8
1 Nu nene intrawm, ka trapa ni la chu,Tuola ei intuok chang khomin,
Fawp chot nghal ka ti che a,
Tu khomin mi dem naw nih.
2 Ka chûnnu pindanah thruoi ka che,
Iengkim mi zirtirtu kuoma chun,
Uoiin rimtui tul ka ti che,
Ka theibufai hnîng ngei el chu.
3 I kut voi tieng lukham ka ta,
I kut changin mi kuong i tih.
4 Aw Jerusalem lanuhai,
Kan inhmangaina hin dittawk,
Amaa a ngà hmâ khat chu,
Hawl tho lo dingin ka ngen cheu.
Hla parukna
Jerusalem nunghakhai
5 Tu am a na a ngaizawngpa innghai a,
Thlalĕra inthoka hung tung hi?
Nunghak
Epul zar hnuoiah ka kei tho che a,
Chu taka chun i nun a pai tran che a,
Chu taka bok chun nau ha se tuorin,
A hung hring suok che a ni kha.
6 I lungrilah suoi angin mi nam la,
I chawnbànah mi nam bok rawh;
Hmangaina hi thina angin a hrât a,
A thikthu khom thina tluka sie a nih.
Mei angin a chok puot puot a,
LALPA meipui ang top a nih.
7 Hmangaina chu tui tam taka,
Bur hlum thei a ni naw a,
Tuipui khomin a chim pil thei nawh.
Miin a hausakna po po sêngin,
Hmangaina hi inchawk tum sien,
Mi nuizatbur chauh hlawng a tih.
Nunghak trăhai
8 Farnu tleirawl tè kan nei a,
A trâng a la’n bàl hman naw a,
Inleng a hung nei ve pha leh,
Ieng am kan lo hril ta ding?
9 Kul bang dam ni sien chu,
Tangkaruo kulbing bawlpek kan ta,
Kotkhar dam lo ni sienla chu,
Sidar thingin tuom mawi kan tih.
Nunghak
10 Ka nih annawm, kul bang chu,
Ka trâng khom a vŭm ve tah;
Ka hmangai mithmua chu,
A lung sukâwitu ka ni hi.
11 Baal Hamon-a a grep huon chu,
Solomonin mi a’n sàntir a,
A sântu sengin cheng sangkhat,
Sàn man an pek ding a nih.
12 Ka grep huon chu keima ta a na,
Sangkhat chang rawh, aw Solomon,
Huonpuhan zahni chang sien la.
Tlangval
13 I rawl ngaithlatu lenruolhai le
Aw nang, huona chêng hlak nu,
I rawl mi’n ngaithlaktir ve rawh.
Nunghak
14 Hung inhmaw rawh, ka hmangai,
Zuktuoi anga hratin hung tlàn rawh,
Rimtui tlanga sakhi te anga hrâtin.