LALPA Tlâng
2
1 Amoz naupa Isaiin Judahai le Jerusalem chungchang thu a hmu chu hi hi a nih:2 Ni nuhnunga hai chun,
LALPA tempul tlang chu,
Tlang po po laia lien takin,
A la hung ngir ding a nih.
Tlang po po khûm vong a ta,
Hnam tin hung fuon khawm an tih.
3 Hnam tinrênghai hung an ta,
“Hung ro, LALPA tlangah kaiin,
Jakob Pathien inah fe’ng ei tiu;
A lampui ei hraw theina dingin,
A lampui mi lo zirtir a tih”
Tiin an la hril ding a ni si a.
Zion-a inthokin dàn thu chu,
Jerusalema inthokin LALPA thu,
A fe suok ding a ni si a.
4 Hnam tin inkar thu rêl a ta,
An thubuoi rêl felpĕk a tih.
An kawlhnămhai chu làngkawnah,
Leiletna dingin sut ta’ng an ta,
An feihai theikung tanna chemin.
Hnam dangin hnam dang lakah,
Kawlhnâm inlet ta naw ni a,
Indo dan inchûk ta naw ni hai.
5 Hung ro, aw Jakob sungkuohai,
LALPA vara chun lêng ei tiu.
LALPA ni
6 I mi, Jakob sungkuohai chu,
I lo thlauthlăk ta si a.
Khawsak tieng dawi an hmang a,
Filistin dawithiemhai ruoiin,
Ringnawtuhai leh kut an insui.
7 Chuong mihai chĕngna ram chu,
Tangkaruo le rangkachak tamna,
An hauzie khom hrilin a siek nawh.
An ram chu sakorin a sip a,
Sakor tawlailir tiem seng lo an nei.
8 An ram chu milimin a sip a,
An kuta siem hmaah an kŭn a,
Kuta an siem ngei hmaa chun.
9 Rawt hnuoi la ni vong an ta,
Suktlawm ni vong bok an tih,
Ngaidam tawl dĕr naw rawh.
10 LALPA ropui inzaumna le
A tribaiumna pumpel dingin,
Lungpui kara hai chun lûtin,
Pilvûngah inbi hmang ro.
11 Meng sanghai sukhnuoi a ta,
Chapohai suktlawm a tih.
Chu nia chawisang ding chu,
LALPA chauh ning a tih.
12 Chapo le inngaisanghai dingin,
Iengkim LALPAN hun a ruot a,
Chawisanga umhai po po chu,
Suktlawmin la um vong an tih:
13 Lebanona sidar thing insanghai,
Basana saisuo kung insanghai,
14 Tlang le muol inchung lûrhai,
15 Kulbing insang le kul bang sahai,
16 Sumdawng long ruol po po le
Long ropui po pohai khom.
17 Indu chu sukhnuoiin um a ta,
Chapo chu suktlawmin um a ta,
Chu ni chun LALPA chauh hi
Chawisangin um ta’ng a ta,
18 Milim sukram vong a tih.
19 LALPA a hung tho suok a,
Hnuoi hi a sawi hning pha chun,
A hmêlmahai thlabâr an ta,
Hnuoi kuoah invâk lut an ta,
LALPA triumna le mawina ropui
Laka inbik hmang tumin,
Lungpui karah tlân lût an tih.
20 Rangkachak le tangkaruoa siem,
An milim biek hlakhai chu,
Buikelek le bâkhai hmaah,
Pei hawnin la maksan an tih.
21 Thoa hnuoi hi a sawi pha chun,
LALPA triumna le mawina ropui
Laka inthoka inbi hmang dingin,
Lungpui karah tlân lŭt an ta,
Lung tolawt karah inbing an tih.
22 Hnâra thuok la ve hlak tho,
Mihriem ringsana nei hi ma ro.
Ieng am ringsan tlâk a ni a?