning,
Ka inah fak ding a um naw a,
Sil le bil ding a um bok nawh,
Mipui thruoituah mi sie lul naw ro”
Tiin la khek suok a tih.
8 LALPA ropuina chu cho a,
Trong le thilthawa a do leiin,
Jerusalem chu a chim thla a,
Judahai khom an tlu thal rum.
9 An hmelah an suolzie a’n lang;
Sodom mihai ang bokin,
Uolau taka che pawrin,
An suol an thup thlawt ta nawh.
An chung a va pik de aw!
Mani insuksetuhai chu.
10 Mi felhai ruok chu hril la,
An kalchawi la tluong a tih,
An thilthaw ra suokhai chu,
An la tlàn ding a ni si.
11 Mi rilohai chung a pik!
Sietnan thla a zàr khum zing!
An kut thilthaw ang peiin,
Thungrulin la um an tih.
12 Ka mihai neksawrtu chu,
Naupang té tè chauh an na,
An chunga rorêltu khom,
Nuhmei an ni ta tlat chu tie!
Aw, ka mihai, in thruoituhan,
Lam naw tienga fepuiin,
An thruoi hmang cheu a ni hi!
13 Ro rêl dingin LALPA chu,
Rorelna hmunah a thrung a,
A mihai chungchang thu chu,
Hril dingin a hung tho a.
14 Upahai le thruoituhai chungthu,
Lalpan a rêl mek a nih:
“Ka grep huon in sukram a,
Pasiehai thil in rokhai chu,
In inah in kol fur tawl a.
15 Ka mihai sir sop neng a,
Retheihai hmai in rawt hi,
Iengtizie am an ta a?” tiin
Lalpa, Iengkim LALPA chun a hril.
16 LALPA chun a hril pei a:
“Zion minuhai chapozie hi,
Dâk awr awrin an lawn a,
Lĕm tumin mi an mel a,
Telnêng pal ri sieu sieuin,
Hniek tiemin an lawn awt awt.
17 Chu lei takin LALPA chun,
Zion minuhai lusîp chu,
Pannan inbawmtir a ta,
An lu sukkolpek a tih” tiin.
18 Chu nia chun LALPAN an incheina thra bânbun hai, luhrèn hai, thrimkuol hai, 19 nabê hai, ngûnkuol hai, hmaidier hai, 20 samhrèn hai, kerêka bun telnêng hai, kawnghrèn hai, rimtui bawm hai, ai thratna dinga an bun aibun hai, 21 suoi namna kutsebi hai, hnârbe kuolhai, 22 kût nia incheina thuomhnaw thra korfuol hai, silpuon hai, aiman zakuo hai, 23 hlimen hai, puon zâi inhmi hai, khai nel nel hai le bătpuon hai chu LALPAN la hmangpek a tih.
24 Rimtui nĕkin rimsie,
Kawnghrèn nêkin hrui zèn,
Sam chei nêkin lu kâwk,
Puon mawi nêkin saiip,
Hmêl thra nĕkin hmai dep kawng,
Hung ni ta lem vong a tih.
25 I mihai kawlhnâmin that an ta,
I pasalthrahai indonaah tlûng an tih.
26 Zion kotkharhai chun sûnin,
Mitthli leh trap tlok tlok an ta,
Vâkvaiin inthrung zap an tih.